發表文章發起投票回覆
【歷史台】開坑講下古美索不達米亞:西臺帝國興衰史
我個blog:http://zannanzahattusili.blogspot.com
facebook page:https://www.facebook.com/zannanza/

引言



響好耐好耐之前,有一片肥沃而遙遠既土地叫美索不達米亞,響呢度流敞住幼發拉底河同底格里斯河兩條偉大既河流,曾經有好多偉大既國王同偉大既帝國響呢片土地上崛起同衰亡。有關於佢地既故事代代相傳,傳作一時佳話。響古代既近東世界,只有最強大帝國的國王能夠享受「偉大的王」的稱號,呢d偉大的王享有國際上既聲譽和尊敬,而且佢地都係國際政治上的重要參與者。而被稱為偉大的王的帝國,就只有著名的埃及、亞述、和巴比倫。

然而響美索不達米亞既西北面,響一個現代被稱為土耳其既地方,存在住另一個偉大的帝國,然而呢個偉大的帝國既存在就得好少人知道。佢地既歷史同故事被迷霧所掩蓋,佢地既輝煌事跡完全被歷史所遺忘。呢個帝國既名字叫:西臺帝國。

同閃米特人種既亞述同巴比倫唔同,西臺帝國係屬於印歐人種,就好似邁錫尼希臘一樣,而佢地講既語言同今日既英文有親戚關係,同屬印歐語系既語言。響西臺帝國極盛既時代,佢地既領土由西邊的愛琴海岸延伸到東邊既幼發拉底河,由北邊的黑海延伸到南邊既敘利亞,覆蓋今日土耳其的大部分同黎凡特北部。時間係公元前13世紀,呢個係一個屬於英雄既時代,同荷馬史詩同期。



西臺既中心地帶係位於安納托利亞中部既高原,響呢度,紅河(Kızılırmak)彎曲流入北邊既黑海。呢個既地形乾旱貧瘠,而且土地呈現出啡紅色調,咁係因為呢度既泥土富含氧化鐵既原故。亦都因為呢個原因,西臺人係最早研究出從赤鐵礦中提煉出金屬鐵既民族,亦都係世界最早進入鐵器時代既民族。第一眼望見,呢度已經同埃及、美索不達米亞肥沃既河谷地形好唔好。由於缺乏大河既滋潤,好少人會預計到呢個地方能夠誕生出一個偉大既文明。

然而即使係咁,從公元前17世紀到公元前13世紀,西臺人仍然頑強咁響呢度生存繁衍,佢地用智慧同堅強既意志成功克服左嚴酷既自然環境,並成功創造出一個被認為係不可能既文明。惡劣既環境中誕生出堅毅不屈既人民,正因為如此,西臺人以其紀律同勇敢善戰聞名於世。事實上,佢地曾經有過一個輝煌既戰績:佢地既軍事行動曾經將呢支強大既軍隊帶到巴比倫既城門外,而佢地亦都曾經同偉大既古埃及帝國並駕齊驅。

我現在要講既就係呢個偉大帝國既故事,一個屬於鐵血帝國西臺人既故事。
Good14Bad2
2018/08/24, 3:12:13 下午
引用快速引用
本貼文共有 98 個回覆
好耐唔見你出post,上次講羅馬幾好睇
#null2018/08/24, 4:45:11 下午
引用快速引用
高質post
留名
#null2018/08/24, 4:45:40 下午
引用快速引用
我以為楔形文字係表意唔係表音
#null2018/08/24, 4:50:55 下午
引用快速引用
不得了
#null2018/08/24, 5:17:40 下午
引用快速引用
LM
#null2018/08/24, 6:05:26 晚上
引用快速引用
埃及對赫梯
#null2018/08/24, 6:25:24 晚上
引用快速引用
正在清理檯櫈...
#null2018/08/24, 6:26:05 晚上
引用快速引用
好耐唔見你出post,上次講羅馬幾好睇

