https://hk.news.appledaily.com/local/20200402/FX2YJI6F2WOWBBEO6DP5B2VBJY/

隔牆有耳：藍絲「Virase」屈美國變獻世 - 李八方


有藍絲喺行人隧道噴上「USA Virase」同星條旗，慘遭網民恥笑串錯字。互聯網

早排中國老屈武漢肺炎由美國傳入，美國總統特朗普就將武漢肺炎叫做China Virus（中國病毒），此舉不但打碎晒強國成地玻璃心，仲引起中國外交部全面反擊。海外一班小粉紅五毛亦「響應」強國號召，係海內外討論區以USA Virus還擊，香港班藍絲自然慌死執輸跟住做，但自暴其醜，畀人知道藍絲原來唔識英文，仲要畀黃絲公開示眾。

死撐係西文 再被K.O.

高登討論區嘅fb專頁噚日貼咗張網傳相片，見到一條隧道入面，有疑似愛國人士喺牆上噴咗「USA Virase」兩個字，Virase明顯係Virus嘅錯字喇！但咁未算醜，有人係牆上噴字，公開寸呢啲噴字嘅愛國人士文盲、唔識字，再指正Virus點串，然後加多句「改正十次」！咁樣俾人公開打面示眾，叫愛國人士情何以堪呢？但有藍絲喺網上死撐，話Virase係西班牙文喎！但有網民再反駁，Virase喺西班牙文嘅意思係反對而非病毒，唔通藍絲曲線反中，支持美國反對中國？