封碼頭其實預左
一篇文集合西環碼頭封閉事件起因同埋原意， 希望各位香港人反思自己有冇好好愛護自己嘅地方。

近期歷史
街坊休閒地方 變成 打卡熱點
原本嘅碼頭好多街坊，通常都係日頭船主落貨做生意，夜晚街坊放狗吹水散步。
2016年，有一個專門介紹西環碼頭嘅ig page開咗，慢慢開始多人。
2017年， 政府想收回依家嘅卑路乍灣海濱長廊作花圃，居民反對（ 詳情可以拉落去一個西環街坊寫嘅《守護西環碼頭》）。
2018年， 開始有 ig page介紹 西環碼頭可以打卡。
2019年，礙於反送中影響西環超過三個月，人數都冇2018年咁多。
2020年，疫情初期，自稱西環街坊嘅youtuber 西dorsi 介紹西環， 之後不斷有介紹景點嘅 page 介紹西環碼頭。
疫情爆發初期，大中小學停課， 應該係西環碼頭史上最多人嘅一年。就開始有 @princekenjiwong 所講嘅爬貨櫃，野餐留低垃圾，踩單車踩滑板，偷竊影響船運，更加有人放四軸飛行器，狗隻失足墮海。 去到聖誕節左右，縱火，狗隻受傷交咗畀法庭處理，疫情下多人過平時，所以就係2021年3月1號封。
----

船主角度
船主不滿，向區議員投訴，再自己同海事處施壓。原因就係貨櫃同埋地方，因為有好多遊客 打卡，搞到好麻煩。 佢哋都有話 可以歡迎西環街坊入去，因為佢哋有手尾，平時都係夜晚先會入。有好多貨櫃起重機等嘅公司財產因為畀遊客摧殘，今年疫情期間，更加經常出現呢個問題，偷竊破壞縱火等等嘅情況係呢半年之內發生。

我（大部分嘅街坊）的角度
作為每日進入西環碼頭食風休息跑步釣魚嘅街坊，每次見到天空上面好多架航拍飛嚟飛去，好多人爬上啲貨，甚至企係起重機影相，不時都有新嘅塗鴉，有啲仲要喺私人物件上面。成個碼頭變得烏煙瘴氣，封碼頭只係時間問題

海事處角度
對住啲遊客已經用最容忍嘅態度，只係作出勸喻好少報警，平時都係隻眼開隻眼閉，除非有犯法嘅行為。我哋畀咗好大自由入嚟休閒嘅遊客，只可惜，近期大家嘅行為令好多船主反感 所以決定關閉。

就係咁大家思考一下，自己成日話大陸細佬喺地鐵大堂屙尿，點解唔諗下自己冇執走垃圾同埋毀壞私人財產。

希望真係少數人。