https://hk.news.appledaily.com/local/20200117/7TUKQSRREXOCDEVPOWKWLITEKA/

隔牆有耳：Popo紅隧廣告激發二次創作 - 李八方


(社內相)

香港Popo被港人唾棄已經係毋庸置疑嘅客觀事實，但佢哋似乎完全無自知之名，除咗不斷賴俾人中傷抹黑，然後繼續用警謊去澄清，仲全力展開洗白工程，亦可能驚冇人會去考警察，於是整咗個矯情文宣，用白底藍字寫上一句「如果您想守護香港」，然後下面有幾個細字叫人「請即投考」，本來呢個文宣只係喺Popo總部同一啲警總外出現，但最近殺到去紅隧港島區入口外面嘅廣告牆上（圖）。

花納稅人80萬一個月

如果做警察係光明正大行得正企得正，成個宣傳廣告板就唔使連「香港警察」四個字都唔見，如果唔係右下角有警隊個徽號，應該冇人為意呢個廣告同Popo有關，而呢個疑似開放式句子，當然難逃被網民二次創作嘅命運，大家拋磚引玉嘅下句，包括「請即支持解散警隊」、「五大訴求，缺一不可」、「必先要消滅共產黨」、「落實2020真普選」同「暴政暴警一同來擋」等，當然亦有網民心水清，認為警察唔應該再浪費納稅人嘅錢咁賣廣告。據知市場價，係一個月要成70至80萬。

八方聽聞Popo呢套新招募口號，其實係一套四款，另外仲包括「如果您想保護香港這個家」、「如果您想維護法紀」同「如果您想並肩前行」，但如果警察一直拒絕面對自己一手種下嘅警暴問題，就算真係請到新血，都只會改變到市民對警隊嘅負評囉。