多謝支持羅馬post
我之前因為太耐冇login唔記得左膠登password,最近先拎得返
#null2018/08/24, 9:21:06 晚上
引用快速引用


前14世紀初敘利亞局勢的發展

埃及圖特摩斯三世(Tuthmosis III)的敘利亞戰役結束,加上西臺人被安納托利亞的事務所困無暇南顧,呢兩點都為米坦尼的薩烏什塔塔一世(Saushtatar I)帶來在敘利亞擴張勢力的機遇。當然,對於佢黎講,響敘利亞既野心都必須考慮到亞述響該區既勢力。為應對米坦尼日益擴張既勢力,亞述已經跟埃及結成盟國,因此成為米坦尼既敵國。薩烏什塔塔決定先發制人,對亞述發動入侵並攻破其都城亞述城(Ashur)並將掠奪所得既黃金白銀帶回米坦尼都城華述迦尼(Washshuganni或Wassukkani)。當亞述既威脅解除後,薩烏什塔塔越過幼發拉底河進入北敘利亞,一直打到地中海海岸。當北敘利亞的勢力穩固之後,薩烏什塔塔就同卡佚石既國王締結盟約,將米坦尼既勢力延伸到阿拉拿既南面。到左呢個地步,米坦尼同西臺既衝突就已經如箭在弦,戰爭隨時爆發。

與基祖瓦達締結的辛納殊烏拉條約(Sunashshura Treaty)

如果西臺的圖哈利瓦要挑戰米坦尼響北敘利亞既勢力,佢第一件要做既事就係同扼守從安納托利亞通往敘利亞交通要道既基祖瓦達達成協議。基祖瓦達係西臺響敘利亞進行征服既關鍵,除左扼守交通要道之外,基祖瓦達既中立性對西臺響該區既軍事行動成敗相當重要,因為佢可以避免安納托利亞東南部既親米坦尼國家從背後插前線既西臺軍隊一刀。因此西臺國王圖哈利瓦就同基祖瓦達國王辛納殊烏拉(Sunashshura)簽訂左一份條約,目前出土的條約泥板殘片有西臺文字版本同當時國際外交通用語言阿卡德文(Akkadian)版本。通過條約既阿卡德文版本,歷史學家知道響圖哈利瓦祖父輩,基祖瓦達係西臺既盟國,後來轉會到米坦尼,然而到左圖哈利瓦年間又再次回到西臺一邊。條約中西臺以基祖瓦達既解放者自居,基祖瓦達人以西臺人既到來感到非常高興,並在西臺的協助下重新獲得獨立。從此以後,基祖瓦達就牢牢處於西臺勢力控制之下;事實上響此條約後不久,基祖瓦達可能響圖哈利瓦治下被併吞入西臺帝國並由哈圖沙直接統治。當同基祖瓦達達成聯盟協議之後,敘利亞既大門就已經為西臺軍隊而開。

西臺人重返敘利亞


青銅器時代晚期的敘利亞以及黎凡特一帶地圖

雖然關於西臺人響敘利亞征戰既歷史檔案比較破碎,但我地從一個名世紀之後穆瓦塔尼二世(Muwattalli II)同阿勒頗國王簽訂的條約知道圖哈利瓦好大機會模仿古王朝既哈圖西里一世同穆爾西里一世一樣,將阿勒頗作為佢首要目標。位於敘利亞既阿勒頗就咁夾響西臺同米坦尼兩個主要強權之間,左右做人難。如果親近其中一方,就無可避免得罪另一方。根據條約我地知道阿勒頗首先同西臺人結盟,其後響米坦尼國王薩烏什塔塔壓力下同米坦尼盟,結果招致西臺報復。西臺軍隊打敗左阿勒頗,將城池掠劫一空,甚至打敗並「摧毀」左米坦尼既軍隊。當然,歷史學家普遍對西臺軍隊「摧毀」米坦尼既記載抱有極大懷疑,因為此後既好多年,米坦尼仍然係敘利亞北部一股不可忽視既勢力。

