新加坡廣泛用香港語嘅考慮

黃世澤澤論四方
2025年4月26日

martin oei

https://m.youtube.com/watch?v=8eB4J4lvzC0

Apr 26
2025

#Cantonese
#粵語
#新加坡
#新加坡 #華語 #香港語

近日留意新加坡政壇，除咗黃循財上任做總理首個大選外，仲有一件事好值得注意，就係新加坡政界廣泛使用香港語，由前進黨同人民行動黨國會針鋒相對，到群眾大會連工人黨都用香港語。講華語運動有可能漸成過去，相反，英聯邦國家通用香港語，有可能成為南洋各族可以共同接受語言之一，取代華語嘅地位。

香港語 嘅中立性

首先，喺南洋，任何語文被視作通用語言，必須唔會造成偏袒某一特定族群嘅效果，英語之所以成為新加坡實質官方語言，因為英文係外人帶入嚟，反而唔會偏向印度、馬來或華裔族群。同樣，華語被選為作為華裔通用語言，除咗多人識華語外，因為未有大量中國北方移民湧入前，華語喺福建、海南、潮州、廣東四個族群中係中立，所以李光耀嘅講華語政策，有佢嘅政治考慮。對多族群國家，語言必須具中立性，否則係好易搞出問題。

問題在於，自大量中國移民南嚟後，新加坡嘅中國移民，本身就係衝突嘅來源，所以為咗新加坡嘅長治久安，一個超越族群，連華裔以外族群都樂於接受，發展上亦唔受中國影響嘅漢字語言，對新加坡未來穩定變得必不可少。

香港語 得到考慮，因為香港語喺過去幾十年發展後，本身係跨族群，唔少非華裔人士都樂於使用香港語，而由於大量香港海外移民，而佢哋同中國勢成水火，香港語嘅發展唔會太受中國影響，相反，有可能慢慢喺英國、加拿大、澳洲呢啲英聯邦國家政府介入後，香港語嘅發展唔受中國主導同影響，對於中國同西方日益惡化，新加坡華文發展受到中國影響，呢個一定會有問題。所以，突然新加坡朝野都係咁講香港語，唔係發神經之舉。

BNO Visa嘅出現，事實上有佢深遠影響，因為香港語可以書寫，而且香港依家無咗國家，反而係可以國家政權中立咁存在，至少喺英語國家，香港語作為佢哋嘅表意體系文字語言代表變得可行。而且擺脫中國影響，亦有實際需要。漢字體系自行造字係遠唔及拼音體系文字嘅彈，至少唔可能學奧地利咁喺特定用字上自創一套，或好似瑞士咁將法文用字直接滲入德文之中，以保持同德國之間嘅分別。所以喺使用標準，文化內容上都可以擺脫中國影響嘅香港語，再加上BNO Visa以及二零一九年大革命令香港語人口大量向英、加等國移民，堅持使用華語，連我呢個南洋人都認為並無道理可言。

另一方面，中國有可能喺呢次習近平搞出嚟嘅中國經濟崩潰中永久分裂，當中國永久分裂後，華語呢種語言，有可能只係流通中國北方，而且戰爭打到亂七八糟嘅地方，其他新國家，都會為便於推廣佢哋本身民族主義，逐步停用華語。特別就發音而言，華語與中國其他地區語言嘅距離，猶如在幾十萬光年遠外太空一樣。

呢一代人，或者仍然有人有需要講華語，或學習華語，但去到我哋嘅下一代，華語可能係無必要，相反，未來香港語有可能扮演一個英聯邦國家嘅橋樑，甚至係代表西方嘅表意體系語文。依家睇台灣搞完現有嘅政治紛擾後，點樣會發展佢哋嘅台語。但台語書寫，以及跨種族接受度上，仍然要有好多功夫需要跟進，發展到呢類似香港語咁嘅地位，時間仍然係相當遠和早。
#粵語 #Cantonese #Singapore #Language #評論 #4K #黃世澤
https://martinoei.com/