https://hk.entertainment.appledaily.com/entertainment/20200118/JFP3RURUTGUH45YHX2PP2PNDCM/

【公司有立場】張文采撐舊同事謹守自己個崗位：接受唔到咪辭職囉


（資料圖片）

被譽為「新聞之花」、無綫新聞首席主播張文采（Wendy）在去年11月離開大台，告別這個工作超過10年的地方。在去年6月開始反送中運動，因為無綫新聞報道偏頗而發起反紅媒行動，當時盛傳有不少記者及主播不滿而引起離職潮，張文采接受商台節目主持梁泰來訪問，提到此事，她說：「其實係有，佢哋啲決定係好快，有時連佢哋辭咗職都唔知，突然間發現點解邊個邊個會突然間唔見，之後先知原來話走咗喇！係有呢啲情況發生。因為有啲同事一走就走，唔使好似我咁要等三個月通知，就算辭咗職都要等3個月，有啲係扣埋啲OT、大假，可以即日走都得。」

問到當時會否有工作環境而感到不舒服？張文采說：「其實係㗎！因為個工作環境每日要接觸呢啲資訊，本身已經覺得唔舒服，有時收咗工都想避開，唔睇唔聽，不過係好難，你都想知事態發展係點樣，好想關心，變咗每一日24小時，除咗係瞓覺之外，個心點都擔心、掛住，所以喺屋企或者公司，個人會唔開心，好彩有啲同事大家會互相支持下，感覺會好啲。我覺得每一間公司都有唔同嘅政策同方針，如果你做得嘅話，都要去接受呢樣嘢，同埋要表現你嘅專業，始終你係代表住呢間公司去工作，所以我都係嗰句，如果你都係接受唔到，咪選擇辭職囉。」

因為這場反紅媒運動，新聞部在採訪期間多次被狙擊，於是問張文采有否戥同事可憐？她坦言：「其實真係會有呢個感覺，有好多人都仲有heart，真係想做好件事，其實好多同事都好努力去做，希望可以謹守自己個崗位，將新聞嘅客觀事實可以公正咁報道出嚟，但係都係嗰句，每一間公司都有佢嘅政策，係要適應，如果適應唔到都冇辦法，惟有搵自己嘅路向。」言談間她亦承認「唔開心」：「我諗番自己10年前入TVB，嗰陣同朋友講，佢哋個個都會覺得好威，好似做咗大明星，但係到咗而家，坦白講都做咗咁耐，發現而家入嚟應徵嘅人數，坦白講真係少咗好多，甚至係冇嘅，喺呢度都反映咗出嚟。」

當年張文采因為與羅鈞滿拍拖的關係，令她的名字經常在娛樂版出現，她說：「我真係冇諗過，第一次畀狗仔隊影嗰陣，驚到跑走咗，喺商場搵咗個角落匿埋，個心跳得好犀利，之後都有同啲同事講，點解讀新聞都會上娛樂版？真係好唔明，其實係有影響。」幸好未有被公司「照肺」：「公司都明白，我自己都唔想，見到我完全handle唔到，係有啲無奈，唔知幾時開始，主播會變咗做一個明星要上報紙？但係又會明白啲人會有興趣知道我哋背後嘅嘢。」其後更有傳張文采因為着短裙而激嬲高層被罰停報新聞，她笑說：「我終於可以講番，有冤無路訴，我哋係唔可以接受訪問同講任何嘢，就算喺social media講都唔得，其實嗰次我係冇着到短裙，裏面係有條褲，其實係全部人都知，砌我生豬肉，老闆都知㗎，知道係一條褲，嗰件事我喊咗好耐，我直頭打畀老細喺度喊，我老細仲氹失我添，佢話『算啦！冇辦法㗎喇，人哋唔知。』變咗好多嘢只要身邊同事知道就夠。」

笑問公司有否因她與藝人拍拖而施壓？張文采說：「出街唔會做啲親密行為，叫我要化妝。（有冇叫你要小心啲識人？)又講呢啲，而家開心咪得囉！」提到消防員老公，她說：「呢個真係好大緣份，我哋本身係冇一個共同朋友，係報英文班識咗，仲要係唔同時期報，差唔多係我上完佢先報，只係連續有幾堂係一齊上，我平時係好少化妝，因為唔想人哋認得，想做番普通人去學吓嘢，點知佢原來係認得我，但係冇一嚟就問係咪報新聞嗰個張文采？反而係好有禮貌去問，一句八卦多餘嘅嘢都冇問，感覺係好舒服，終於唔會有一個人覺得我係另類，結果咪一齊約埋上堂，一齊食吓飯。」她續說：「佢對於我嚟講係好唔同，我未見過一個男仔咁勤力、顧家、上進，我老公係一個好痴家嘅人，連隔離屋都成日問點又喺屋企？佢個人都好健康，鍾意做吓運動，我夢寐以求嘅生活其實好簡單，只係想有個家庭，每一晚煮飯湊吓小朋友，佢畀到呢個感覺我。」

-----------------------------

想知今年愛情事業健康運勢？
十二星座運程指南點擊即睇！
-----------------------------

【匿名港警爆大鑊】
韓國KBS時事節目《時事直擊：香港 被自殺》
一按即睇