https://hk.news.appledaily.com/local/20200325/366M4TR4HGCAWCCFDD3E2H4Y3E/

隔牆有耳：抹殺港府救市功勞
陳啟宗老作歷史 - 李八方



美籍愛國商人、恒隆地產主席陳啟宗（圖）噚日發揮最強藍絲精神，向投資者發萬言書，除咗講業務仲講政治，對社會各界諸多批評，夾雜唔少驚人指控，話「文化大革命已經重現，就在眼前」，又話香港97金融危機全因獲北京支持，好彩八方冇失憶，仲有基本常識，知道全部都要fact check。

又屈示威者有外國勢力

呢位超級藍絲不嬲都鍾意點評時事，今次變本加厲，先話上年爆發嘅抗爭運動係徹底的瘋狂，繼而老屈示威者想改變國家政治制度同推翻北京，仲聲稱有博學之士話佢知，示威者採取嘅戰術同應用嘅科技屬世界最精密之列，如果冇受世界級專家訓練實在難以置信喎。之但係，都阻止唔到popo濫暴囉，咁popo唔通係宇宙級？

佢仲將經濟影響歸咎社會事件，直情當強國輸出武漢肺炎禍延全球冇到。佢之後仲嘗試改寫歷史，話97年金融危機香港係獲北京支持抵抗沽空機構，但八方記得曾蔭權曾經自爆入完市先通知中央，中央仲冇咩表示㖭喎。八方就希望陳生清楚，上市公司向投資者提供準確資訊，係企業應有責任呀！