【 2025年5月27日 快必開往拔摩島的航程 - 第1724日】

TAMtakchi Fast Beat

https://m.youtube.com/watch?v=svBzVnMCTUs

May 27
2025

//快必5月14號寄出嚟嘅信，同大家分享佢船上嘅生活同想法。//

1)成日都擔心，究竟我寫出嚟邊封信大家收到，邊封收唔到？你哋寄入嚟嘅信，邊封收到，我邊封收唔到。好似自從用咗掛號寄信寄入嚟俾我之後，收信嘅情況唔錯咁啦。

2)五月頭，搬房之後，而家比三幢Building包圍，內園景。好多個早上未夠五點，外面嘅雀仔已經嘈到拆天。依家，我終於明白，原來啲雀仔咁嘈，就係要叫個太陽出嚟，因為啲雀仔忍受唔到黑暗，佢哋要叫榮光來臨，佢哋要見到天色漸漸光，佢哋係咁嘈，我就醒咗啦，雖然個天仲未光。

~俾啲雀仔嘈醒咗，就瞓唔返，我會打開收音機聽主持人881余宜發佈「鄧麗君1982年新伊館演唱會」。1982年已經有新伊館咩？我好奇怪！唔知係唔係我老呢?! 我幾鍾意呢隻鄧麗君嘅演唱會嘅碟喎！有啲歌真係幾好聽：忘記他、你怎麼說、甜蜜蜜、如果沒有你、何日君再來……鄧麗君喺中港台泰都好吃得開，個presentation冧死啲佬，所以佢係有啲跑江湖味道嘅。

~1982年，我老竇病危中，我記得。

~而新伊館，真係1982年已經起好嘅咩？抑或係舊伊館呢？（補充資料：上網話新伊館係1980年啟用嘅。）新伊館的記憶，我仲停留喺2015年，即係10年前喇喎，星島辯論比賽呀嘛，我同毛哥坐喺觀眾席，向當時仲係政務司司長嗰條友示威，仲被控故意妨礙罪𠻹，嗰時係小事一樁，依家會唔會犯國安呢？

~調房之後，隔離吉咗，冇人住，走廊嘅風扇，可以調校吹正我房門口，天氣慢慢轉熱，我仲係開一度微風，已經好舒服，好爽！除咗下晝沖完涼洗完啲衫要吹乾，我先至開三度，天氣唔潮濕嘅日子，吹到五點晚飯嘅時候，啲衫已經乾啦，如果濕度勁高嘅話，就要晾到第二日，通常我會將啲衫放喺三角膠枱上面吹乾。

3)五月初商台舊同事同明哥嚟探我，佢哋不約而同着咗牛仔款式嘅恤衫，我好開心，因為呢排我諗緊落船嘅時候好唔好着牛仔褸。因為喺雜誌上見到木村拓哉着嘅Levi’s牛仔褸好靚，我啱啱睇最近呢期嘅日本雜誌，又有好多好靚嘅牛仔褸，但係落船嘅時候係四月，着牛仔褸會唔會太熱呢？呢個一直都係我呢排思考緊嘅嘢。

~朋友寄俾我有關於「台灣在野黨——即係國民黨，嗰啲騎呢嘢」好搞笑！講話乜嘢「大罷免」，國民黨朱立倫同民眾黨嘅黃國昌，被譽為「人老朱黃」好好笑！我仲喺度諗緊，落船之後要唔要去一趟台灣食一籠鼎泰豐小籠包呢？仲有豆漿同燒餅我都鍾意食㗎 ！到時台灣唔知乜嘢光景了！

4)四月睇完韓國詩人尹東柱嘅詩集「天空、風、星星和詩」，裏面有好多我喜歡嘅詩，唔知大家有冇讀詩呢？同講章一樣，有啲真話要用詩嘅語言先至可以寫出嚟。我打開尹東柱嘅詩集，頭兩首已經非常吸引我了，好有哲思，第一首「序詩」：直到死去的那一天/讓我仰望天空/心中沒有一絲愧疚/即使是樹葉上輕拂過的微風/也讓我心痛，我要以詠唱繁星的心懷/去愛正在死去的一切/也要走上指定給我的道路/今夜繁星/依然在風中閃耀

~詩人死的時候，其他的一切也死去，然而詩人仍然去「愛正在死去的一切」；詩人死去的時候「心中沒有一絲愧疚」，因為他正在走上「指定給我的道路」。尹東柱1945年28歲嘅時候，死喺日本嘅政治冤獄，呢一首「序詩」係1941年寫嘅，佢係喺1943年被日本警方逮捕，罪名係策劃獨立運動嘅思想犯。「獨立的人格，自由之思想」係陳寅格先生嘅名言，從來都係罪名，聖經說：那要得到生命的人，反而失去生命。

5)另一首感動我嘅叫「自畫像」。

~轉過山嵎，獨自尋找田邊偏僻的水井，靜靜地注視井裏。/井裏月色明亮，雲彩流動，天空鋪展開來，吹着蔚藍的風，井裏有秋天。/還有一個男人。不知為何，那個男人看起來令人厭惡，於是轉身離開。/轉身離去。不久再次思量，又覺得那男人可憐。折返回來注視，男人還在原地。/再次覺得那男人令人厭惡而轉身離開，轉身離去後再次思量，又懷念那個男人。/這裏月色明亮，雲彩流動，天空鋪展開來，吹着蔚藍的風，/井裏有秋天，還有一個如同回憶般的男人。

~河合隼雄嘅「影子現象學」，講嘅係水嘅倒影、鏡中影像以及背光嘅影子，都好似人心裏面嘅另外一個自己，或者係靈魂。詩，令我沉寂，令我空靈，令我與自己對話。

6)尹東柱嘅詩，有啲都有一啲童趣㗎：

~「蘋果」一顆紅色的蘋果/分給父親、母親/姊姊和我/從表皮到果籽/毫無遺漏地吃光

~「口袋」口袋/擔心着/沒有東西可放/到了冬天/塞滿我緊握的兩個拳頭

~「秋夜」陰雨綿綿的秋夜/赤裸着身子/從被褥中起身/站在簷廊的地板上/假裝沒事/唰 ——地尿了出來

~「沒有明天」幼小的心靈提問，因為總是問/明天、明天/有人說/當睡醒之後，黎明之時/那就是明天/尋找新的一天的我，睡了一覺/再次回想/發現那個時刻不是明天/意思今天/兄弟呀！朋友們！/怎麼會沒有明天/ ……

7)這首詩，令我想起了奧古斯丁的時間，沒有昨天的昨天和明天的明天，只有今天的昨天和今天的明天和今天的今天，是嗎？真的嗎？

~喺船上我都讀咗幾本詩集，而且仲想讀多啲添。谷川俊太郎嘅詩，瘂弦嘅詩…等我都寫啲詩先！船上有人問我落船之後打算做乜喎？我話「詩人、畫家，或者考懲教啦，未決定。」

8)大家如果有讀到啲乜嘢好嘅詩，又或者寫咗啲乜嘢好嘅詩，可以同快必分享喎！唔寫詩，寫信啦！當然寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。因為收到你哋嘅信同卡，對快必嚟講係好大嘅支持同鼓勵。

～如果你冇寫過信俾快必嘅話，嗱嗱臨拎張紙同攞支筆，唔好怕羞，唔好懶啦，寫封信同佢say hi啦，或者去書局買張靚靚嘅卡寄俾佢啦，佢仲有兩年捱啊！有時間寫比慢必都OK 㗎，一樣可以寄去七姊妹郵箱。

~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！


來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）