HKGalden時事臺
發表文章發起投票回覆
People Power 人民力量
People Power 人民力量

https://m.youtube.com/c/PeoplePower
Good0Bad0
2021/09/21, 8:31:21 早上
引用快速引用
本貼文共有 1 個回覆
#動物崇拜

【快必文字獄:還押日誌 ~ 9 / 20 / 21 ~ 第377日】
https://m.youtube.com/watch?v=3I1xQnW9g24

//眾樂教會動物崇拜,忌廉領聖體
團體逐個受打壓,記協撑住//

1)今日係快必嘅神學院同學大衛牧師同神同CK結伴去荔枝角探訪佢,兩位神同今日大概9:55到達登記,諗住星期一唔係好多人,但原來又坐滿晒喎,15分鐘左右就可以入探訪等候室,大概等咗半個鐘左右聽到叫Number,都唔算等得太耐嘅;

2)快必今日又係喺1號窗,所以又可以企定定望出門外,迎接佢哋兩個。快必見到佢哋兩個已經笑晒咁,計時器一開始,佢就急不及待表演棟篤笑,㩒住心口上面自己個名,話唔俾佢哋睇到,佢哋問點解?快必就笑住話睇戲係咁樣㗎嘛,驚有江湖追殺令喎!佢哋真係唔知快必搞邊科;

3)大衛牧師其實都係slasher,除咗係牧師之外,佢都係電影人,快必話喺船上冇得睇電影,之前一路叫大衛牧師幫佢搵一本介紹乜嘢100齣電影之類嘅書比佢,大衛牧師走遍各大小書店電影中心,都搵唔到,最後就買咗「當代電影的好視野手册」,今日入俾佢。呢一本書原本係法國作品,除咗講電影理論,亦都介紹一啲經典嘅電影,仲有大量彩色圖片,鏡頭下裸露血腥都有㗎喎,唔知最後會唔會可以送到快必手上呢?

4)快必亦都好關心神同CK嘅近況,神同CK呢排趕緊博士論文,真係比較忙,不過佢好有心,趁中秋節前夕,偷得浮生,特登放下工作去荔枝角探快必,快必都鼓勵佢專心寫好篇論文,到時就可以改名叫神博CK了;快必話自己預咗泊正判幾年嘅話,都會想搵啲嘢讀吓,佢話未必揀神學,想學國畫,不過又未必有得學,佢話都係唔諗咁多住,到時再算啦;

5)快必同大衛牧師成立咗路小教會,之前佢又有同卜牧師創立眾樂教會,兩間教會都係選擇走艱難嘅窄路、關顧弱勢嘅人。大衛牧師同快必講嚟緊10月2號會去眾樂教會嘅「#動物崇拜」講道。快必聽到都好開心,諗起之前佢都多次去過眾樂教會講道,而每次動物崇拜都會帶埋忌廉去添,忌廉會好乖咁坐低聽道,當領聖體嘅時候,佢仲好醒目咁識得排隊等食聖餐。

喺呢度幫基督眾樂教會 #動物崇拜 賣下廣告先:
日期: 10月2日
時間:晚上六時
地點係借用位於佐敦道4號嘅九龍佑寧堂
歡迎大家帶埋動物一齊參加崇拜

6)佢哋三個都傾到呢排陸續有團體受到打壓,支聯會、612、石牆花、記協⋯⋯咁樣搞落去,會唔會搞到天主教或者基督教會呢?遲啲會唔會好似大陸咁拆十字架呢?又或者喺教堂只准擺習近平嘅雕像?快必對於謹守專業、據理力爭嘅記協主席陳朗昇表示讚賞,希望各位可以繼續撐住,捍衛新聞自由,不輕言解散;

7)快必唔係日日收到信,通常儲埋一堆,上星期就收到好多信,有啲係八月中有啲八月頭寄嘅都有。快必話啱啱睇完東野圭吾嘅「祈念之樹」,佢就話自己都係一棵神樹,多啲人寫信比佢,佢就回應多啲,不過,如果未覆到你,請唔好見怪。

~Angel Angel:感謝你用忌廉嘅名寫信比我,對我來講係莫大嘅鼓勵,喺留言上同其他人聯繫,一個一個連結起來,就好似教會一樣,將有理念相同嘅人連結,一齊恥笑暴政;

~由香港流氓到英國嘅Helen Wong:我九月中先至收到你八月中嘅信,有啲時差,感謝你send嚟嘅Beatles 嘅”Let it be”,我曾經聽過一對樂隊Capo,唱歌廣東話版,叫「由得佢」,你去搵下吖!

~詩蓓:嘩,詩蓓你居然寫信比我?係八月頭嘅信,依家先收到,多謝你呀,你係唔係香港女飛魚?定係…「倪」?any肥,我好鍾意「詩」和「蓓」呢兩個字㗎;

~壽司之神:睇完C AllStar再睇方皓玟,真係羨慕死人,兩個演出者都係我嘅朋友,我由佢哋第一隻碟支持到而家,只係我平時好少談及本地音樂,因為我崇古典、崇爵士,哈哈,古典同爵士樂,咪即崇洋囉;


8)大家有時間嘅話請多啲寫信比快必啦,話俾佢知你哋嘅所見所聞所想,做個筆友吖嘛,你哋嘅信,對快必有好大嘅鼓勵㗎。來信請寄到:九龍灣宏光道7號興力工業中心619室,如果想寄傑斯都得㗎!

9)快必喺「開往拔摩島的輪船上」超過一年,呢躺航程漫長而遙遠,加上訴訟之旅風高浪急,所以非常需要大家嘅支持,希望你哋可以subscribe 佢嘅Patreon ,並且多啲share出去。大家唔好唔記得仲有喺赤柱嘅斯叔呀,佢嘅Patreon 都需要你哋嘅支持㗎,多謝晒。
#12021/09/21, 8:34:16 早上
引用快速引用
發表文章發起投票回覆
請先登入以發表回覆