發表文章發起投票回覆
續外賣店廚工記 (不定期更新)
前言
我是窮L一個,今年九月開始日日都係02:30後上堂,屋企又唔係有錢,重點是不懂理財,欠咗幾萬卡數,我讀文科,成積又唔算好,點幫人補習。
在學校附近,有個小型工廠區,區內有d茶記,外賣店,於是就膽粗粗去問請唔請人~~咁就做咗廚房工人啦。
因為在工廠區,我的返工時間是一至五,雖然我是獨L無街去,不過都唔想星期六日返工。
店裏面分舖面和廚房,舖面事頭婆管,廚房就老闆管,只做外賣唔做堂食,做嘢就無得hea, 工友~~唉!個個都係c9,人妻,唔通有後生女咩。

當後生眼型人遇見老餅口耳人

後生仔接收資訊用眼去理解,check手機,看電腦,whatapp, 印筆記
老餅接收資訊用口講耳聽
舊年我試過做做甜品舖,間甜品舖用電腦落單,看單做嘢,d甜品配方做曬貓紙,新人都好容易上手。
厘間外賣店是間十幾年的舖仔,用最傳統的門口叫單,廚房做嘢。
對我厘d用眼多過用耳的人,就真係死得啦!
初初返工果陣時,超唔適應。
日日比人叫:『阿鐵』,『阿鐵』 ,『阿鐵』
撞貓囉!原來我的聽力理解好差,唔怪得listening做嚟做去都係得2,dse緊緊得3
Good21Bad1
2017/03/07, 4:54:36 下午
引用快速引用
本貼文共有 177 個回覆
三文治
外賣店早餐不外乎三文治,通粉,湯麵,湯米,炒粉,炒麵,咖啡奶茶之類。
我厘d低技術廚工煮唔識,炒唔得,咁就只有做三文治。
我就負責做餐蛋治和腿蛋治,老細會炒蛋和煎餐肉,我就鋪麵包,張餐肉和雞蛋放在麵包中間,衿頂包,左右對稱切開,再放入淺啡色風琴袋即成。
要快,要節省時間:最低鋪一塊麵包,上面鋪餐肉,再鋪蛋,鋪兩塊麵包,鋪餐肉,鋪蛋,最後鋪一塊麵包,共八層,然後中間一刀切落去,咁就一次過做兩份三文治
每個步驟都有一定要求,炒蛋係用蛋漿倒落平板煎爐煎成蛋餅,跟著切成小方塊,咁就啃係有大有小,鋪蛋時要大塊搭細塊;火腿要好食,先把火腿放入熱水裏漉10-15秒;鋪麵包時要對齊;切麵包時不可用大力壓,不可留手指印,最重要是快。
點解用啡色紙袋?因為透明膠袋或膠盒不能吸水氣,紙袋就可以。還有全部材料要即刻做三文治,咁就可以保持溫度。D客就可以買到暖立立的蛋治去返工,返廠,返學,返寫字樓。
三文治 ❨二❩
三文治分熱食和凍食,熱食除了餐蛋腿蛋治外,還有鹹牛肉蛋、煙肉蛋、磨菇蛋,這三款煎蛋有獨門秘技,唔係普通的炒蛋,有order老細會特別做:先打一隻蛋,再加芝士碎入蛋漿中,煎到半熟放鹹牛肉、煙肉或磨菇,個客要生蛋又得,要熟蛋又得,d芝士碎融入蛋裏,提升了蛋的香味和口感
『客官,承惠12個大洋,加杯奶茶都係17蚊』 怕唔怕公開商業秘密?咁又唔怕,厘d都係工夫錢,茶記、餐廳d師父識做都唔做比你啦,做餐死,收你雞碎咁多錢

凍食三文治的材料來來去去嗰d: 番茄、生菜、芝士片、火腿,不過沙律吞拿魚和沙律蛋碎就真係要推介。以前見d女同學沙律撈吞拿魚搽麵包,又腥又林,仲周維問人食唔食 現在終於知到怎樣撈唔腥唔林的吞拿魚沙律。
關鍵是撈沙律醬之前,把吞拿魚的水份揸出來,你用咩野方法都得,在舖頭我地用手去揸d 水出嚟 然後先撈沙律醬,無咗水份的吞拿魚香味就好突出。