在阿勒頗條約中,我地知道兩次城池從阿勒頗手上轉移到其鄰國Nuhashshi及Ashtata手上的事件。兩國首先向米坦尼就阿勒頗所犯下的罪行上訴,要求將城池轉移到他們治下,此上訴被米坦尼方面接納。不久後阿勒頗重新獲取該座城池,但Nuhashshi及Ashtata再次向一位西臺國王哈圖西里上訴,上訴再被接納,阿勒頗再次失去該城池。事件顯示阿勒頗同敘利亞地區的小國夾響西臺同米坦尼中間,領土範圍經常因兩國關係發生變動。關於呢位西臺國王哈圖西里,歷史學家所知既極少,因為除左呢份條約之外,西臺既王表同史書完全冇關於佢既記載,因此有史學家甚至懷疑佢既存在。歷史學家知道有位同時代既王室成員哈圖西里,佢係西臺響卡斯卡地區一位軍官,但兩人是否同一人就係爭議不休既話題。當然,即使哈圖西里(姑且稱之為哈圖西里二世)曾經做過西臺國王,佢既在位時間必定非常短暫。有可能係阿努瓦達既共治國王,若真如此,阿勒頗條約簽訂的時間理應在圖哈利瓦駕崩之後。但一切只屬於學者猜測,響更多證據出土之前,我地只能夠話呢位哈圖西里係西臺咁多位可能存在既國王中身份最成謎既一位。

阿努瓦達(Arnuwanda)單獨統治西臺

當圖哈利瓦一世駕崩之時,佢留比阿努瓦達既帝國係一個大但存在隱憂既帝國:西臺既版圖已經由愛琴海岸延伸到美索不達米亞北部,但安納托利亞西南部既馬杜瓦塔顯示當地既附庸國暗自有其利益計算,經常唔聽哈圖沙支笛。東南部既敘利亞,西臺同米坦尼響該區漫長既爭霸只係剛剛開始。至於北部既形勢就更加不利,卡斯卡部落不斷入侵,甚至摧毀左好多當地既西臺宗教聖城,將神殿及神像破壞、將裡面既金銀銅掠走、將祭司四散、將居民賣作奴隸。面對日益嚴峻的局面,阿努瓦達只有同卡斯卡部落締結條約,及派駐軍官監察邊境局勢發展。響南部則同基利家海岸既烏拉(Ura)及基祖瓦達的軍事殖民地締結條約。阿努瓦達既外交政策亦都顯示佢嘗試表現出強人的形象,對挑戰西臺權威既事採取零容忍既態度。其中一個例子就係佢對米他(Mita),一個位於上幼發拉底河既西臺附庸國國王既態度。米他娶左西臺敵人烏沙帕(Usapa)既女兒作妻子,而佢對西臺既反叛不止於此。對此,阿努瓦達立即與其他西臺附庸國召開會議,並在會議中譴責米他的所作所為,然後向佢發出最後通諜,如果米他選擇無視,其他西臺附庸國就會出兵,直至西臺軍隊抵達為止。阿努瓦達語氣之強烈、手段之強硬,同《馬杜瓦塔控訴狀》中所述如出一轍。不過歷史學家並唔知道呢件事既結局,而米他的做法有冇獲米坦尼在背後煽動,呢個仍然係一個未解既疑團。

