https://hk.lifestyle.appledaily.com/lifestyle/columnist/%E5%B7%A6%E4%B8%81%E5%B1%B1/daily/article/20200124/20849264/

紙包不住火 - 左丁山



根據網上資料，2019年年底，內地微博已經流傳武漢華南海鮮市場發生不明原因肺炎病，有7人入院。2020年1月1日，武漢公安局通報拘捕了8名散播謠言人士，但同時華南海鮮市場休市。

到了1月2日，香港出現三宗武漢肺炎病例，患者皆曾到過武漢，1月3日，武漢衞健委公布，共發現44宗不明肺炎，其後香港繼續有曾到武漢人士中招，曼谷有來自武漢遊客染病，武漢肺炎消息逐漸傳到全世界。左丁山曾與記者小G講過：「一定有人壓住消息不報，冇理由香港人到武漢會染病，但北京上海長沙廣州等城市，唔通冇人去過武漢，點解呢啲城市冇武漢肺炎發生呢？」

[orange]威權主義制度之下，新聞界一律受國家監管，不准私人辦報，所有官方媒體聽黨話，跟黨走，重大消息由中宣部開會定調，得中央政治局批示後，就發放統一口徑畀所有媒體遵從，其他網上言論一概係謠言，全部刪除，再講就拉人封艇。最初嘅統一口徑係武漢肺炎可防、可控，但如何防、如何控，唔講，武漢肺炎會否人傳人，模糊不清，香港特區政府向內地攞資訊，回應唔清唔楚。[/orange]

[gold]內地一貫做法係有大事發生，首先封鎖新聞報道，不准外國傳媒深入採訪，資料發布慢吞吞，官媒總是唱好（即係講那一套：問題不是沒有，但問題不大，可解決），呢套互聯網出現前（即25年前）的古老方法，現在out晒啦！中宣部還是樂此不疲，以為人民係傻嘅，卒之誤人誤己。[/gold]

1月21日，紙包不住火了，北京、上海都有武漢肺炎（現稱新型冠狀病）打到首善之區，武漢一日新增案例136宗，十五名醫護人員染病，習近平李克強分別發表例行批示：「把人民生命和健康放在第一位。」於是各省市紛紛公布病例，數字噴井式上升，至1月22日上午，發現確診及疑似病例1444宗，香港股市大跌，在1月21日最多曾跌815點。2003年沙士肆虐，香港人記憶猶新，唔驚就假，2019年林鄭一手炮製之反送中運動已令旅遊餐飲零售業重傷，2020年再來一次武漢肺炎，香港果真是黃台之瓜，何堪再摘。武漢肺炎係典型黑天鵝事件，突然而來，武漢市政府呢次必定受習近平痛罵，市委市長等人烏紗帽大可丟落長江。在威權一言堂政治制度下，人禍隨時將天災擴大十倍，[orange]經濟學諾貝爾獎得主A.K. Sen講過，大饑荒與不民主有密切關係，現在或可大膽啲講，大型傳染病與不民主及無新聞自由，有密切關係[/orange]。

左丁山
電郵 :[email protected]