至於沙律碎蛋,其實唔係用沙律醬,因為沙律醬帶酸,而是用頂好嗰隻美容白汁 mayonnaise, 唔酸又夠滑。

用沙律醬又點,用美容白汁又點,用唔同的醬,對老闆來講是增加成本; 對員工來講是增加工聚,雖個老細要賺錢, 然對食物質素有要求 越做越覺得煮野食幾好玩
#null2017/03/07, 4:56:15 下午
引用快速引用
老細的月經

一到月尾,老細就會心情煩躁,容易發脾氣,好掹曾,少少事都罵人
多生意炒場又掹
少生意無錢又掹
因為要出糧

我地是現兜兜出糧 最先出糧比老臣子
尋日做咗萬零二萬蚊生意 就出糧比兩個人
如果生意唔好,得一萬蚊上下,就出糧比一個
成間舖有八,九個人
次次都係最後出糧,要等到十三四號

話說回來,厘檔野都算古怪
全部現金收入,無收銀機,收咗錢放入櫃桶
入貨找數,係櫃桶攞錢
月頭出糧,係櫃桶攞錢
老細d家用,我想都係櫃桶攞錢

前年暑期,我在甜品舖做暑期工
出糧日,老闆娘攞支票比員工,簽收
甜品舖星期一至四,平均每一做四,五千蚊
星期五六日,平均做萬五,六蚊
一個月有廿萬左右

厘檔外賣店,日日都做萬幾蚊生意
個個月都會過三十萬
唔明老闆娘點控制d現金流

有無 工商管理人可解答


巫婆是不是開茶記

我每日開工做三文治,做到九點半開始翻熱醬汁,鼓油汁,照燒汁,洋蔥汁,蒜蓉汁,黑椒汁,咖哩汁,白汁,吞拿魚汁
最後煮茄汁和肉醬,用得最多的是茄汁,煮茄汁要用一個直徑80cm的生鐵鑊
煮汁毫無難度,不可以黏底,手要不停地攪圈
一間舖頭仔每日中午飯市煮50/60公升醬汁

對比巫婆煮那個煲
我想巫婆應該開茶記, 她煮那個鍋應該是例湯


為甚麼港女減唔到肥

中學讀文科,又唔鐘意商科,唯有入文學院
我嗰系¼男生,¾女生
可惜阿鐵是個矮肥醜柒窮蠢靜悶臭毒
呢D機會
她們講的話題好悶,無咩興趣
但係就成日話減胖,有d話淨食蛋白質,唔食澱粉質,於是餐餐食雞脾;有d 食飯食唔飽,食零食搭夠;有d 食嗰合味道杯麵,當減肥

我九月返工,到十一月就瘦咗 2.5 kg
好簡單,消耗卡路里多過吸收
朝早做三文治手唔停,跟住煮汁對住嗰爐頭
好似蒸sauna ,博命流汗,煮完汁就炸薯角,洋蔥,抄菜,有時外場忙會幫手去送外賣
間場有少少時間就食兩塊花生醬包
無時間就唔食,
所以話,想減肥最緊要係勞動和出汗
初初返完工,一身臭汗入課室,d 同學以為我去做運動 瘦得好快喎
現在帶多件衫,霸住個殘厠梳洗吓
#null2017/03/07, 4:59:43 下午
引用快速引用
番外篇 阿鐵的聖誕聯歡會

聖誕呢d野係唔啱毒撚,有gathering我次次都話唔得閒,今次組爸組媽叫到,仲話慶祝佢地兩個都搵到工,咁咪去

出嚟食飯,又要等人,有兩個女同學餐餐遲到,又要等位,又要等d 女仔點菜,食完又等位食糖水,跟住成班人去等位唱k, 我就閃人啦想起都唔願去

今次聖誕聯歡唔洗出去食飯,有個有錢女住在d有錢人地區,間屋有2000呎,成組人去她屋企開party, 呢個女仔話做沙律,嗰個女仔話做布甸,有個話做意粉,我和幾個文學院男生就話叫外賣,因人丁單薄,勢孤力弱
去聖誕聯歡我都心知不妙,阿鐵打死都唔好煮野食呀
我專登0800先到,仲攞定kfc, pizza hut, pizza box 的外賣紙,最好係網上訂購
一到埗,果乜都唔掂

