你們好嗎？我與外面既社會闊別左差唔多三個月了。首先，好多謝大家好多好多嘅生日祝福同來信，感動。有同道喺蘋果落廣告祝賀我生日快樂，仲有自己DIY用大帽山既相做生日卡俾我，好有心機。多謝你哋！

其次，容許我代其他在囚手足多謝大家並冇忘記我哋在囚手足，你地既心意我地收到的，學解悶工廠話齋「如慢慢長夜手中信能助你一把。」每次收到外面既來信都感到好窩心。大家咁忙都抽時間動筆寄俾我地，感激你們。

如有時間嘅同道，請去做旁聽師，支持下未來要上庭嘅義士，佢地好多都係為咗香港呢個地方付出青春去換取自由有血有肉嘅年輕人，請大家幫忙聲援一下佢地。

講下我近況，入面啲飯菜依舊咁淡味，不過慢慢習慣吧。除咗職訓同上堂以外嘅時間，都係睇書同做體能，保持住心境開朗去面對一切會發生嘅事。本來諗住中秋有月餅食，可以係監房做下選民，點知都冇機會了。喺呢度消息都流通嘅，至少仲有蘋果日報睇，有電台聽，有CCTVB新聞睇，仲同緊外界保留住一絲嘅連繫。

大家有時間都可寄信畀我，和我做筆友，以解監房之苦。你地啲來信都好有趣，千奇百怪：有蛋糕做法、天氣報告、新聞資訊、笑話、數獨、謎語，故仔等等乜都有。提醒大家，如果要回信嘅，喺信紙留低回郵地址，謝謝。

最後，我想告訴各位：
「只有堅定的靈魂，才能夠堅持做自己。」
祝大家身體健康、心想事成！

岳
5.9.2020

#見字飲水 #改變始於抗爭 #守護良知
#5201314 #有緣山見

後記：今日隔離壁屋監獄有確診病例，亦都影響咗壁屋懲教所呢度，大家要保重身體。
今日九龍又有大搜捕，黑警又濫捕市民！喺電視見到大家，好擔心。希望平安無事，早日歸家！

（代管理人按：今日係佢出事嘅一周年，剛好收到佢嘅回信。內容係有些時差，請大家唔好介意。）



https://www.facebook.com/112082666891998/photos/a.117454013021530/339384720828457/?type=3&theater