https://hk.lifestyle.appledaily.com/lifestyle/columnist/%E5%B7%A6%E4%B8%81%E5%B1%B1/daily/article/20200405/20893982/

又來追殺港台 - 左丁山


《The Pulse》截圖(互聯網)

左丁山好少聽香港電台英文台（Radio 3），前幾日有一段新聞，講Radio 3女記者Yvonne Tong訪問世衞組織助理總幹事艾沃德（Bruce Aylward）嘅錄音片斷在網上瘋傳（go viral），先至知道有「大事」發生。記者訪問世衞都會變為大事？唔駛奇怪，憑新聞觸覺就會知道必定有人無風起浪，將小事轉化為大事，呢位Yvonne小姐隨時會遭殃。

果其不然，中央電視台突然大罵港台記者居心叵測，大公報鬧港台煽動台獨，一個甚麼港台關注組又即刻出嚟向通訊局投訴港台，大公報3月30日A6要聞版大字標題：「港台包庇記者借疫煽台獨，別有用心追問世衞，公然挑釁『一中』原則」。真係大件事咯。

究竟Yvonne（後來知道佢中文名字係唐若韞）犯咗乜嘢天條？原來簡單到極，佢問艾沃德：「世衞會重新考慮台灣的會籍嗎？」呢位曾講過：我有肺炎都要去中國醫嘅加拿大衞生專家居然唔識答，詐聽唔到（I'm sorry I can't hear you, Yvonne），然後電話突然斷線，Yvonne再接線追問，艾沃德吱吱咗咗講多幾句禮貌說話就收線，作為一個資深世衞官員，呢位先生都算肉酸。

做過記者嘅都知道，原本條問題冇乜特別，艾沃德只要帶人遊花園幾分鐘，再打官腔，背誦世衞對台灣問題嘅line to take（預定標準答案）就可以借一個藉口鬆人，駛乜斷線咁尷尬呀，依家傳遍全世界新聞圈，以後艾沃德見到路透，紐時，彭博嘅記者，俾人問及雷同問題，唔通要走夾唔唞？

中國及本地藍絲無風起浪，周圍投訴，應該係趁機繼「頭條新聞」之後，再搵藉口推到港台，奪取編輯權，奪權容乜易呀，駛乜咁嘈？只要西環下令林鄭下令邱騰華，炒咗廣播處長梁家榮，挖角搵袁志偉做處長，應該係輕而易舉之嘛，最多咪賠錢畀梁家榮，港府大把錢，驚乜！如果連袁志偉都信唔過，搵邵善波，阮紀宏做一樣掂，唔需要肉酸到搵一個前馬鞍山區議員彭長緯（民建聯）用港台關注組名義，罵Yvonne唔專業。彭長緯做區議員時，曾發動區議會阻止馬會在馬鞍山開設投注站，令到有幾十萬居民嘅沙田區只得好運中心及禾輋商場兩個投注站，令廣大老馬迷非常不便。佢識得乜嘢叫做新聞專業呢？唔該佢向資深記者，中大新聞學博士區家麟請教吓先。之不過，佢現在貴為全國政協，講專業就係「聽黨話，跟黨走」啩！

左丁山
電郵 :[email protected]