由7月7號港泰老人院開始爆發慈雲山第三輪疫情開始，到今日已經足足一個月。過去一段時間可以話係前所未有咁忙，為嘅只係盡自己作為區議員嘅職責，同埋幫慈雲山出一分力。辛苦嘅其實唔止我一個，另外幾位慈雲山嘅區議員之前都頂唔住要寫「感性文」去抒發感受。其實我都想寫埋一份，不過我嘅個性係唔鍾意展露軟弱嘅一面，所以拖到今日慈雲山疫情相對回落咗，亦都有時間稍為整理好自己狀態之後先寫。

由未參選區議員嘅時候已經開始問自己「區議員有咩可以做」，其實到今日我都仲係經常問自己同一個問題，而過去一個月正正係個好難得同深刻嘅機會去反思。哩段日子我同咗好多部門交手，由最初同領展爭取慈雲山中心封場，到之後同衞生署爭取派樽，再之後同民政處爭取派口罩同全區化驗（OK聽大家講唔用檢測，改緊口），每次都係將街坊嘅意見講畀有關人士聽，但最後做與唔做根本唔輪到我決定，有時三番四次重覆同強調但對方都無動於衷就會覺得自己好廢。

區議員喺制度上嘅設定係諮詢角色而冇太大實權，手上唯一嘅「武器」就係選票。過去一個月嘅抗疫工作上好多嘢由冇變成有，背後有幾大程度係因為我出咗聲爭取咗而成事呢？其實我自己心入面都冇確實答案（冇辦法好似人哋面皮咁厚乜都成功爭取），亦好難直接去求證。但我始終認為民意不可欺，當群眾不約而同提出同一種意見嗰陣，任何人如果試圖背離都會面對好大壓力，就算香港嘅制度日漸崩潰都唔代表可以輕易迴避到。如果我真係有份促成咗啲乜嘢，相信最大原因都係我講中咗大家嘅心聲，話事嘅人睇到我背後其實有一大班街坊支持所以先讓步。

但最大問題係「民意」其實唔係鐵板一塊，當某啲議題大家意見好一致就梗係容易做啦，但更多時候唔同人係會有唔同意見，而我作為區議員就有責任去平衡。特別係依家香港政治敗壞，當街坊唾棄我哋嘅政府嗰陣，好自然就會將希望寄託喺議員身上，哩一點我完全明白。所以每當我講嘅嘢做嘅嘢同大家期望有落差，覺得失望都好正常。我啲同事曾經講笑話「我哋係黃大仙區議員，唔係黃大仙」，現實情況係我冇辦法做到有求必應，只能夠盡量兼顧同埋小心去做取捨。

例如今次慈雲山全區做病毒化驗，有街坊覺得我成功爭取DNA送中，明知有問題都仲叫人走去驗，等等。但大家如果跟我落區一齊視察下派樽嘅情形，你就會見到好多街坊真係好想有得驗等咗好耐，亦有唔少真係會走嚟同我講多謝，話我幫佢哋爭取到派樽。有啲街坊一聽到中資化驗所即刻卻步，升級成政治問題然後各種陰謀論開始出現，但亦有好多街坊覺得係杞人憂天完全唔擔心，而哩啲都係我需要去照顧嘅對象。所以我嘅平衡點係今次屬於自願性質，有疑慮可以唔參與，並且要求加入本地化驗所畀街坊自己揀用邊間。

正如我之前回應某位網民留言所講，當社會對政府徹底不信任嗰陣，出現陰謀論係好正常嘅事，而且好難否定，結果就係傳播得非常快。由我成功當選區議員嘅一刻，其實已經係走咗入去成為現有制度嘅一部份，制度受到質疑嘅時候，最終連我都會受到質疑。哩一點其實一早預咗，坦白講連我自己都質疑緊個制度，但當然我有自己嘅理由去「蹚這趟渾水」，因為我相信區議員嘅身份仍然可以令我做到某啲嘢。至於係做啲咩呢，係唔係一心做「獎金獵人」呢，就留返有機會再講啦。

又有啲街坊見到我咁落力爭取，仲要受到批評同單單打打戥我唔抵。其實大家又唔使咁上心，我哋追求嘅民主社會就係要有唔同聲音同立場先健康。最緊要大家清楚了解彼此立場，最後真係有分歧解決唔到都係好正常，咁咪隔一段時間等情況有變化再返嚟討論囉。一個人表達嘅手法或多或小反映咗佢嘅修養，但就算手法唔認同，背後嘅內容依然值得去思考，唔應該因人而廢言。再者作為民選議員，畀人鬧其實係保持唔會離地嘅重要方法之一，我嘅心靈未至於脆弱到畀人鬧兩句就受傷（放心應該唔係用玻璃做）。

最後，有啲街坊同我講班土共（係呀，唔好再叫佢哋做建制派，佢哋冇建立過香港嘅制度，反而不斷破壞，叫佢哋做保皇黨或者親北京派都得）成日走出嚟抽水呀，做好多嘢叫我睇緊啲呀之類，明白大家都係著緊同擔心我嘅處境先會有咁嘅提醒。我唔會好似其他同事咁強調自己資源冇對家咁多，正如前面所講我唔鍾意展露軟弱嘅一面。土共有條大水喉射住擁有無限資源就不嬲都係，但容許我引用毛澤東「戰略上藐視敵人，戰術上重視敵人」嘅講法作為回應。區選前我哋有嘅資源更少，強弱更加懸殊，但最後對家依然輸到一塌胡塗，靠嘅唔係我一個人，而係靠所有眼睛雪亮嘅香港人，而好明顯土共根本冇吸取到教訓。總之我同我嘅團隊會做好本份，落到社區每日嘅恆常工作會繼續畀心機去做，唔會畀人有機可乘，剩低嘅就交畀大家去評價喇。

#多謝大家睇到最後
#每次一寫就會好長
#所以平時費事寫
#圖為視察停車場蚊患問題
#圖文不符
#背多分
#請廣傳