https://hk.news.appledaily.com/local/20200214/36XIGI5NKDXFBWJMG62IIXRYGA/

記者放蛇 大媽讚有氣質


記者在店內「試堂」期間，有學員（左）為大媽老闆修甲。

【本報訊】「你搵到我都非常好㗎！因為好多人去政府尖沙嘴學校裏面學，學完之後找不到工作。」本報記者早前到涉事美容院見工，大媽老闆甫見面即表現殷勤，更以鄉音廣東話夾雜普通話向記者落足嘴頭：「你的形象和氣質都OK嘅，形象和氣質唔得呢就不適合，我覺得你都係一個很耐看，很精緻㗎！」

相關新聞：呃同場商戶「每日帶一個客嚟」

學員嘲老闆紋眉「毀容咁」

大媽老闆對記者一輪讚美只為推銷課程，「四個項目一齊學，又便宜，都係8,880蚊。」三項及兩項分別收費6,880元及3,880元，如果只學一項則2,880元，「指甲是2,880，這是學費，出面肯定是沒有6,000蚊一定唔得㗎，睫毛也是2,880的，都係好平㗎！」其後她更以每個客拆賬做利誘：「指甲這邊呢，剛剛開始是四六拆賬，公司六份，例如一個指甲是100蚊，公司就60，你就40。」

記者翌日獲准試堂一天，在店內直擊學員「上堂」實況。一名學員以免費模特兒作訓練，大媽老闆更幾度游說記者充當模特兒讓學員做練習，雖然大媽老闆確有出手指點迷津，但並非全方位教學。有學員偷偷向記者表示：「你返咗幾多日工？呢度冇底薪㗎，老闆亦絕唔會退回學費。」

記者在店內「試堂」數小時，一直賦閒，無人理會，亦不獲老闆傳授技術，亦有學員在店內「自己摸索」。不過，記者卻眼見不斷有少女前來見工，亦至少兩、三人交付學費。至於老闆的美容及美甲等專業資格，記者走勻兩間店，均未有見店內掛上相關專業資格證書，難怪有學員質疑其自學技術「半桶水」，「我有見過佢紋啲眉，真係唔敢恭維，紋到咁樣，直情已經毀容咁」。