【 2025年5月9日 快必開往拔摩島的航程 - 第1706日】

TAMtakchi Fast Beat

https://m.youtube.com/watch?v=v2Dvf8cfyzM

May 9
2025

//收到快必4月24號寫嘅信，之前有兩封信，好似話彈返轉頭，所以遲來先上岸，我哋收到今日呢封信，睇住先啦。//

1)2025年復活節前收到一啲信，係三月尾同四月頭寄俾我嘅。台灣中同寄來3月25號嘅信，講咗一句：「活着，就是我一生剩下的唯一一件重要的事。」這是一句復活節宣言吧！感謝台灣中同不斷告訴我一啲AI嘅事，仲入咗本有關AI與政治哲學嘅書俾我，我schedule咗下半年會讀，實在太多書要睇！

~Fan: 收到你4月2號嘅信，外遊日本好玩嗎？係唔係撞口撞面都係講廣東話？好多香港人返鄉下？有冇去大阪博覽會呢？一定要睇櫻花啦！我講章經文當然同你教會一樣啦，我哋來自同一個傳統，用三代經題的，不是所有教會都按這個傳統。據說，盈姿每一面工作一面聽我嘅講章。

~Teresa：三月尾兩封信都收到啦，「混沌少年時」好多人講，我冇得睇，有朋友寫信介紹，有睇報紙介紹，感覺得一般啫，我反而鍾意首歌，Fragile, Sting 的，之前，我已經好like ！

2)瑞典小fans：收到你嘅Postcard，多謝你支持D100同男人老九，我同阿廠感情都有聯絡，佢哋冇因為我係政治反而遠離我、避開我，亦都冇因為我係目無法紀視法律如無物嘅市井之徒而疏遠我，也不介意我呢個要坐六、七年冤獄嘅人而鄙視我，係真正嘅好朋友呀！

~祈盼者：你4月4號寄來㗎Postcard，我復活節前收。你有去M+睇畢加索展覽咩？正唔正呢？呢排，我必加索冇乜畫畫，睇書多！我也願你平安，「願你們平安」是基督復活後向門徒顯現時說的話。兩年後我復活嘅時候，會向大家說什麼呢？相當期待？但有啲人好驚㗎！

3)向山舉目：收到你4月2號嘅信，「不要自我審查，也不必心存僥倖，懷着勇敢與創意，憑這四點留下來也沒有什麼不自在的！」我知道你一直用心回應我們的講章，魔鬼做的只能是試探，真的。我也不只喜歡讀思考的書，小說也很like，故事的書，活着，就是為了要說故事，馬奎斯說的。我們一同說故事吧！

~我好like你嗰個cap圖，好有故事啊！奴寵物嗰句說話，不應出自一個醫生嘅口：「如果你一年要用到一萬蚊上限，你都相當不幸！」嗰個有關於法國大革命，瑪利安東尼皇后嘅故事，大家可能有聽過？冇聽過嘅，等我話你知，有人同瑪利皇后講啲百姓冇麵包食，佢就好似奴寵物講嗰句一樣，話：「點解佢哋唔食brioche ?」就係呢句，佢被推上斷頭台啊！唔係暴政對人民寬容，係人民寬容暴政，同「何不食肉糜」呢種說話一樣，能夠令一個朝代終結，異曲同工，故事如此告訴我們的啊！

4)古仔：復活節前收到你三月尾嘅信。減肥增肌梗係好啦。而家係人見到我都話我「瘦晒」，正呀喂。我自戀到成日照鏡，鍾意見到自己嘅鎖骨同兩邊膊頭一粒凸起嘅骨，仲摸到胸骨、肋骨，夜晚瞓喺床上那盆骨！又會搽潤膚霜，摸吓自己瘦咗塊面嘅骨，兩眼窩嘅凹位同顴骨，再望吓自己嘅牙齒。朋友探我，話我啲牙好白，我自嘲話，因為日日正午烈日當空下踢毽，曬到個人黑晒變黑人，所以有一棚白牙囉！

~我如此仔細觀察自己，想像有一日，這副軀殼也會腐化，被燒融，只有牙和骨可以存放好耐，除非火化成灰，我睇書對眼、寫信嘅手、思考嘅腦，都會被腐化被燒焦而不再存在，這個想法不會令我變得犬儒消極，卻使我在思考腐化之後，人變得輕省、無懼。共勉。

5)快必嘅回信嚟到呢一度，如果未到你嘅話，俾多少少耐性啦，之前有兩封信彈返轉頭，嚟緊希望繼續暢順啦。呢個星期，寄信俾快必嘅朋友，包括：英國Michelle，阿May、阿生、Teresa、茂國、可風、向山舉目前後兩封信，仲有冇署名嘅朋友寄來一疊彩圖資料，內容有Osaka World Expo等等，以及Silver 俾快必同其他船員嘅postcard ，美國水桶、英國Natalie postcard，多謝晒咁多位嘅掛住快必！

6)你有冇寫過信同快必say hi啊？唔使怕羞，唔好懶啦，快啲拎起紙同筆，寫封信，或者去書局買張靚靚嘅卡寄俾快必啦，佢仲有兩年捱啊！有時間寫比慢必都OK 㗎，一樣可以寄去七姊妹郵箱。

～寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。因為收到你哋嘅信同卡，對快必嚟講係好大嘅支持同鼓勵。

~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！


來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）