https://hk.news.appledaily.com/local/20200406/WSQWCRGOBFSGTSU7BAHUMGBPXU/

隔牆有耳：
見過鬼怕黑 唔敢提自私Madam
小肥張猛讚差人查疫有功 - 李八方



近日接二連三有差人中咗武漢肺炎，當中有人公然飯敍又去酒吧，中招女警仲以唔記得為由，隱瞞衞生署去過食自助餐，咁做唔單只冇紀律，仲為抗疫添煩添亂，但政務司長張建宗噚日撰寫網誌，大讚差人幫助調查感染群組，至於差人群組搞出嚟嘅播毒case呢？就梗係隻字不提啦！

網民︰怕咗林大總統

張建宗喺網誌話，上星期去警察總部，了解警隊協助新型肺炎患者接觸者追蹤嘅工作，仲大讚警隊用超級電腦「默默地深入調查」酒吧感染群組、北角福慧精舍群組咁，幫衞生署搵源頭同超級傳播者，「協助截斷病毒傳播鏈」、又話「阻止疫情在社區擴散」，形容差人「努力值得充份肯定」。

不過呢，小肥張冇講嘅係，早喺1月23日疫情爆發，衞生署已聯絡警方隨時動用「超級電腦」協助追查疫情，但差人一直「唔用腦」，直到2月20日有首名差人確診，先肯用部超級電腦，追查同嗰名差人相關嘅感染群組，講到底係怕疫情喺差人之間擴散，至於有差人唔聽政府指引減少社交接觸，仲去酒吧搞到中招，又有染疫女警隱瞞曾除下口罩同人交談，懷疑因為咁傳染畀對方，小肥張梗係一句都唔敢提，有網民揶揄，你估佢唔怕又俾警察隊員佐級協會主席、人稱「林大總統」嘅林志偉要佢道歉咩！

李八方