囡囡A: eeee, 唔識用你把罐頭刀
囡囡B: 快d 啦,好肚餓
囡囡C: 佢把罐頭刀壞咗嫁
囡囡D: 點呀,整咁內,識唔識
囡囡 : 人地都未試過

我地成班摺友同組爸組媽叫她們咪再整,
叫外賣好了
組媽二話不說馬上打電話
組媽好野,多謝組媽
不過。。。。
Pizza hut : 唔好意思,今日訂餐最快要1025 先送到

八點幾就快九點都仲未有得食
想搵薯片食,晨早已經食哂
於是入廚房搵野食
我問同學嗰賓妹,雪柜有無野食得
她話樣樣都食得,要煮
嘩!四門雪柜,菜,生果,乜都有
六片多士爐,10包加拿大真空包裝煙三文魚
切三文治刀

做公司三文治:三文魚切片,芝士片,生菜,番茄,火腿,沙律醬
工多藝熟,十五分鐘出5份公治,廿五分鐘做10份,真係唔想整,不過好肚餓,同埋有個幾萌的小蘿莉跟住鐵哥哥 唔知點解,嗰個蘿莉走過嚟問我整咩食


不理三七廿一,食d 三文治先
跟住班女仔叫我幫手整意粉
16人+有錢女細妹蘿莉+細佬正太+菲律賓姐姐
煮咗3包500gm意粉,太多了
足夠外賣店一個中午賣
仲要煮到淋哂

* * * * * *
題外話
我兼職的外賣店主打西式錫紙焗飯
焗飯,焗意粉,焗長通粉
配 豬 / 牛 / 雞
加 白汁,黑椒汁,吞拿魚汁,蒜蓉汁,洋蔥汁,肉醬,墨西哥辣汁u
再灑芝士,由落單到出餐平均5 - 15分鐘
* * * * * *
#null2017/03/07, 5:01:25 下午
引用快速引用
終於出文
#null2017/03/07, 5:02:00 下午
引用快速引用
話說回來

意粉太多同煮得太耐,吸水太多失敗
煎咗的豬扒牛扒,火太猛 失敗
豬扒牛扒煎過時,水份煎乾 失敗
打算用罐頭湯做醬汁 失敗中的失敗
好彩,仲有d雞扒未煎

賓妹姐姐見阿鐵整好公治請她食,
做嘢快手快腳,杯碟碗煲刀用完自己洗
洗得又快又乾淨
我想她亦好肚餓,她唔識斜片三文魚
我片咗d 三文魚比她同小蘿莉繼續做多幾份公治

再看看煮咗甚麼?
薯仔就拾咗,批咗皮,切成丁粒
有大有細,大的似薯角,
細的似手指尾指甲
薯仔粒太多,裝滿一個八人電飯煲

D 女同學見我做三文治的手勢,就O嘴
看我洗碗的功夫就知我勁
再見到我片三文魚的刀法,一個二個想掉低d野食想走
想走 無咁易,又係佢地話煮野食
煮到爛尾就想走

我叫她們撈沙律比客廳的人食住先
囡囡A :開唔到罐頭
我馬上擰兩罐大雜果比她們撈,
不用15秒就擰開咗
之前佢地煮野食,一面煮,一面自己食
唔比賓妹姐姐食,仲攪到嗰廚房垃垃亂
姐姐蹺埋對手唔幫佢地

囡囡B :唔夠沙律醬
唔係沙律醬唔夠,而係薯仔太多
我到出半煲薯仔+兩罐大雜果剛剛好
姐姐同小蘿莉好開心咁笑
囡囡C: 妳地整沙律呀!我出去問吓佢地想食咩野
(想閃,無咁易,她想出去看star war)
鐵:佢地無得揀,廚房有咩食咩
囡囡c : 咁整咩呀
鐵:仲有一大煲薯仔,做磨菇芝士焗煙肉薯蓉,廚柜有罐濕水菇,吊柜有鍚紙 cupcake 杯,雪柜有煙肉
小蘿莉嘩一聲,拿拿聲做好d 公治,過嚟幫佢家姐手

