HKGalden時事臺
發表文章發起投票回覆
【快必文字獄:還押日誌 ~ 9 / 26 / 21 ~ 第383日】
【快必文字獄:還押日誌 ~ 9 / 26 / 21 ~ 第383日】
https://m.youtube.com/watch?v=nU78hH2OO2M

People Power Sep 26, 2021

//支聯會通過解散,意料之內
小西泰被DQ,快必欣賞「處之泰哥」//

1)今日係d100同事,亦都係被DQ嘅小西灣區議員泰哥,(快必暱稱佢做小西泰),同埋大班其中一個俏嬌娃ta姐一齊去探訪快必。今日係星期日,佢哋8:30去到登記,場面都相當墟冚,但啱啱趕得切第一批入去探訪等候室,過程好暢順, 9:20已經聽到叫Number,越多人越快趣咁喎;

2)今日快必係喺2號窗,有朋友問,點解日日都要記錄佢係邊個窗口呢?其實就好似寫日記咁:2021年9月26日天晴,作用一樣啫。佢哋兩個企喺門口排隊入去探訪室嘅時候,望入去已經見到快必企咗喺窗口同佢哋揮手,坐低之後,電話仲未開聲,快必已經古靈精怪咁做好多動作同佢地打招呼,計時器一開始電話駁通之後,兩個麻甩佬,先用粗口互相問候一番;

3)做得D100 ,當然對時事非常關注,佢哋首先就梗係講吓支聯會啦,快必話雖然彤彤夠硬正,四個坐緊嘅常委亦都好有擔當,但係依家暴政乜嘢都打橫嚟,佢哋幾個身陷牢獄,喺外邊大監牢嘅會員,對逼迫嘅恐懼同怯懦,係可以理解嘅,所以快必話一早都估到會通過解散,係唏噓係無奈;(華叔知道可能會彈返起身添呀!)

4)講開支聯會,快必話非常欣賞黎恩灝上兩星期寫嘅一篇文章「告別之聯會 兼駁周永新」,直斥周永新如何混洧視聽、扭曲事實,非常精彩。快必對於老而不周永新非常氣憤,佢本身都係比政權過橋抽板嘅受害者,但仍然不知悔改,做暴政喉舌,香港嘅墮落,佢都係共犯!快必仲話喺而家呢一個黑暗嘅時代,特別係「法」嘅黑暗,佢覺得有兩個人反應得最合宜,一個係已經身陷囹圄嘅彤彤鄒幸彤,另一個就係冇得再喺明報寫專欄嘅Eric黎恩灝;

5)港島區區議員係第一批要去宣誓嘅,民主派或者非建制派嘅區議員,選擇留任同繼續宣誓,各有原因。雖然佢哋去咗宣誓,但個政府話唔信你,話你係作出虛假宣誓、覺得你係違反誓言喎,咁就DQ得,仲話要「依法」承擔法律責任⋯⋯所以快必亦都好關心小西泰被DQ之後,會有啲乜嘢手尾跟?泰哥就話自己處之泰然,如果真係要拉要告,佢都唔會認罪認錯,已經有坐監嘅心理準備,最多咪入嚟陪快必囉,係鐵窗之下一兩年,就當係還返俾好多犧牲咗嘅香港人囉;

6)快必欣賞小西泰咁豁達,預咗會坐監嘅犧牲精神,呢啲咪就叫做「處之泰哥」囉!快必鼓勵香港人,一定要唔好驚,大家凝聚嘅力量,基督係為眾人而死,快必嘅想法係人人都冇做好本份、守好自己,所以基督咪因為眾人而死囉,但佢相信香港人係唔會離棄呢班民主派鬥士㗎,喺有需要嘅時候,香港人一定會守好自己,站出來嘅;

7)快必話收到五顏六色心意卡一疊,相信係之前健康講座街站收集嘅,多謝大家仍然冇忘記佢!

~高小姐:知道你係d100支持者,請繼續支持d100 行公義好憐憫講真話;

~有位冇下款嘅朋友話:「而家情況好壞,但冇暴政可以永恆。」但我想講「而家情況不是最壞」,都未去到阿富汗塔利班恢復處決及截肢刑罰,呢啲先叫好壞!

~另外有鄺生、Ivy Yim同好多朋友一樣,叫我加油,收到了!我一個人加油係冇用嘅,大家都要加油,齊上齊落,才不會孤單;

~二小姐:你話不會忘記、會堅持,年尾垃圾會『記得投票』呀!千其唔好投白票呀!好似澳門咁咪幾好囉,香港一定唔可以輸比澳門!

~自己友大嚿:多謝你堅持,冇錯,老土啲講堅持先至見到希望,多謝所有真正堅持嘅人;

~ Kitty:你嘅心意卡我覺得最窩心係最後四個字:主恩常在,我也祝福大家「以馬內利」,神與人同在,好快就到聖誕節,大家準備好未?

8)泰哥同快必兩個麻甩佬雞啄唔斷,搞到ta姐都插唔到嘴添,不過佢好有心,買咗朱古力同豬肉乾比快必做手信,得短短15分鐘,好多說話都講唔晒,臨走嘅時候ta姐更加係依依不捨,佢同泰哥都拍着塑膠玻璃同快必道別,快必亦都笑住咁送上心心俾ta 姐;

9)雖然已經超過一年,相信大家仍然都有記掛住快必,有時間嘅話,就的起心肝攞支筆拎張紙寫封信比佢啦,同佢分享一下所見所聞所想,來信請寄去人民力量會址:九龍灣宏光道7號興力工業中心619室,大家想寫比斯叔嘅話,亦都可以寄去以上地址。

10)除咗35+案,快必仲孭住14條文字獄嘅控罪,佢喺「開往拔摩島的輪船上」超過一年,訴訟之旅長路漫漫,需要大家點點滴滴嘅支持,所以請subscribe 快必嘅Patreon ,並且多啲share出去。大家唔好唔記得仲有喺赤柱嘅斯叔呀,佢嘅Patreon 都需要你哋嘅支持㗎,多謝晒。
Good0Bad0
2021/09/27, 2:26:43 下午
引用快速引用
本貼文共有 0 個回覆
發表文章發起投票回覆
請先登入以發表回覆