HKGalden時事臺
發表文章發起投票回覆
打針抉擇 - 左丁山
https://hk.appledaily.com/columnist/20210509/LZRXVTFWJJFURK653L7KMCFQUE/

打針抉擇 - 左丁山


資料圖片

特區政府要所有外傭檢測及簽續約時須接種疫苗,引來菲律賓外交部指香港措施有歧視成份,政務司長長張建宗第一時間駁斥菲律賓言論,都算勇猛。目前菲律賓外交部對中國漁民漁船駛近菲律賓海域之黃岩島(距離菲律賓海岸120海里,距離最接近中國海岸470海里)聚集一事,居然公然在Twitter講粗口,叫中國漁船Get the Fxxx out,可謂係前所未有,外交部長喎,點會唔識外交詞令而直情用粗口「走X開」㗎?

菲律賓政府啲行為比較奇怪,令外間捉摸不定,菲律賓有聲音批評外交部長Teodoro Locsin粗魯,部長回應「一般溫和言辭全無效果」,好似幾硬,但總統杜特爾特向來親近習近平,就話要同北京慢慢傾!於是Locsin好快改口話發夢都想有王毅咁溫文爾雅,直情假到令人發笑,究竟菲律賓玩緊邊科,張建宗司長及羅致光局長除非已有北京指示,現階段在外傭問題上刺激菲律賓,對香港冇着數。果然呢,佢地上司林鄭已經褪軚嘞。

今日係外傭檢測最後一日,好彩我家菲傭數人已全部檢測咗,結果係陰性,其中一個仲主動去打針(科興),因為佢知道菲律賓家鄉疫情好唔掂,自然短期內唔會返去,仍然因害怕留在香港打針,打完兩針,健康如常,未見有副作用。

文匯報(5月3日A2版)報道打完科興外,面癱個案增加,專家要求列明科興疫苗有此副作用。碰啱午飯後行街,在萬邦行附近碰到朋友T,佢個屋企有幾個醫生,於是問佢打咗針未,朋友T話:「冇打,各安天命,細佬係醫生,佢都冇打。」咁如果有病人問意見又如何?朋友T話:「私家醫生畀意見,責任好大,一於唔畀,細佬同病人咁講,副作用發生機率好細,不過係會發生,請你自己決定打唔打。」諗落私家醫生如果對客人講話打針冇事嘅,如果到頭來出咗事,有無法律責任呢?

朋友C問家庭醫生:「好唔好打?」醫生話:「你有血壓高,不妨問吓你位心臟科專家先。」再問心臟專家,專家叫佢去做完電腦掃描先至講。於是乎掃描收八千,專科醫生收千幾,未去打復必泰,已唔見近萬元!朋友C幾乎想學菲律賓外交部長,講句:「What the F……!」




Good0Bad0
2021/05/09, 6:15:05 晚上
引用快速引用
本貼文共有 0 個回覆
發表文章發起投票回覆
請先登入以發表回覆