【民族自強 香港獨立】

香港獨立係歷史必然進程。


「民族」
一個民族，一個國家。我哋終於認清我哋嘅身份係香港人，係香港民族嘅一員。唔再係被「中國人」、「華夏遺民」，甚至係「世界公民」依啲虛假身份蒙騙。香港人曾經被一個問題困擾：究竟我係邊個？由細蚊仔一張白紙懵懂不知，到有人同你講你姓甚名誰，到你第一次填你嘅國籍，到政權傳媒機器開始灌輸你係咩人但你非常懷疑，到你決定要去搵答案。最終，你搵到自己嘅真正身份，而嗰份喜悅同自豪正正係民族性嘅體現。

「自強」
依句口號出自香港民族黨，參考返佢哋成立嘅宗旨，入面提到：「....捍衛香港人的生存空間，並最終建立民族的主權國家，令香港再次成為東亞偉大的文明國家....」。雄起東亞，唔單止係要成為台灣、日本依啲一流強國，更重要係到以主權國嘅身份傲視世界。既然國家嘅本體係民族，所以民族內各員要自強，過去手足都有講過，一有餘暇就要各自分工努力進步：鍛煉體魄嘅健身、鍛煉學養嘅進修讀書、籌措資金嘅經商、物流送運嘅買車買船，自司其職。政治永遠由最細嘅單位開始改變——個人，進而民族，進而國家：民族強則國強，民族富則國富，民族自由則國自由，民族獨立則國獨立。

喺過往嘅一年，香港民族為何而戰？
我哋為香港民族嘅弟兄、為香港民族嘅生存空間而戰。由「五大訴求」，到「光復香港」，到「唯一出路」，再到「民族自強」——歷史嘅牽引與現實嘅壓逼，使香港民族不得不認清此一事實：只有建立屬於香港國民嘅政體，香港民族嘅世世代代先能夠有尊嚴地喺香港生存，以至喺呢片國土上生活下去。

香港民族革命，不可逆轉。
點解香港人追求獨立？因為我哋係一個民族。過往我哋走過歪路，妄想殖民政權會回應訴求，亦錯將希望投放於賴選舉維生嘅政客身上，迷戀制度內嘅喘息空間。然則到咗此時此刻，我哋無法再忽視革命嘅本質：

革命並非為撤回一條惡法，而係要將應得嘅權力奪回到主體民族嘅手中；
革命並非向敵人提出訴求，而係要號召民族成員，一同反抗、奪權、生存；
革命並非要敵人釋出善意、態度軟化，而係要民族成員自強起嚟，勇敢抗抵敵人嘅侵擾。

呢一場係香港民族嘅革命，革命嘅目標係香港民族獨立建國，目的係香港民族有尊嚴咁生活落去。