把薯仔倒在大沙律兜,叫囡囡C用裝飯膠羹把薯仔壓碎
我開定焗爐150℃,10分鐘內將煙肉切粒接著炒香
見她地未搞掂,醃定d 雞扒先,好在平時有問吓d c9同事醃料份量,
原來沒有秘密,生抽,老抽,糖,鹽,雞粉,胡椒粉
再看看d 意粉,全部意粉凍晒,
好!無咁淋,可以準備焗意粉

賓妹姐姐倒咗浸菇的水瀝乾,擺好 cupcake 杯 (原來有錢女個阿媽學做蛋糕,唔怪得d 嫁撐咁全齊)
不過囡囡c仲未掂,我加埋煙肉粒落薯仔,撈埋一齊,佢個妹幫佢手壓碎薯蓉,小蘿莉仲快手過家姐
撈好薯蓉,要先叮熱薯蓉才可勺入 cupcake 杯,(焗凍薯蓉會外熱芯凍) ,裝好薯蓉舖菇上面,撒芝士在頂,放入焗爐5--8分鐘 ok

個焗爐應該好貴,一隻10磅火雞都放得落,我可以一次過焗廿四杯薯蓉,爐內温度十分平均
十分鐘焗好晒,有食廚房先食
廳外聞到芝士煙肉味,走入嚟問係唔係有野食
囡囡c : 整好啦,我整嫁,我攞出嚟比你地食
#null2017/03/07, 5:03:47 下午
引用快速引用
囡囡C 攞咗d 薯蓉出去
囡囡A 和 囡囡B 的沙律又做好,我再將三文魚切片,打圈捲成玫瑰花狀做裝飾,她兩又急急腳拿出去
囡囡A/B : 我地整好咗d 沙律,試吓啱唔啱味

一個二個出晒去,我先見到囡囡D在工人房門口做芒果布丁,都成九點幾鐘仲攪咩布丁呀
囡囡D : 晏晝我顧住幫佢地煎豬扒牛扒,無時間做布甸,而家咁夜點整呀
鐵:唔好整布丁啦,開d 魚膠粉做果凍,d蛋用嚟做西多士
小蘿莉聽到做西多士,又嘩一聲走過嚟幫手

我叫囡囡D 將芒果片肉切粒,因為女仔怕酸,開多兩罐邊桃,明乎其實+甜,
話比她知要快手,雪唔夠時間就無得食
唔好用錫紙兜,晒時間,用cupcake 杯裝果凍會慳時間
果然見她快手咗好多
小蘿莉幫手切芒果邊桃,平時大人唔準她拿刀,
現在可以揸刀切生果,佢鬼死咁開心

菲律賓姐姐幫手漉意粉,意粉經過冷凍後,有翻d 彈性,
我在煎乾咗的豬扒牛扒中揀d 唔太硬的出嚟,做焗茄汁豬扒意 和 焗白汁牛扒意
個焗爐夠大,底面積有成張A3紙咁大
可惜醬汁要用罐頭湯,唉

今次要用罐頭湯做醬汁,先要開稀罐頭湯
跟住加生粉做茄汁和白汁
用原裝罐頭湯焗意粉,醬汁會好鯰,好漿糊
將d 湯開稀,然後加生粉
醬汁就會稠而不鯰
煮好漿汁,要焗意粉
好彩姐姐幫手漉意粉 把熱意粉放在鍚紙兜
拿剪肉較剪將豬扒牛扒剪到2cm 寬
囡囡D, 姐姐,小蘿莉見到我用較剪剪肉
瞪大眼 O晒嘴
真係小見多怪,咁做嘢先至快
豬扒放一盤意粉,牛扒放另一盤
番茄汁淋豬扒面上,忌廉白汁淋在牛扒面
在醬唔頂舖多層芝士就可以焗
因為意粉是熱的 豬扒牛扒比我叮熱的
番茄汁和忌廉白汁煮熱的
所以成盤意粉只需要焗10--15分鐘就搞掂
正確來講,只要焗融芝士有少時間焦就Ok


Good, 九點八囡囡D 和小蘿莉已經倒好果肉果凍
放入雪柜 希望一個鐘頭可以雪好啦
算啦,就算雪得唔夠實,應該可以食的

跟住教佢地三個做西多士
我就煎埋d 雞扒

真係發神經,
一個四人家庭加兩個賓妹(另一個賓妹放假)
居然有兩條30片裝切邊麵包
我問姐姐點解會有兩條麵包?
姐姐:Mon will use them for dessert tomorrow.
我用晒呀,點算好
姐姐:its ok. Order again tomorrow

