【快必文字獄：還押日誌 ～ 9 / 8 / 21 ～ 第365日】
https://m.youtube.com/watch?v=QN9okWAGGmQ

People Power
Sep 8, 2021

//還押365日即係一年
快必相信彤彤等4人堅定//

1）相信大家都知道今日一早，支聯會嘅副主席彤彤鄒幸彤以及常委梁錦威、鄧岳君、陳多偉被上門拘捕。快必今朝聽新聞，已經知道消息，覺得佢哋幾位雖然受到拘捕威脅，仍然慷慨就義，值得尊敬，令人動容。快必先兩日講：清晨上門拘捕已經變成常態，擔心嘅「不幸彤」亦都「不幸」言中，快必相信佢哋意志堅定，會撑住！

2）今日係快必坐上 「開往拔摩島的輪船」嘅第365日，即係整整一年了，今日係佢至親家人探訪。9:45到達登記，15分鐘左右先至入得去探訪等候室，半個鐘頭左右就聽到叫Number，今日快必係喺3號窗；

3）家人話快必今日精神好好，已經喺窗口位企定起身，好雀躍咁等家人入去，拎起個電話，計時器一起跳，就立即向家人大展歌喉，唱陳慧琳嘅「紀念日」～
//平淡之中找一些特別日期
憑藉特別日期更加的想你//
佢話用呢首歌去紀念呢365日嘅冤獄，每年都可能要唱一次，唔知要唱幾多年？

4）佢同家人講，本來約咗彤彤去荔枝角探佢，而家唔知仲有冇機會呢？因為「唔俾保釋」已經係趨勢，如果真係咁樣，可能要家人代快必去探佢喇，佢話到時一定要買幾包M&M朱古力俾佢喎；(哈哈，自己食又得，收𡃁用又得)

5）快必話佢會寫篇講章，馬太福音8章31-38節去讚揚彤彤大狀，佢特別對佢彤彤其中一番嘅言論，印象深刻， 10分欣賞，好有同感：
「點解要我用限制言論自由，嚟交換人身自由？咁樣嘅自由唔係自由，我拒絕。就算我喺入面坐緊，我都依然有我嘅言論自由，點解我出到嚟反而冇？同埋我覺得唔啱，保釋唔應該攞呢啲嘢嚟交換，你係未畀人定罪，咁點解要限制我，唔畀我講嘢？」

6）林奠與鈍炳兩個開口埋口都係「法」、「法」、「法」，它們講嘅、執行嘅都只是「非法」之「法」，因為「道可道，非常道」，法法法是非法，「非」法之「非」不死，世間沒有公義。最後一句老子「大道廢，有仁義」，聖人之治無法維持而道德淪喪時，才會有仁義等親民之施出現，作為補救；

7）整整一年零兩日未見過忌廉，快必當然10分掛念佢啦，家人之前入咗一本相簿，今日又入咗一疊忌廉嘅靚相俾佢，等佢可以放喺相簿度，得閒就攞出嚟睇吓；家人話忌廉呢排都好乖，同忌廉有13、14年嘅緣份，已經係唔簡單㗎喇；

8)快必又回覆一下朋友嘅來信，如果未到你嘅話，俾多少少耐性，多多包涵：

～芝加哥朋友Lolita: 嘩，你竟然將自己喺後院中嘅南瓜葉同紫蘇葉印落信紙上面，再用木顏色一筆一筆咁掃上去，好靚，真係好靚！你上次寄來嘅水彩卡、詩篇嗰啲，我都一一收好，「大山可以挪開，小山可以遷移」我當然識唱啦。但係愛國嘅人士就會唱：「支聯會座大山可以挪開，民陣同教協啲小山可以遷移，但千秋萬世的共產黨，永不離開你」，我問你死未？！

～Mita:你今次寄來嘅信，冇五顏六色嘅字，又冇因荒漠甘泉嚟，而係用仙人掌、松樹、太陽花來鼓勵大家，我都照吓畫先；

～唔係人力嘅錢錢：收到你嘅信，多謝你報料，話俾我知昌昌又提起我，係咩？佢話尊重我咩？咁我真係要恭喜佢啦，分分鐘會被告「宣揚煽動人反政府主義」呀！

～Fanny Shek：你係唔係我以前新城嘅同事呢？如果我記錯嘅話，唔好意思，因為坐咗一年冤獄啦，記性可能衰退。多謝你嘅來信，關心我同唐英傑嘅情況，明白你擔心我哋會被重判，無論點判都好，唔使擔心啦，點都可以上訴，香港法治未死喎?！因為可以上訴囉；

～煲湯媽媽：你寄來奧運嘅消息，我八月中下旬先至收到，雖然news 已經out咗，但心意和感情，never out，最out 應該係Albert Au, 聽到佢嗰把「靚」聲又諗起佢戴嗰頂帽，係唔係好out 呢?!

9）快必今日繼續同家人玩簡譜估歌仔遊戲：
//愛在何方
我笑我始終希罕
仍然願意準許當天飄進夢鄉
為紀念曾經遇上//

荔枝角瀰漫着梅艷芳嘅「情歸何處」，一首歷久常新嘅歌，就一啲都唔out 嘅，係咪？

10)還押咗一年啦，好多謝大家一路以來仍然寫信比快必，鼓勵佢支持佢。請大家一有時間，就繼續來信，寄到：九龍灣宏光道7號興力工業中心619室，如果想寄俾慢必同傑斯都得㗎。

11)賣下廣告先，遲啲會推出2022年記事簿，幫大家記低小事也記得大事，仲會有快必親筆嘅寄語，與大家繼續同航。嗱，係唔係會支持先！? 點都好，大家都要繼續支持快必嘅Patreon ，多啲share出去比其他朋友呀。傑斯都要你哋支持㗎！