雲海喺剛過去嘅周六至周一連發三篇文，講述節目《摩星嶺4號》喺未獲通知下被刪減內容嘅前因後果。之前雲海提到，佢喺6月10號、見到「903高層R先生」後，就決定請辭。不少網民都想知道，究竟兩人傾咗啲乜嘢，而令雲海有「劈炮」嘅決定。

周一(24號)，雲海於facebook寫道:「在此要寫一寫第三部份，因為想大家（尤其給我的真粉）相對全面些了解，當然不能把全部寫出，以下是個大約撮要，見諒!」

根據雲海個人描述，當時佢入到房，見到「903高層R先生」，一開始，R先生反過來不斷發難問佢:「你點解唔打電話問我呀？你點解唔打電話問我呀？你點解唔打電話問我呀？(指事後)你點解唔信我呀?你點解唔信我呀？我做乜要禁你嘢呀？我做乜要禁你嘢呀？我冇怪你噃!我冇怪你噃!.......」

雲海憶述，當時佢聽到「903高層R先生」咁講，都覺得好奇怪:「以上問題是不是由我問才對呢？離奇!之後R先生不斷說:『我有乜動機呀？我有乜動機呀？我有乜動機呀？』我都冇出聲，心想，動機有幾難，保住份工已經是最基本動機了。」

之後，雲海再憶述，R先生忽然爆咗句:「我幾時有禁過你嘢呀？只係早前有人叫我睇緊啲你嘅節目!」R先生並一再強調，一涉及商業機構，無論讚彈，都唔可以講，否則屬「公器私用」。雲海喺facebook中寫明，當時R先生「清楚表明若重新判斷，也必定把那約二十分鐘剪掉!」

至於「相熟DJ兼高層」，原來都有喺呢段對話中登場。雲海話，當時佢問R先生:「你知唔知,xx（）點話我節目呢?」R先生就答:「知!佢話你節目『無呢拿廢』嘛，佢同我講0架!」

R先生續表示，原來兩人之前仲開過會、討論《摩星嶺4號》嘅節目內容，但此事原來就連監製亦不知情。

雲海最後寫道:「當晚『相熟DJ兼高層』還致電我，其中一句難頂到:『你0依家係唔係唔俾人話得先!當你朋友先話你咋!』嘩!!!!!!!好寒!」

之不過，上述種種憶述，都係雲海一人片面之辭，究竟是真是假，是否完全反映事實，就要問問「相熟DJ兼高層」同「903高層R先生」至知。