【 快必文字獄：還押日誌 ～ 3 / 22 / 2022～ 第560日】

https://m.youtube.com/watch?v=VcpGKG-bfyg

Mar 22
2022

TAMtakchi Fast Beat
2.3K subscribers

//疫情下生活如常，好似同植物人一樣；
快必難忘長洲cold brew 黑咖啡，甘甜濃輕；
天地不仁，雖然dying ，都要die得有型//

1）今日係懲教署禁止親友探訪嘅第46日，亦都係恢復皇恩浩蕩式嘅探訪倒數兩日，冇錯，未來一個月有兩次探訪，係唔係好菩薩心腸慈悲為懷呢?! 尋日考第一話放寬社交距離限制，又開返gym又盛，希望懲教署繼續慈悲為懷，船員可以好快每日都有得探訪，兼且有得放風做運動啦；不過，到嗰陣時，快必都已經係轉咗啡衫㗎喇，每日探訪冇佢份了；

2）今日C福利官中午前已經打電話俾快必屋企人，同佢講口訊，快必話自己生活一切正常，但係喺船上正常嘅生活其實一啲都唔正常，快必話好似同植物人一齊生活一樣；每日三餐，就係驚喜嘅來源，尋晚食西檸軟雞，酸酸甜甜，幾開胃，不過快必嫌啲汁太少喎；今朝早餐就找素，榨菜素肉丸公仔麵，不過不失，好彩有杯央走沖喜吓；

3)快必喺船上除咗睇書、寫信之外，都會畫吓畫，佢嘅木顏色筆，已經用咗差唔多一年啦，都用得7788啦，最近佢寄俾家人嘅一張小小嘅問候卡，淨係畫咗幾條草咋，家人今日托福利官提醒快必，係時候申請木顏色筆了；

4）快必又繼續回覆大家嘅來信，可能暫時未到你，不過唔好嬲，俾啲耐性啦。

//我想喺度回覆一下，因為有朋友問我：「為何公義之神會容許地上不公義之事？」這是典型的神義論問題，我打算喺往後嘅日子，慢慢寫一啲文章，討論一下。最慘係我手上嘅書非常有限，唔似我屋企嘅書架，又唔能夠返去中大圖書館搵資料，更加唔好講話用電話、電腦上網搵資料囉，所以我嘅回應可能唔夠紮實，隨口噏，大家唔好太認真。

「為何公義之神會容許地上不公義之事？」其實，可以係冇乜好答，係咁㗎啦，一係你揀另一條路，做人渣，我當做人渣一定萬事亨通，咁你咪去做人渣囉，你會唔會呢？道家有言：「天地不仁」但我又唔會太犬儒，這是我有型之處，although I am dying ，都要die得有型；

我讀大家嘅來信，神同好、中同好、世界各地朋友嘅信都好，依家一兩個月寄到手上一啲都唔出奇，當年耶穌會嘅會祖聖依納爵寫信比方濟各，方濟各回信俾聖依納爵，來回都要兩年，方濟各最後一封回信，到聖依納爵手上嘅時候，佢甚至已經返咗去上主嗰邊，那是500年前的事了，你們以為今日比500年前進步嗎？你們以為今日的人性比500年前更善良嗎？滄海一聲笑，飲多杯吧！//

～荃灣姨姨：你1月12號嘅信，我三月頭先至收到，我最鍾意嘅咖啡係flat white，我唔鍾意太多泡同奶嘅咖啡，最深刻、最有印象嘅一次咖啡，係一位朋友整嘅cold brew 黑咖啡，甘甜濃輕，點樣濃得來又輕呢？至今難忘，嗰日下午我同一班好友喺長洲BBQ，不會忘記的事是永遠不會忘記的，要記得忘記，我才會記不起的；所以，暴政都是低能的，以為拆掉痕跡，就會天下太平；

～May Kong：二月頭寄嚟嘅清華大學教授勞東燕，佢慨嘆中國好多人喪失自由，仍怡然自得，其實咁樣都係回應咗劉曉波講嘅：要改變人民，政權才會改變，你同意嗎？

～一位署名喜歡塗塗畫畫的退休人士：多謝你嘅來信，信紙上自己畫咗五顏六色嘅四方小格，睇起上嚟好似PCCW嘅logo，有時間再畫多啲唔同嘅畫/logo俾我啦，多謝晒；

～老番：三月頭收到你二月頭嘅來信，之前都收過你幾封，有一封你講墨西哥郵局嘅故事。你提到嗰套紀錄片，全世界除咗香港，好多地方都有得睇，我哋真係同大國接軌了。早排睇咗一本書，被吹捧得好勁嘅「三體」，一般啫，我覺得係賣弄科普，人物又冇特式，我只愛中間講文革嗰段，不過睇文革啲故仔咪得囉，頂！

Angel Angel：多謝你又代我女兒忌廉來信，仲有一啲對話，當中提到以前人力嘅一堆古人，如果鍾意睇古人，我會睇「史記」、「資治通鑒」同唐詩宋詞300首，嗰啲古人，俱往矣；而我，也退出人民力量了（大家可以參考返呢條link https://www.facebook.com/767067873371... (https://www.facebook.com/767067873371...))

6）呢兩日快必嘅郵箱亦都收到好多嘅信，包括Koyuki ，朗生，用My Melody信封簽名好了草嘅朋友，好多信紙唔捨得丟嘅靚女，簽名好似係S.K. Kwok 叫快必見字坐直飲水 ，仲有Rebecca，銀髮婆婆，快必神師Dr Kung，芝加哥嘅Lolita，英國嘅壽司之神，第一次寫比快必嘅南極熊，兩送飯寄咗兩封信，最後仲有向山舉目嘅信同網上彩色圖輯，有四封咁多，可以攞勤工獎！總之，多謝咁多位嘅心意，已經轉寄入去比快必，希望佢盡快收到啦；

7）疫情之下，大家冇乜細藝嘅話，請多啲寫信俾快必，你哋嘅信，對佢係好大嘅鼓勵和支持。如果仲用埋啲色彩繽紛有卡通嘅信紙，快必仲會更加happy 呀；但提醒一下大家，唔好有貼紙、閃粉或者3D突出嗰種，懲教署唔俾㗎 ；

來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）

8）最後，繼續宣傳一下快必嘅Patreon ，希望得到大家點點滴滴嘅支持，應付漫長嘅訴訟。仲有，你哋訂閱subscribe 咗快必嘅YouTube Channel未啊？https://www.youtube.com/c/takchiTamFa...
記得C L S呀！即係comment留言、like點讚同埋分享share，拜託晒！

唔好唔記得仲有赤柱嘅斯叔，佢嘅Patreon 都需要你哋支持㗎，多謝晒。