現時追蹤脈絡：
老師的真實個人資料（名﹑背景等）
搵緊囡既家長聯絡方式

1. 背景：

正確啲黎講，依個係有關一個玩精神控制﹑心理操縱術既古箏團既故事，
裡面仲有小圈子﹑互相監控﹑群眾壓力等等；個老師懷疑有妄想症，其真實身份仍待追查。

樓主大概2013時係屋企附近一間琴行報古箏班，就咁認識左依位徐老師，前後跟左佢差唔多6年：

2013年仲係好正正常常咁上堂，因為漸漸熟絡加上老師好健談，於是上堂時開始互相交換生活動態，相處到好似朋友咁；不過教琴既時間佔大部份。

2014年，透過樓主一直同佢講過既心事，捉到樓主同家人不和既弱點，加以發揮，令樓主開始質疑及敵視父母，講既說話：「其實你父母唔係真正既愛你，佢地生你出黎係為左多一個家庭成員輪公屋」﹑「你父母根本就唔識得尊重你」﹑「你父母明顯偏愛你呀哥啦，咩都比哂佢」之類。

同時間，開始不斷提一啲會改變你價值觀或自信心既話：
「依家大學生泛濫，賺唔到幾多錢，好似我教古箏又買到名牌先叫特別，靠技術唔洗死讀書（讀書無用）」
「依家有啲女人過得咁慘係因為佢地無本事又嫁得唔好，貧賤夫妻百事哀，比著你會唔會搵依種男朋友／老公？你真係想窮一世？（釣金龜）」
「公屋人之所以係公屋人，因為佢地唔上進，佢地抵死，抵一世住依啲地方（貶低公屋，令樓主自卑）」
「你屋企人比幾多零用錢你？有無比錢你去周圍旅行？踩地板之旅咋掛？（眨低家境，令樓主自卑）」

2015年，打擊樓主自信心到某個地步後，開始普及樓主有錢人同佢（老師）自己既生活係點，佢自己既私事講得好多，可以話係洗腦既全盛時期。課堂基本上唔再教琴，大部份時間吹水，就咁比樓主彈下譜再指點一兩句，等樓主自己翻屋企練。話自己不斷吹水係因為樓主練得唔夠，唔想聽樓主黎琴行練琴比佢聽。

2016年，樓主已成年，更加離間樓主與家庭的關係，係樓主同佢傾訴既時候煽風點火。又結合下啲時事話題﹑自己既故事，去令佢既說辭變得更有說服力。依一年，老師係琴行內建立左一個叫「星音古箏團」既小團，比佢啲學生一齊練琴同傾計，但同時特別優待此小團內已答應加入佢自己建立既「少女古箏團」既成員（送衫﹑瘋狂稱讚﹑叫佢地Lead住星音古箏團內既人......）

2017年，恰好樓主個陣同屋企人幾乎鬧翻，眼見有幾位琴行團員都加入左，自己都決定加入，因為老師話只要加入左「少女古箏團」（非琴行範圍），佢就會幫我脫離屋企人並改寫人生，同時團隊可以幫到我好多野，例如建立自信﹑增加見識。

年末草到一筆錢離家出走，無再係琴行學琴。與同是琴行「星音古箏團」出身既一位「少女古箏團」團員一齊租屋。開始半工讀既日子，並完完全全地接觸「少女古箏團」內既人。