https://www.facebook.com/ventuslauwh/posts/1297033510467041

近日有關立會初選同立會過半既討論愈趨熱烈，其中一個討論既重點係──如果真係拎到立會過半，應該點做？

#議員無權立法 #過半只能攬炒

立法會雖然個名有「立法」兩個字，但係喺香港畸形政制下，就算我地拎到立法會過半，都唔等於我地可以真正「立法」。因為《基本法》第74條規定，立法會議員如果想提出任何涉及政府政策既法律草案，都必須先經行政長官同意。所以真正既創制權，仍然喺行政機關手上。

因此，立法會過半最大既作用，就係同政府全面抗衡，煞停暴政，喺政府應承五大訴求之前，否決所有政府法案同撥款，令政府無法施政，更可以斷絕黑警既糧草。但係，除左「攬炒」之外，立會過半仲有無其他層面既作為呢？

#進佔各委員會主席 #組成影子內閣

立會過半，抗爭陣營就可以進佔立法會主席同埋各個事務委員會既正副主席職位。立法會主席有幾大權，相信大家有留意開新聞都會知，但今次想分享既係，比較少人討論既委員會主席。

立法會設有18個事務委員會，範圍涵蓋各個政策範疇，由教育、交通、福利、政制到保安等等都有，通常負責喺立法會大會以外，就唔同政策要求秘書處整合資料，俾議員深入討論、提出動議，亦可以向政府官員提出質詢，以及舉辦公聽會，收集公民團體既意見。

事務委員會主席有權決定議程、主持會議、控制公聽會流程等，更加係傳媒就住相關政策範疇優先訪問既對象。如果可以善用呢啲權力同優勢，委員會主席就可以主導某個政策範疇既討論焦點，甚至提出政策倡議、引導公眾輿論，成為果個政策範疇既真・KOL。

而十八個委員會主席加埋，各自成為有關政策既議程設定者，就可以形成一個類似英式西敏制既「影子內閣」。

#擺脫在野思維 #展現執政意志

過去民主派因為制度而被迫成為議會內既少數派，形成固有在野思維。但係隨住舊年區議會大勝，抗爭陣營亦要開始適應成為多數派，並展現多數派應有既「執政意志」。所謂執政意志，即係唔係只係消極地批評政府政策，而係能夠展現畀市民睇，我地同樣有能力同視野，可以妥善咁提出管理香港既方向。

如果立會過半，除左喺大會同財委會同政府「攬炒」之外，利用事務委員會主席一職，組成「影子內閣」，積極地提出抗爭陣營對於管治香港既各個政策方針，將會係議會戰線既另一重意義。