第一次寫故同發帖
可能1999
支持膠登


七一早晨既翠華，係一家大小既聚集地。

踏進此時既翠華，熱鬧之餘帶點憂鬱。熱鬧係因為有唔少年輕家庭既小孩係度喧嘩，憂鬱係唔少家長經已被689逼到今日晏就上街。而我，係呢個星期一既早晨，不惜朝早七點半由屯門搭車去銅鑼灣，為既只係同James屋企人係翠華食早餐。

「早晨,世伯伯母哥哥姐姐。」James有一個阿哥一個家姐，佢阿哥家姐早已經成家立室,所以James阿嫂同姐夫都係度。（當然我唔係為左慳皮先用哥哥姐姐四字一次過同佢地打招呼。）

我依舊坐係James隔離。

好快大家落左order，James屋企人開始傾下D三姑六婆既野。（他有太多親友，雖然我有幸見過幾次面，可惜始終人數太多不能盡記。）所以當世伯伯母哥哥姐姐s由親孫外孫上幼稚園不知不覺傾到三姨丈林早逝過左身，我知道我已經Follow唔到話題，雖然我一路努力做一個聽眾。

呢個時候我只好將注意力放返James身上。而我不知道佢幾時已經拎住部iphone,玩緊佢隻puzzle and dragon。於是我繼續保持沈默，內心嘆左一口氣。

好快D野食到齊。食住自己個碗火腿通，我既沈默顯得更加自然。

「Ivan你約左陳生幾點？」伯母突然問James既哥哥。

哥哥：「大概十一點度，我地食完早餐過去太古城個邊搵佢都差唔多。」

世伯：「今日睇埋太古城個邊D樓就差唔多啦，係就今日決定左佢。」

姐姐：「係啊！今日兩點到五點簽訂仲可以免佣添！」

佢地討論得慶高彩烈，我依然低頭食我既火腿通。因為就算我知道佢地，包括世伯伯母哥哥姐姐（每對夫婦）都有自己層樓，而買樓係俾James結婚用既機會係有幾大，而我內心有幾咁竊喜，我都知呢個唔係我可以主動參與既話題。

所以就算我食完火腿通，都要繼續食件係我眼中多餘既牛油多士。

當佢地差唔多傾完，而我杯奶茶都飲晒咁噤，James同我講：「Shrina,對唔住，一陣陪唔到你，我陣間有野做。」

聰明如我，即刻答：「唔緊要，反正我都諗住陣間去遊行。」當然我唔會同佢講係同膠登班絲巴打一齊去。

James好唔捨得我咁講:「咁你小心D。」

世伯伯母埋左單，我多謝左佢地餐早餐之後，佢地就上左James同佢哥哥架車走，而我，已經唔需要再開Google map, 自己一個行去時代廣場。無計，遊行兩點先開始，依家只不過係十點半，我唯有去行陣街先。

係呢一刻，我唔怪James,因為一早有絲打經歷過男朋友買樓既思維陷阱。呢刻我好多謝佢既Post為我打左支預防針。

同時，我更加明白，就算James有幾愛我，佢有雞脾食唔代表我都有，正如惜日佢用開既Nokia都已經換左做iPhone5，十年前上高登依家都變左上膠登……