埃及和米坦尼之間的外交關係


阿蒙霍特普二世(Amenhotep II)頭像

歷史學家並唔知道,當西臺國王圖哈利瓦征服敘利亞時,薩烏什塔塔一世做左d乜,但可以肯定既係米坦尼保持住獨立既地位。接著,米坦尼國王阿爾塔塔馬(Artatama)繼任,當阿努瓦達被管治附庸國既困難所纏繞之時,米坦尼就如浴火鳳凰般從戰敗既陰影中重生。當然,阿爾塔塔馬想響敘利亞擴展自己既勢力,就肯定會同西臺發生衝突。西臺響敘利亞既勢力並唔容易應付,尤其係基祖瓦達目前仍牢牢響哈圖沙控制之下。至於埃及仍然係米坦尼既敵國,米坦尼冇可能應付西線(西臺)同南線(埃及)兩面作戰,因此米坦尼當務之急係同埃及締結和約。談判從阿蒙霍特普二世(Amenhotep II)在位期間一直進行到圖特摩斯四世(Tuthmosis IV)期間,埃及並無完全同意阿爾塔塔馬所提出既條件,而且埃及人對米坦尼的終極意圖抱懷疑態度。埃及人要求阿爾塔塔馬將其中一位公主嫁到埃及以締結婚盟,阿爾塔塔馬並無即時同意,埃及人總共提出七次相同既要求先至獲得同意。婚盟為正式條約鋪平道路,埃及同米坦尼協議瓜分敘利亞:卡佚石(Kadesh)至烏加里特(Ugarit)一帶海岸線歸埃及,北敘利亞歸米坦尼。呢紙條約有效將西臺響敘利亞既勢力排除在外,呢個正正就係西臺一位新統治者:圖哈利瓦三世(Tudhaliya III)所面對既困局。
#null2018/08/24, 10:12:22 晚上
引用快速引用


圖哈利瓦三世(Tudhaliya III):西臺本土的大災難

當圖哈利瓦三世(Tudhaliya III)接替阿努瓦達統治西臺帝國之時,埃及同米坦尼締結和約瓜分敘利亞,以圖將西臺的勢力排除在外。然而對西臺而言,呢件事並唔係哈圖沙最優先考慮,因為哈圖沙即將面臨一場災難:從北方來的卡斯卡部落正蠢蠢欲動要入侵赫梯本土,一場風暴正山雨欲來。

根據圖哈利瓦三世寫給駐紮在北方邊境官員和軍官的信件,在赫梯本土北方出現大規模的入侵情況,卡斯卡的敵人在夜間入侵西臺領土,在一個地方有600人、另一個地方有400人,圖哈利瓦三世警告當地軍官要提高警覺並在必要時採取反擊行動,不得有誤,否則將面對最重的懲罰。但接續下來的事態發展可見,哈圖沙所做既一切都係徒勞,因為卡斯卡部落橫掃西臺北方邊境,侵入並且掠奪西臺本土。甚至連西臺首都哈圖沙都遭逢浩劫:城池被敵人攻破,並且被燒成平地。根據前13世紀的西臺國王哈圖西里三世(Hattusili III)既文件所述,包括卡斯卡、阿札瓦、阿雅南(Arawannan)、伊蘇雅(Isuwan)等等在內的多批敵人有系統地侵入西臺領土。歷史學界對於呢次入侵所牽涉既各方勢力到底有冇協調存在爭議,因為各方相距甚遠,我地好難可以相像到響果個通訊唔發達既年代各勢力之間如何協調各自的軍事行動。因此,亦有歷史學家相信呢場大入侵係由卡斯卡部落帶起個頭先,導致西臺將過多既兵力集中響北方並疲於奔命,直接令帝國其他邊境守備空虛,進而引致各方勢力乘虛而入。結果卡斯卡部落進軍到紅河南面,並摧毀在西臺的首都哈圖沙。阿札瓦人則從南面入侵,並將前線推進至圖瓦努瓦(Tuwanuwa)及烏達(Uda)。

根據西臺的歷史記載,呢次入侵既全面性同嚴重性好難被低估:西臺遭到四面圍攻,本土遭到全面而徹底既破壞。但如果我地憑呢點就話西臺既國運已經玩完,恐怕呢個肯定唔係歷史事實。因為即使哈圖沙遭焚毀,西臺國王同政府,加上一部分既軍隊似乎殘存左落黎,並且在數年之內成功重整勢力,反擊敵人並收復失土。歷史學家有意見認為,文件中記錄既大規模同時入侵可能係有誇大成份,事實上敵人分開幾年入侵,當敵人集結之時,圖哈利瓦三世有足夠預警時間放棄首都,並從哈圖沙將西臺政府轉移到較安全既地方。歷史冇留低關於西臺遷都既記載,但考慮到遷都響物流上係一個巨大既挑戰,相信西臺人係響極大既威脅同極危急既情況下完成呢件壯舉。

