我同你講：你伯爺撈世界撈到一半就拉左柴。宜家個場又分成三忽，益州又就快俾人掠埋，加下真係幾大鍋。好彩你老豆班o靚夠姜，劈起友黎唔要命，你估佢地為你啊？！俾面你老豆咋！所以唔好話我話你丫，係識諗個就的起心肝搞好個社團佢，咪搞到你老豆死都唔眼閉啊。唔好成日以為自己成隻狗咁，班契弟個個都睇你頭架，唔好俾面唔要面！

屋企同場口都係你地頭，邊條死鏟唔識做就打柒佢，千祈唔好就住就住。下面班o靚見到就無曬嘢講啦。好似喪郭啊、費爺啊、老董啊佢地都係你死鬼老豆D手足，得閒就同佢地斟下，無壞既。向寵條契弟雖然霎下霎下，但係死得佢又幾識撈，你死鬼老豆舊時都幾睇重佢架。有時間同佢飲下茶，有著數實會預埋你。知唔知點解先漢咁風生水起，就係因為班廢柴俾人斬曬！你死鬼老豆講翻起真係喪到頭都白曬。

唔怕同你講，你世伯我原先係南陽耕田嘎咋，個勢立立亂，好彩就話執翻條命仔，諗都無撚過出黎行。難得你死鬼老豆唔嫌我縮骨，日日黎痴飯食，問哩問路，你老味仲煩過伯爺婆，我頂佢唔順唯有出黎陪佢撈世界。後尾俾人踩場係我出去頂，俾大耳窿追數又係我出去頂，頂下頂下都成二十幾椂咯。

你個死鬼老豆知我有料，死唔斷氣都要交曬D生意俾我。日又捱夜又捱，又驚死撈得唔好你老豆半夜翻黎搵我，咪係五月份帶班o靚過大海，你老味果度毛都唔多條！宜家下好啦，南邊個場俾我地擺平左，班契弟又搵曬架撐，你好去劈友啦。邊個仆街唔死遠就斬開佢幾十椂，掟落鹹水海餵鯊魚，將我地個場攞曬翻黎。嗱，你死鬼老豆就交帶我咁多嘞，其他你去搵我之前講果幾條友喇。

世侄，我幫你劈埋今次友，撈唔掂你就捉我去祭旗。如果個場口唔夠旺，就去屌臭喪郭果幾條茂利。其餘你食自己啦！

我就走架啦，寫呢篇嘢真係寫到成殼眼淚鼻涕，都唔知寫緊乜，你自己執生。

摘自：人人粵韻[/size=2]