好啦,繼續做西多士,搽花生醬,
把兩塊正方形的麵包對角切開成四塊
蛋唔好咁快蘸
要炸之前先至蘸

雞扒醃咗好耐,差不多一個鐘
開鑊煎雞扒,返工日日見老闆煎扒
偷咗師,係時候測試功力
#null2017/03/07, 5:05:53 下午
引用快速引用
要隻大平底鑊,問姐姐攞個鑊蓋
囡囡D 覺得好奇怪,問我點解要鑊蓋
煎扒想保持肉汁,鑊蓋必不可少
開猛火燒紅隻鑊,放5塊雞扒落去
塊雞扒一面有皮,一面無皮
一定要煎無皮嗰面先,
因為有皮嗰面好易癡底,收細火
一面煎到兩三成熟,反轉煎第二面
同時衿蓋,這樣水份不會流失
囡囡D : 哦,原來係咁,唔,下次我識了
跟住煎到全熟,食得

20分鐘煎好雞扒,有食蹺廚房先食
我食一塊,姐姐食一塊
囡囡D 食半塊,小蘿莉又係食半塊
好味道炸埋西多士,完場鳥

本來囡囡D 想做芒果布甸
打定蛋溝啫喱,
而家啫喱變果凍
蛋變西多,我唔想整西多,好麻煩
但是唔用d 蛋好浪費
咪開個油鑊比她們玩吓
搵個最厚的企身鑊
叫她們攞住個長夾
企開個鑊一步
蘸兩塊多士,慢慢炸
再蘸兩塊多士,慢慢炸
再蘸兩塊多士,慢慢炸

一路看實她們,
一路洗碗煲碟盤鑊刀
她們炸完我都差唔多洗完

叫囡囡D 開雪柜看看果凍點樣
食得,賣相好好
三個捧埋甜品出去
我洗埋d 野收工
出去看star war

同學甲:鐵,你屋企開西餐廳嫁?

同學乙:鐵,你煮野好好食

同學丙:你屋企間餐廳在那裡

同學甲:教我煮野食

同學丁:鐵,你屋企開餐廳嫁

同學茂:鐵,你在那裡學煮野食嫁,教我丫

同學丙:鐵,你屋企間餐廳叫咩名
同學茂:是唔是你老豆教你煮西餐
同學丁:你屋企開西餐廳嫁
同學 。。。。。。。。。。。
#null2017/03/07, 5:06:58 下午
引用快速引用
#null2017/03/07, 5:07:51 下午
引用快速引用
#null2017/03/07, 5:20:50 下午
引用快速引用
午飯市塲風起雲湧,瞬息萬變,分分鐘都係錢。
群雄林立,各霸一方,奇招盡出,目的只有一個-----
就是吸引街上各位腰纏皮包,手拿化粧袋的0L,
打開個錢包淘出銀兩,買個飯啦,唔該!

飯市的主要戰埸當然是商業區、遊客區,
D客官食得豪,又花得起錢,
食一餐晏等於我出50個飯盒
真係同人唔同命
不過咁!主戰塲早己被各大飲食集團大軍進駐,
少D財力、人力、物力,不能負擔。

在下阿王不才,財力、人力、物力都無
領有一支雜牌軍,在位處邊陲工廠區守住一檔外賣檔。




三年前,機緣巧合,左下頂了一檔在工廠區的外賣店。
這間外賣店有十幾歷史,我查過數每月平均四十幾萬生意,
舊老細將招牌店名、生財器具、舊員工一次賣斷,
他隻身就走。
我要保障員工的福利不變,
就係咁,左下就做咗老闆。

成間鋪十年八年都無大維修過,
不過我都唔打算裝修,
頭痛醫頭、腳痛醫腳算數,
牆身小部分,小部分崩的,
有D污濁鏟極都鏟唔走
都係個句算吧啦。


打住咁多先
#null2017/03/07, 5:27:26 下午
引用快速引用
秒後自動載入第2
下一頁
發表文章發起投票回覆
請先登入以發表回覆