當然,呢個時候我地要問一個問題,到底西臺既流亡政府去左邊度?其中一個可能性係位於紅河上游既沙姆哈(Samuha),呢座城市後來成為西臺人重新征服赫梯本土既重要基地。不過呢個推論都唔係完全冇爭議,因為沙姆哈雖然位於卡斯卡人主要入侵路徑之外,但另一班西臺既敵人阿玆人(Azzi)似乎攻陷埋呢座城市。即使如此,歷史學家普遍相信沙姆哈係西臺第一座重光既城市之一,並將被用作成西臺軍隊光復安納托利亞領土既重要基地。但響哈圖沙光復之前,西臺既前景完全可以話係冇希望,而阿札瓦似乎將成為安納托利亞既新主人。連埃及都急不及待同阿札瓦建立外交關係,而兩國的外交書信中,埃及更稱「哈圖沙已經徹底癱瘓」。但此後既歷史發展證明埃及人既評價係過早下結論,阿札瓦人並未能夠將軍事上既成功轉化為對西臺核心領土既實際控制,因為赫梯(Hatti)已經被卡斯卡人所佔據。不過正當西臺陷入崩潰邊緣之時,各方冇人會預計到圖哈利瓦三世將會迅速反擊,光復西臺既失土。

圖哈利瓦三世既反擊

關於圖哈利瓦三世對西臺軍隊既重組同反擊,詳情記載響穆爾西里二世年間成書,已經破碎既《編年史》泥板(Deeds)之上。泥板詳細記載圖哈利瓦三世及其兒子蘇庇路里烏瑪一世(Suppiluliuma I)既軍事行動,當中以針對北方卡斯卡人同阿玆人既軍事行動作開端。從沙姆哈開始,圖哈利瓦三世響佢既兒子蘇庇路里烏瑪(Suppiluliuma):同時亦係佢既顧問同戰友,既協助下,逐點收復西臺失去既土地。響《編年史》中,呢個成就被用作同西臺偉大既前輩哈圖西里一世、穆爾西里一世同圖哈利瓦相比。西臺軍隊首先重覆攻擊入侵既卡斯卡部落,為對方帶來嚴重傷亡並帶回不少戰俘。然而呢個只係開始。西臺軍隊其後向西進,攻擊阿瓦娜人(Arawanna),馬沙(Masa)同卡馬拉(Kammala),並成功解放西部地區。然而面對再次入侵既卡斯卡人,西臺軍隊再次擊敗敵人並贏回土地。然後西臺人轉向東北方向紅河上游至幼發拉底河一帶,發兵攻打阿玆人並推進至沙姆哈。蘇庇路里烏瑪帶兵攻擊阿玆人,敵人臨陣退縮,最終圖哈利瓦同蘇庇路里烏瑪既聯軍同阿玆人既國王卡拉尼(Karanni)響昆馬哈城(Kummaha)附近作戰,雖然記載戰果既部缺失,但幾乎可以肯定既係西臺贏得最後勝利,並將阿玆國納作西臺既附庸國。根據和平條約,西臺的敵人必須將西臺聲索的土地歸還比西臺。當東北邊搞定之後,蘇庇路里烏瑪向圖哈利瓦三世主動要求由他親自帶兵攻打西臺其中一個最難纏的敵人:阿札瓦。結果西臺軍隊響低地(Lower Land)同阿札瓦人交戰,此前西臺軍隊已經攻陷左從赫梯及敘利亞到阿札瓦既交通要道城池沙拉帕(Sallapa),切斷左阿札瓦人對西臺既行動基地。


蘇庇路里烏瑪《Deeds》泥板殘片(CTH 40,KUB 19.22)

