https://hk.entertainment.appledaily.com/entertainment/20200215/EMVHCG2HWNXF3Z3UCKXGUQYTM4/

森美昨晚為無綫節目《全民開講齊抗疫》錄影，透露父母現正身處已有11名香港人確診武漢肺炎的「鑽石公主號郵輪」上，到目前仍需在橫濱港口隔離，令他非常擔心！

森美今日接受《蘋果》電話訪問，透露父母的房間沒有窗，過去幾日一直留在房間內，他形容似「困獸鬥」，他說：「佢哋現在喺船上等緊，船上三餐都OK，有廚房煮嘢畀佢哋食，有水同汽水，膳食方面係OK嘅。但有幾樣嘢較麻煩，因為唔可以出去，只能留喺房內，過去幾日只出過去一次，短短10幾分鐘去甲板後返嚟；加上間房冇露台冇窗，wifi又唔太暢順，成日喺船入面悶到好似坐監，我哋間中傳短訊傾偈。但有好有唔好，因為唔想佢哋接觸其他人，飛沫傳染嘅話仲麻煩，話晒在船困獸鬥。」

森美父母已年過70歲，現時沒有任何病徵，他亦希望日本政府可以加快檢疫，令沒有事的乘客可以離開船，返香港隔離。他說：「佢哋有啲乘客想夾份，話想叫香港政府出包機，又話請願，但噚晚林鄭話會做呢件事，所以最後佢哋冇做到。我都剛聯絡咗阿媽，佢話有啲朋友剛驗咗，未知幾時到佢哋，如果呈陰性可能畀佢哋喺其他地方隔離。希望香港政府早啲同日本交涉吓，船上面嘅檢疫方法好慢，希望可以周旋吓有冇方法快啲，畀佢哋盡快離開隻船。」

森美透露郵輪方面，今日派發每房間一部手提電話，讓他們得到更多關於疫情資訊，但森美覺得作用不大，他解釋：「船上嘅人多數都係靠香港親友通知，因為佢哋都話，現在只能乾等。不過，我媽剛留短訊，話現在可以隔日『放風』一小時。」森美透露父母今次出事，原本一直瞞着他，及後才由哥哥通知，問到是否好擔心？他說：「咁起碼佢哋冇病徵，仲有希望佢哋盡快離開，祈禱，唯有係咁。」昨日情人節，森美父母還收到一些驚喜，他帶笑說：「我父母話噚日有花同口罩等禮物送畀佢哋，我媽話郵輪，老豆話香港政府，唔知邊個，哈哈。」