話說有一個人，個名叫做‘你’
佢雙親都係藍絲
每日返到屋企就會聽到佢雙親大大聲播藍絲youtuber
每日食飯一開電視睇新聞雙親就會政治家上身
彷佛所有抗爭者經佢一講
談笑間就會灰飛煙滅
最後就會世界和平
‘你’忍左好耐
開拖？斷家用？說服？
通通無用
然後‘你’就放棄改變雙親了。
其實，唔洗鬧交
改變到佢角色就得。

每個人都有唔同角色
係屋企你係仔/女
係公司你係老細/員工
講政治你係藍絲/黃絲
唔同角色，就有唔同立場，就有唔同利益訴求。
例如一場辯論
你係甲方，佢係乙方
大家利益訴求唔同，就會撐自己論點，駁對手觀點
如果突然叫停，雙方交換角色
你又可以睇到甲方同乙方
拎返自己駁人既言論打返自己
點講都可以有理有據。
所以，任何黃色發言，藍色發言都好
最核心既係「角色」。
換句話說，我地要做既係令佢「角色轉換」。

戴定頭盔，如果對像係紅底既可以直接放棄。
原因係人地由細到大個教育都係紅，
除左政權瓦解、突然覺醒
否則冇可能令佢放棄深信左十幾、幾十年既角色。

「角色轉換」黎講，分三個階段。

階段一，降低角色既回報。

一個人肯去做一件事
係因為件事有意義，有回報先會做。
如果件事冇必要再做，咁就會脫離角色。
例如你唔洗再返學，咁就會脫離「學生」哩個角色。
如果你個fd做傳銷，咁你會點降低佢既回報？
係喇，同哂佢所有親朋戚友講：
「佢最近比人呃左入傳銷，唔好信佢」
咁佢搵唔到下線，冇回報，冇做既意義
自己就會走，唔走都比人趕走，角色就會消失。
同理，
藍絲既形成係因為佢係遇到危險時（香港混亂），
被逼放棄原本賴以生存既觀念模型（香港好安全），
於是急需一個觀念模型去生存，
*之前個黃藍post有講咩係觀念模型
然後就到處尋找（youtube、新聞等），
而首次接觸既係藍色觀念模型（Propaganda等政治宣傳），
就會做左藍絲。
如果首次接觸既係黃色觀念模型（文宣、蘋果），
就會做左黃絲。

*哩度特別講下，
*其實黃絲既文宣，學習成本都比較高。
例如
黃絲文宣：五大訴求，缺一不可！當你深入去睇，密密麻麻既文字寫「第一個訴求.....第二個......起源係.....理由係......」
藍絲文宣：［緊急］黑衣人的真相！當你深入去睇，雞乸咁大隻字寫，「幫助美國破壞香港！」

所以之前都提及過整吸引眼球既內容農場風格文宣
而入面全部係真實內容。
哩種文宣符合返教育程度低既藍絲
因為，文宣並唔限於我地圍內自己睇
目標都係想俾藍絲睇。
以上提及既有一班手足已經整緊。

言歸正傳，所以第一階段要向哩兩個方向行動。

一，不斷暗示黃絲多數派，藍絲少數派。
例如：你行出街睇下，人人都係黃絲黎架，無乜藍架喇而家。
例如：全港九新界區差唔多都係民主派，其實個個都係黃架喇而家。

二，不斷暗示藍絲所有既行為都係冇用。
例如：撕文宣冇用架，轉個頭又貼過哂。
例如：轉發哩d文冇用架，out哂架喇，人地當你傻。

方法不限，最緊要降低到做藍絲得到既回報。

階段二，提高角色既意義。

正常黎講由名聲，利益，快樂，貢獻，成就
五方面黎引誘人去做哩個角色。
但眾人都知，與藍絲者言，依於利。
所以利益就夠。
Steve jobs點引可口可樂ceo跳糟？：
「你想賣一世糖水定改變世界？」
一句就搞掂。
同理，
「你想以後係新香港有靚衫著（衣）有好野食（食）有層樓住（住）日日環遊世界（行）定冇人冇物屈係老人院孤獨終老一世？）」
藍絲黎講衣食住行就夠
利益唔夠再加，
佢需要乜就再添。

方法不限，最緊要提升到佢做黃絲既回報同欲望

以上交俾文宣做，以下就要自己做。

階段三，授權比佢參與你所屬既角色事務。

一間公司點樣挖人走？
就係邀請對方做自己公司既顧問
等佢有份參與公司事務
慢慢馴化，最後挖走。

古時戰國點樣密謀令他國將軍倒戈？
邀請對方討論自己既國家
等佢有份參與國家論政
慢慢馴化，最後挖走。

同理，
邀請藍絲討論我地既文宣
等佢有份參與黃絲事務
慢慢馴化，最後挖走。

點邀請？
先同意哂佢講既一切，
再慢慢邀請佢。
例如你爸媽又突然提起政治，你就話
：「爸/媽，我覺得你先係岩，
但知己知彼百戰百勝，
不如幫手睇下哩d文宣點解會說服到黃絲？/
不如幫手睇下哩d文宣點樣整出黎？
我唔係幾知以前點解會信黃絲.../
我地要知黃絲點整出黎先對付到佢地...」之類
話題不限，最緊要係令佢代入到黃絲身份。
睇佢肯唔肯，唔肯就讚到佢肯。
例如話你咁醒/咁有經驗/咁有政治頭腦...etc

然後每日send d文宣俾佢分析。
每次佢肯分析就請佢食餐飯，
如是者，拎文宣轟爆佢就ok。

當然，一開始佢實話咩中國好強大呀
黑衣人點搞亂香港呀
你會好嬲，但最最最緊要係唔好反駁
Send到文宣俾佢睇已經行左一大步
你要做既唔係反駁而係引導
即係扮蠢問佢問題就得
例如
雙親話：「明明美國好廢，中國好勁，哩篇文宣打橫黎講」
咁你就問，點解習總d親戚仔女全部美國籍既？
總之問到佢思考人生同埋自己去google搵就得
但記住絕對唔可以問過火，激到佢反抗情緒
一段時間後，
佢就可以藍變中立，中立再變黃。

綜合以上，小弟親身測試有效。
雙親，一人變淺黃，一人變返中立（黃藍都睇）
常言道，家家有本難讀既經
最緊要記住個思路
點變通就睇你了
雙親深藍+無腦就睇施主你造化
救得一個得一個