根據《編年史》所載,響諸神既庇佑之下,蘇庇路里烏瑪既軍隊大破阿札瓦軍,敵方死傷慘重。然而即使根據歷史記載阿札瓦軍響戰場上大敗,但阿札瓦勢力根深蒂固,對阿札瓦既軍事行動一直持續到蘇庇路里烏瑪統治年間。《編年史》中提及到蘇庇路里烏瑪既軍隊重新征服左位於阿札瓦地區最北部的圖瓦努瓦(Tuwanuwa),並以此作為步兵及戰車的基地,希望可以最終將阿札瓦既勢力連根拔起。但至少中短期內呢個目標都冇成功,歷史記載到左蘇庇路里烏瑪一世年間,阿札瓦領袖拒絕左蘇庇路里烏瑪要求遣返在阿札瓦尋求政治庇護既西臺人,並打敗左西臺派去執行要求既軍隊,逼使蘇庇路里烏瑪親自上陣攻打阿札瓦。此後,蘇庇路里烏瑪任命哈努蒂(Hannutti)為低地既最高軍官,負責監視該區既異動。當哈努蒂成功鞏固西臺響該地區既勢力之後,佢利用此地作為基地,繼續攻打敵視西臺的哈普拉(Hapalla)。即使如此,阿札瓦地區仍存在強大既反西臺勢力同軍事資源,響西部反西臺勢力鼓動之下,阿札瓦成為西臺西部長期存在既威脅。從歷史文件我地知道蘇庇路里烏瑪用左足足二十年時間先鞏固到西臺響安納托利亞既勢力,而呢度當中大部分既時間都係用來征服阿札瓦地區:戰事從圖哈利瓦三世年間一直延續到蘇庇路里烏瑪一世年間,可以話西臺為左征服西部地區真係費盡苦心。

衛國戰爭既勝利及西臺王國的恢復

從破碎既《編年史》泥板中,我地並唔知道西臺既再征服係有計劃定見步行步。但我地知道西臺既普遍戰略係先攻打左距離西臺核心領土較遠既邊緣地區,然後先至收復赫梯的核心領土。呢個戰略有可能係為左先破壞敵人的大本營,減低如果先收復核心領土後面對敵人捲土重來的問題。至於西臺人幾時間始重建被破壞既西臺核心領土?歷史學家相信蘇庇路里烏瑪最遲響征討低地之前已經恢復左西臺響核心領土既主權,要不然呢場軍事行動根本冇可能順利進行。當位於低地既敵人被剷除之後,西臺既重建工作就可以響不受外敵威脅既情況之下進行。如果西臺既重建計劃存在一個完整既大藍圖,藍圖既設計師好大機會就係蘇庇路里烏瑪。當年老而身體開始衰敗的圖哈利瓦三世響沙姆哈既病榻上既時候,佢必定非常倚賴蘇庇路里烏瑪所提供既意見作決定,但到左最後圖哈利瓦三世仍然堅持親自上陣,響戰場上同佢既敵人交手。雖然歷史學家發現左圖哈利瓦三世同塔皮卡地區(Tapikka)的信件,但好多關於圖哈利瓦三世本人既事同響呢場偉大的「衛國戰爭」中的角色仍然成謎。事實上,當後來的國王哈圖西里三世記錄呢段西臺史上最黑暗既時期時,佢將衛國戰爭既勝利歸功於蘇庇路里烏瑪一世。但如果西臺響衛國戰爭既最終勝利可以歸功於蘇庇路里烏瑪,佢面對來勢洶洶既敵人存活下來,都必須歸功於蘇庇路里烏瑪既老豆圖哈利瓦三世。對歷史學家而言,圖哈利瓦三世或者可能係西臺史上最勇敢、信念最堅定,而後人知道得最少既一位西臺國王。呢年,係公元前1350年。
#null2018/08/24, 10:57:16 晚上
引用快速引用
秒後自動載入第3
上一頁下一頁
發表文章發起投票回覆
請先登入以發表回覆