保皇黨拉攏商戶，於民陣7.1遊行時段提供「騎呢」購物優惠「搶客」。有糖水舖老闆對保皇黨陰招「睇唔過眼」，決定以其人之道還治其人之身，凡當日持遊行照人士在晚上6時至9時內惠顧，可獲半價優惠。30歲老闆江先生斥建制派用錢收買人心，做法「核突」，籲商舖聯手向遊行人士提供優惠，抗衡保皇黨。

油麻地廟街「同記」糖水甜品專門店，上周貼出一張「7.1慶回歸，你精我都精」單張，表明7.1大遊行當日，「半價請你食甜品」。食客在當晚6至9時，只要持當日遊行照「幫襯」，便會享有糖水半價優惠，優惠包括堂食、外賣，售罄即止。
開業一年多的糖水舖，年僅30歲的江梓維是老闆之一。他不熱衷政治，未上過街、更從未在選舉中投票，但看到建制派以購物價惠「用錢撻人」，欲打擊7.1遊行人數，突然怒火中燒：「好明顯係想畀啲利益收買人心，達到政治目的。我覺得做法好核突。」
升級版「蛇齋餅糭」令他意難平，江梓維向拍檔建議向遊行人士提供優惠：「既然你遊行時提供優惠吖嘛，咁我就遊行完結時，向遊行人士提供優惠，其實呢件事係只係姿態，去抗衡呢班人，我相信唔會有人專登為咗我碗糖水去遊行；我只係覺得，如果覺得件事係啱嘅，咪去做囉。」

維護公義寧「蝕住做」
他坦言經營小店環境困難，每日生意額只是「打個和」，明白7.1若再提供半價優惠要「蝕住做」，但他更在乎是本身已不公平、不公義的香港，不應墮落至如內地般，一有利益便放下原則和尊嚴，寧去掃貨，不去遊行，呼籲其他商舖齊向遊行人士提供優惠。
倒梁呼聲熾熱，念社工出身的他也批評梁振英上場後，政府向相關團體輸送利益做法有增無減：「佢（梁）唔會認為自己有錯，佢施政唔係建基於想個社會公義、公平啲，唔係想幫弱勢社群，總之邊個順從佢嘅、邊個就有着數。」