【 2025年6月13日 快必開往拔摩島的航程 - 第1741日】

TAMtakchi Fast Beat

https://m.youtube.com/watch?v=hAE1rGv3r9k

Jun 13
2025

收到快必寄來嘅信，係5月29號寫嘅，信嘅內容係咁嘅～

1)5月27號星期二，收到一疊信，又回一下大家五月份嘅來信。呢一封係五月份嘅第六封回信（但之前有兩封聽講去咗冥王星，返唔到落嚟地球）。每次寫信寄信，都會戰戰兢兢，擔心封信會唔會蕩失路，希望呢一封唔會啦。

~中同Shirley寄來一疊網上資料，仲有一封信講教宗，陳日君樞機返咗嚟啦，佢身體好嗎？記得上次佢去送完拉申格（即本篤十六世）之後返嚟，虛弱了，今次舟車勞頓返嚟之後，都要好好休息！每次諗起樞機，我都諗起落船之後要食佢嘅紅燒肉飲紅酒。樞機一定要健健康康，仲有唔夠兩年，日子每日都前進。

2)除咗中同Shirley之外，中同MK喺紐約寄來一張明信片，係格魯吉亞偉人嘅明信片，佢話係一間格魯吉亞嘅餐廳食飯添，喺香港格魯吉亞嘅紅酒我就飲過，但唔知有冇格魯吉亞餐廳呢？

~向山舉目： 5月8號嘅信我27號收到，你問我平凡人如何實踐到「牧人即羔羊」的道理？咪就係活在今日的香港囉，唔使做咩㗎，自自然然，你就會做到㗎啦。好似我哋咁之嘛，做正常嘅嘢，咪得囉，係咪？肩負香港，盡要盡嘅責任，就自然會是牧人和羔羊了。

~Teresa 5月8號嘅高登討論區封信，我27號收到。唔講真係唔知，大圍村被稱為小京都?!我個friend 阿D，以前都住喺大圍㗎，大圍村係唔係喺大圍㗎呢？你知啦，銅鑼灣山道唔係喺銅鑼灣嘅，所以我有此一問啫。銅鑼灣山道喺道風山，而道風山喺大圍沙田嘅，係唔係有啲混亂呢。

3)泡菜媽媽： 5月8號嘅信收到了，知道你收養咗貓家人，佢唔係寵物，係動物家人，係你屋企嘅天使同祝福，好好一齊生活啊！我五月都收到幾封忌廉嘅信！

~仲收到Fan嘅信同畫，去完日本唔想返屋企係正常嘅，多謝你嘅鼓勵：「盼望中喜樂，患難中忍耐，禱告要恆切」羅馬書和聖保羅是我2025年下半年在冤獄中的良伴，日子一啲都不難過。

~運河：多謝你寄笑話俾我，嗰個搞笑女主持評論侵侵好好笑，尤其係佢話彭斯見完方濟各，兩日之後瓜咗，真係笑死我！

4)小小：你話最近一年去歐洲參觀了科隆大教堂、米蘭大教堂、巴塞隆拿聖家教堂，你喜歡參觀教堂的話，我recommend你參加中大文化及宗教研究系同歷史系合辦嘅「中世紀高德式教堂之旅」，有神父帶隊參觀德國、法國同比利時嘅高德式教堂。查理曼大帝嘅八角教堂、香檳區教堂有牛雕塑，我係感謝啲牛抬材料幫手起教堂，比利時有間教堂有塊布，話係耶穌聖血云云，我當時見到諗起女性用品，女性嘅血都聖血吧！我問當時帶隊嘅神父：「你有冇嗰種聖血啊？冇啦，但你阿媽有，如果冇，就冇你啦！ 」嘩，激死個神父，how dare me ！

~Silver好嗎？梁婆婆好嗎？居日Girou好嗎？澳洲Helen好嗎？ 2025年過咗一半，向大家問好，尤其是所有長輩、長者，我特別為你哋祈禱呀！

5)五月份收音機有幾日接收得唔好，終於喺寫呢封信嘅時候，搞返掂有得聽。睇報紙見到話好多酒樓嘅點心，都係喺大陸預製，令到我忽然間好傷心！擔心落船去飲茶，去咗一間預製點心嘅酒樓，咁就慘了。唔知大家可唔可以話俾我知，有邊間酒樓茶居，係喺返自己廚房做點心㗎呢？有嘅話，我落船第一時間就會去！我記得堅尼地城有一間叫「新興食家」，唔知佢哋嘅點心係唔係自己做㗎呢？

~五月中喺船上嘅圖書館借咗一本食嘢嘅書睇，叫做「點點煮意」，係煮嘢食個煮，呢本書係講30道中式點心點樣整嘅，但唔係呢講去飲茶嗰種中式點心，我最like中式點心，包括蝦餃燒賣芋角棉花雞山竹牛肉腸粉鮮竹卷鴨腳扎叉燒包，但呢本書唔係講呢啲，而係講饅頭、菜肉包、茶果、芝麻酥餅、酒釀丸子同西米布甸呢一啲。

~本書介紹咗低筋同中筋麵粉做嘅包點、水餃之類。我以前喺屋企都會包上海雲吞，我落船之後，嗰晚我都想食自己包嘅菜肉雲吞，韭菜餃呢啲咁樣，韭菜比白菜簡單，唔使烚唔使揸乾水，但一定要加蝦米，同埋要用紹興酒浸幾分鐘喎。有一晚我聽收音機，有個上海婆話用紹興酒浸瑤柱，再蒸熟撕成絲，用嚟炒蛋，好正咁喎！呢味餸，我要記住出去炒俾老媽吃，佢鍾意食蛋，而且老人家要吸收多啲蛋白質。Silver同梁婆婆都要記住食多啲蛋。

~快必嘅回信嚟到呢一度。

6)呢個星期快必嘅郵箱都收到好多信同埋卡，包括：JanJan、可風、小月、兩送飯比快慢嘅信，阿生兩封信，台灣S Y Kwok嘅信同卡，陳姑娘、西南、璇璇都寄了Postcard，仲有由英國寄來署名S嘅朋友嘅信，多謝晒咁多位記掛住快必。

~快必話用掛號信寄入去俾佢嘅信，依家都收得好齊。不過如果未回覆到你嘅話，唔好氣餒。特別係寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。如果你仲未寫過信俾快必嘅話，就唔好怕羞唔好懶，嗱嗱臨拎起紙同筆，寫封信寄張卡俾佢啦，因為收到你哋嘅信同卡，對快必嚟講係好大嘅支持同鼓勵。有時間寫比慢必都好㗎，一樣可以寄去七姊妹郵箱。

~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！


來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）