https://hk.appledaily.com/local/20210120/4DXIPSRB7JCA7BNG4YTXVNIYPQ/

隔牆有耳：民主派區佬製破格banner
自由欄杆變藝術裝置（李八方）


■陳敬倫喺區議員橫額位置用木板將自由二字設計成「鐵窗」般嘅裝置藝術。

元朗區議員陳敬倫近日利用木板同鐵欄，喺區議員橫額位置用自由二字設計成「鐵窗」般嘅裝置藝術，一方面防止建制嘅人玩撕banner，一方面用藝術發聲，創意引來唔少網民share，不過呢個只係陳敬倫創作嘅開始，之後好嘢跟住嚟。


靈感源自建制「坐晒監」

民主派區議員橫額常被破壞塗污，今次陳敬倫以幾塊貼咗黑色膠紙嘅木板，結合貼咗黑色膠紙嘅欄杆，打直睇係「二三」，打橫睇係「自由」，八方睇到「頭已側」。

陳敬倫話設計靈感來自以往從背面睇住被太陽曬住嘅建制派橫額，好似呈現出個個坐晒監嘅樣。佢決定用幾塊長且窄嘅木板，再用衣架鐵線固定喺鐵欄上，要拆落嚟唔容易，目的係測試一下係廢老、大媽即興清橫額，抑或破壞者係有預謀。至於整個裝置想表達咩意思，陳敬倫話相信大家「明就明」。

陳仲話︰「大家都好有反應，可能因為最近冇乜其他新文宣。好開心見到有人喺欄杆影相打卡。可能大家覺得，我哋想要嘅係好簡單好基本，點解個政治環境要咁樣呢？」陳敬倫同八方透露，下周將有第二個裝置面世，同樣係欄杆上嘅新字樣，之後仲會有其他設計。

李八方


陳敬倫


■木板用鐵線固定喺鐵欄上， 防止藍絲破壞。