http://www.am730.com.hk/article-183568

[#4b0082]嘟嘟嘟嘟……特別新聞報道，近年除咗有唔少雙非孕婦湧入香港，仲有好多另類族人湧現。呢個現象起源於香港文化、科技同社會嘅改變，好似根據非正式統計，每十個香港人，就有九個擁有至少一部智能手機，等車搭車行路食飯去廁所拍拖睇戲等任何時間都會拎住部手機篤篤篤，一個二個變晒低頭族。正所謂物以類聚、人以群分，其實不同族人各有特色同癖好，自己對號入座。以上新聞由am77合作社報道。[/#4b0082]

[#f00]1.窮到燶．月光族[/#f00]
最低工資已經實施咗幾年，點解每個月一出糧，戶口存款仍然唔識增長？呢類「月光族」人，到底犯咗咩錯誤，搞到個個月錢唔夠使，依家幫佢哋計一計「月光族」嘅支出。
孝敬父母 $3,500
還學費Loan $1,500
每月車費$40 x 22日 $880
早餐+午餐$80 x 22日 $1,760
周末消費$500 x 4日 $2,000
服裝消費 $1,000
請父母飲一餐早茶 $300
每月只剩餘$60的黃卓峯，為咗可以過夢想嘅豪使豪食生活，會將剩餘$60，買三張六合彩電腦飛博一博，所以除非中頭獎，佢先可以脫離「月光族」。


[#f00]2.做到懵．爆肝族[/#f00]
廣告都有賣，捱更抵夜好傷肝！返工OT做嘢，做到爆肝，大有人在，因為有「經濟及發展組織」調查顯示，2011年，香港人平均工時係一周47個鐘，計埋返工、放工車程時間，香港人平均每日工作10個鐘以上，屬於高危「爆肝族」。
好彩500年前嘅明朝，有個叫李時珍嘅中醫，一早預計未來嘅人一定做到爆肝，所以響佢本山草藥書《本草綱目》到，留低咗條護肝偏方「茶油，主治肝血虧損。」如果返工成日賴皮、夜晚多夢、記憶衰退，仲有睇嘢又矇，咁即係「肝血虛」，要三餐服用一湯匙野山茶油，詳情就問下自己個中醫。

[#f00]3.蠢蠢哋．草莓族[/#f00]
「草莓族」其實由台灣傳過嚟，呢族人真係似粒草莓——一身都酸，佢哋抗壓能力低、情緒穩定性低，非常自我中心，腍善個性俾人恰咗都唔知，所以又有人揶揄佢哋「布甸族」、「豆腐族」。香港「草莓族」名人之中，最出名嘅應該就係狼特首，佢同菲律賓佬響印尼埋枱講數，被人影到相響度傻笑外，之後賓佬仲過佢一戙，自行發布矮化香港嘅片段，搞到愛抱不平嘅黃秋生，忍唔住響Facebook嘲諷呢位草莓特首。

[#f00]4.掛住玩．低頭族[/#f00]
智能手機興起，人嘅溝通變咗「dup低頭」靠手指篤下篤下，尤其Candy Crush流行嗰排，媽咪唔再開口催家用，反而用WhatsApp嚟催攞「心心」；家姐細路更加唔再響屋企吵吵鬧鬧，淨係識望住部手機傻笑；搭地鐵再唔會有人同你eye contact；親戚朋友只靠send「公仔符號」嚟表達心情，咁嘅溝通模式，好適合文靜又內向嘅我。
不過做文靜嘅「低頭族」有樣痛苦，就係成日肩頸膊痛，所以我會去老婆至放心嗰間桑拿浴室揼骨鬆一鬆，每次趴喺床上，都會透過個床窿，回覆媽咪攞「心心」嘅要求，同按摩技師唔會講嘢，只靠手語話俾佢知邊度需要按摩，漸漸我發覺自己唔單只係「低頭族」，仲同聾啞人士冇乜分別！


[#f00]5.咬屋企．啃老族[/#f00]
以下問題10則： 是 不是
1) 長期處於雙失狀態？ □ □
2) 屬於自由意志思想，覺得時不我與？ □ □
3) 已成年，同父母共住，從未想過遷出？ □ □
4) 需要上班，但不會給家用？ □ □
5) 學歷非常高，為追求自由而不就業？ □ □
6) 學歷非常低，為追求自由而不就業？ □ □
7) 好工搵唔到；衰工唔想做？ □ □
8) 不滿父母未問清楚，就將你帶到人間？ □ □
9) 不會為兩老考慮未來，奉行「活在當下」？ □ □
10) 從未請過兩老飲茶，因為他們已經供你三餐溫飽？ □ □
以上任何一條問題只要答「是」，便屬於「啃老族」，你呢世人都好好運，投胎投到好人家，7分任性嘅你，可以八方逍遙，生活得肥肥白白，其實今生可以無悔。

[#f00]6.冇鬼用．尼特族[/#f00]
啲媽咪成日講話「讀書好，讀得書多有前途」，不過有啲青年人就「讀書讀到壞腦」，好工又怕做唔嚟，要體力勞動嘅工又自稱孱仔唔夠力，呢類普遍受過高等教育嘅人，響英國稱為NEET(全名Not in Employment，Education or Training)，海峽兩岸就稱為「尼特族」，香港就以「雙失青年」嚟形容，佢哋仲衰過嗰啲飛仔(飛仔都可以泊下車疏導交通、響夜場做保安大隊長，維持公共秩序)，每日嘅活動就係食、屙、瞓，簡直衰過「蝗蟲」！

[#f00]7.裙腳仔．媽寶族[/#f00]
雖然歌係咁唱「有媽的孩子像個寶」，不過到你有二、三十歲，又或者已經四十歲，仲成日黐住阿媽，搵工、職朋友，到起居飲食都仲要靠個老媽子鋪橋搭路，你已經係屬於「媽寶族」，首先當然要恭喜你，有個事事關心、而且仲有能力照顧你嘅媽媽，呢啲真係幾生修道修番嚟嘅福氣，先可以做到「裙腳仔」咁幸福，所以「媽寶族」記住要孝順auntie，望伯母壽與天齊，咁先可以照顧你一生一世。

[#f00]8.趕住潮．哈韓族[/#f00]
有冇發覺行到旺角，見到個個妹妹仔打扮到一式一樣(唔講仲以為搞緊street party有dress code添)，又或者Tommy扮G-dragon扮到跟足人哋個MV，嚟拍佢自己首《踩唔死我》，就知近呢幾年陣韓風吹得好勁！如果你曾經瘋狂追隨南韓潮流文化，由化妝、音樂、衣著、髮型都跟足，甚至學埋韓文方便自己睇韓劇、睇《Running Man》同刨書嘅話，只要你中咗以上所講嘅條件，都足以成為哈韓族。唔係話你咁樣唔好，但做人最好有番啲Personality啦，你搭車嗰陣見到坐你隔籬嗰個同你打扮一模一樣，你都尷尬啦係咪？

除左8之外幾乎中晒