https://hk.news.appledaily.com/local/20200118/XJCLWGDQTWMQL3DOGDPKHKORGQ/

【迎鼠年●中西區】食環活動前夕拒發年宵牌 區議員臨時變陣改辦「賀年街站」人頭湧湧



【新增內容】
政府日前接連拒絕向黃埔、中西區、葵涌區等年宵發牌，被外界質疑是政治打壓。當中一連兩天的山城年宵由中西區10多位區議員合辦，原有超過40檔小店檔主於正街第二街至高街兩條大斜路擺市集，更有多個街頭藝人表演單位到場助慶。然而在活動前夕，食環署才通知拒絕向活動發出臨時娛樂牌照。中西區一眾區議員最終改以賀年街站形式舉辦活動，除了有區議員擺檔為大家寫揮春，不少小店檔主亦帶同精美手作到場，活動開始不足一小時，街坊已塞爆正街。於正街街市及西營盤街市外均有數名軍裝警員戒備。

「賀年街站」攤位包括手工肥皂、印章、PePe明信片等，與街坊大玩以物易物。活動亦貫徹其環保主題，場內除了有廢物回收，又以過百個七彩發泡膠生果網組成橫樑作佈置，上面更被掛上「願榮光歸香港」揮春。不少街坊帶同子女、寵物到場與小店交流。

相關新聞：【迎鼠年●九龍城區】政府阻撓民間年宵如「驚弓之鳥」 檔主移師九號水產辦市集

大學區區議員任嘉兒亦有參與擺賀年街站，並帶同街坊自家設計的貨品，如願榮光歸香港的團隊與一眾手足設計的利是封，到場與街坊見面，她形容現場氣氛相當熱鬧。對於食環署於活動前夕才拒絕批出牌照，任指「當時諗，點解呢？一開始明明係no objections（不反對）嘅，點解過咗個區議會會議就會咁？唔通（正街）條斜路再斜咗？無可能㗎嘛係咪？」又指箇中原因「大家有眼睇」。

同是中西區街坊、立法會資訊科技界議員莫乃光亦特地前來逛街，看到市民在活動中玩得很投入，他指感到很開心，認為這類年宵比維園年宵更特別，「呢度係好多手工嘅、本地嘅，特別係區內嘅後生仔自己嘅創意，所以大家嚟感受下個氣氛都好好。」

相關新聞：【迎鼠年●九龍城區】政府阻撓民間年宵如「驚弓之鳥」 檔主移師九號水產辦市集

莫指，自己昨天曾在立法會財委會就政府向民間年宵發牌問題提出質疑，但政府仍未有正面回應。他認為港府的做法令區議員和市民都無所適從，「你話唔得，但又唔講點解唔得，令人好易質疑係咪有啲政治決定。」他指，改善社會氛圍的責任，港府責無旁貸，「唔好政府自己再分化我哋香港社會」。

日前因在中西區區議會鬧爆便衣警的中西區區議會主席鄭麗琼，今天不再「勞氣」，一臉笑容在賀年街站向街坊派發即席絲網印刷「香港」、「加油」字眼的環保袋。

她坦言，當初得知活動突然被拒批牌照，自己亦方寸大亂，「因為活動又宣傳咗，幾百個環保袋一個禮拜前已經準備咗，咁你叫我啲環保袋點呀？」她又形容食環署的處理手法「好曳」。鄭又笑指，有街坊着她小心有便衣警，「佢哋又唔會帶委任證，我點知佢係咪便衣。」她但坦言不排除有便衣公職人員在場內遊走。

食環拒批牌照後，的確有部份檔主選擇不再參與活動，但仍有30至40檔繼續參加。任指，活動開始前有近40名警員在場駐守，因此在正街的四個角落均是區議員的街站，中間才是不同小店的攤檔，方便公職人員查詢活動詳情。不過，她指暫未有任何警員與她溝通，但指有部份地政總署或食環人員身穿便衣在場遊走，「喺裏面影相，但完全無問我哋嘢。」


檔主大呻不滿拒發牌：又無賣違法嘢

本地藝術家Miss FAT以自己創作的文宣，用圖像移印的方式印刷成明信片、小袋子等，帶來正街與街坊以物易物。不過，活動開始不足一小時，她的攤檔已幾乎「清貨」，原本準備了50個印有「五大求，缺一不可」標語的小袋子，轉眼已剩餘幾個，「見到啲街坊好踴躍，好開心，我都覺得好開心！」

對於食環署於活動前一天才拒批牌照，她指「咁好明顯係有拖延啦，我哋都覺得係有啲打壓」。不過，即使困難重重，她仍堅持到正街擺檔，「因為我覺得呢件事係令人開心嘅，係值得嘅，係應該發生嘅，咁我都會繼續支持呢啲活動。」她認為這類民間活動可令街坊和港人心情變得放鬆，應該更常舉辦，「唔好有咁多阻撓，咁樣過新年大家先開心。」

另一檔主Pigme的攤檔都有清貨「危機」。她以抗爭吉祥物「連豬」為主題設計徽章，又與「連儂格」合作，推出「連豬」、「連狗」拼圖。她指早於12月下旬就為山城年宵做準備，得知活動將被取消後感到很徬徨，「始終都準備咗咁耐咁多嘢」。她亦大呻「不滿」，因政府於活動前夕才拒批牌照，令主辦方和檔主很混亂，「其實我哋都係遵循法律途徑申請呢個牌，又無賣違法嘅嘢，咁都唔批。」她指，自己與團隊曾商討推出活動，但最終還是堅持參與，「我哋黃色經濟圈唔會因為政府打壓而消失，係要靠大家堅持」。


街坊大讚民間活動：同一理念走埋一齊

特意從屯門來到西營盤逛山城年宵的黃小姐和石先生，挑選的心頭好是港式茶餐廳的茶膽，滿足地指「第時可以用嚟沖茶用！」。對於活動舉辦阻撓重重，石指一直希望活動能成功舉辦，「始終係香港人第一個搞嘅年宵」。兩人指，民間年宵與往年維園年宵大有不同，「賣啲嘢都特別啲，有手作番梘嗰啲，都幾得意」，而氣氛一樣熱鬧。被問到會否擔心稍後有衝突發生，石指「我哋（市民）唔會作出挑釁㗎，但另一邊就唔知喇」。

西營盤街坊鍾小姐在環保小遊戲中贏得一個小杯蓋，她認為現場氣氛很好，「各個年齡層都有，個感覺好warm。其實（活動）成個意念好好，係值得支持」。鍾大讚年宵中的貨品夠小眾和特別，民間活動亦能連結街坊，「令同一理念嘅人可以走埋一齊」。鍾指，政府現時「無所不用其極」打壓各種民間活動，「係全方位封殺你民主表達嘅機會」。被問到新年祝願，她指「希望中國政府認清而家世界嘅趨勢，唔再係極權嘅趨勢，資訊係流通嘅，你仲可以禁止到幾多人？」

-----------------------------

【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------

無懼警暴 學懂自救
《抗暴之戰●法例須知》讀果 上架
-----------------------------

【撐學生】
召集有心人 撐學生全年睇《蘋果》
立即按此