故鄉。正確黎講，我已經永遠無法返黎呢個幾千公里外嘅家。

——————

我有一種基因，呢一種與生俱來嘅基因，決定左我嘅一生。

二零一四年九月。

我同三個同學放學，睇到新聞上白茫茫一片嘅畫面。同日晚上，我地就算得幾條濕左水嘅毛巾、幾個衛生口罩，已經上到去最前食蛋。個時係我人生入面，第一次發現我同好多人都擁有一種共同基因。

而個陣我地仲係初中。

二零一九年六月。

由六月九號開始，六一二、六一六，一路去到十一月中，基本上有多過一千個手足嘅活動，同好多不計其數嘅副本任務，我都有去齊。

到今日，我仲記得612 下晝三點死線嘅情況、我仲記得805戴住個filter廢左嘅3200執蛋執到要FA抬走、我仲記得我地噴字噴到上埋新聞、我仲記得1118我比幾多人踩過我嘅腳、背脊、頭，槍林彈雨嘅畫面、我仲記得第一次打副本有隊友笠水等等，呢一切回憶已經牢牢印係我心入邊面。

而好幸運地，每次我就算食幾多蛋，飲幾多水、食幾多下都好，都至少可以離到場。

但就因為一次副本衰左，絕對足夠令我前三份一人生係石璧度渡過。

出左事之後，我特登扮鎮定打比好膽小嘅媽媽，同佢講我可能要離開佢地一段時間去下旅行，因為我真係好驚媽媽會接受唔到暈低，佢已經好多次因為我出去而擔心到入醫院。

同媽媽對答左幾句，佢都係簡單講左幾隻字。我知佢唔想未講完一句完整句子就要喊，所以佢交個比電話爸爸聽。

我係爸爸面前好少喊，因為我地兩個都好大男人。係電話入面，我聽到平時好惡頂好煩嘅爸爸個把慈祥嘅聲音，我已經忍唔住，我一路係電話度不斷重覆同爸爸講「我對唔住你地」，眼淚一路流到成個電話都係。

我對唔住嘅唔單止係我呢個不孝子冇好好把握時間行孝，反之要兩老成日要擔心我出去，更加對唔住嘅係，佢地辛辛苦苦將我養大成人，比錢我去學琴棋書畫，養到我入大學，一心希望我可以係社會有所作為，到而家而家突然間話走就走，完全揼低佢地兩個孤伶伶係香港。

我最對唔住嘅係，個排為左抗爭，成個月冇返過屋企，每次都係冇事就唔搵佢地，有時先仆返去求佢地幫我。今次仲要佢地冒住冇左份糧、比人拉嘅風險去幫我。

爸爸、媽媽、我對你地唔住，辜負左你地。但我同時好多謝你地生我出黎，將呢份咁獨特嘅基因比我。

仲有細個好錫我、已經到達暮年嘅嫲嫲，我都唔知有冇機會係你走之前再摸下你個對皺晒皮嘅手。

除左屋企人之外，仲有兩隊人我都好不負責任咁拋棄左。對唔住我嘅隊友，你地嘅領袖太冇承擔，冇好似天琦嘅勇氣留低，令到你地幾乎停晒行動。

但我諗我帶你地做左嘅野，都足夠你地突破自己嘅心理關口，有勇氣、經驗去做你地想做嘅野。請時刻緊記我哋嘅初衷，承住呢份意志，將革命嘅煙火，燃盡每一個天涯海角。我會一直係遠處睇住你地，默默咁支持你地。

—————

我好記得收到消息第二朝執好晒野，攞住個行李喼行到屋企大門。我好唔中意喊，但係全家除左老豆都變晒淚人。平時好堅強、好少講野但好愛我嘅哥哥攬住我，我feel到成個膊頭都濕晒，全部係佢嘅眼淚。佢冇講野，我地心底裏都知道唔洗講啲咩，大家都淨係想感受個片刻、奢侈嘅愛。最後全家人攬埋一齊個幾秒，我永遠唔會忘記。

因為個一攬之後，我唔知到幾多年、幾多十年之後，一家人先再可以齊齊整整再係返埋一齊。

係我走嘅呢一日，我一有機會就望出窗，望下呢個既熟悉又陌生嘅香港。我話比自己知，假如自己真係一世返唔到黎，我都要記得我走嘅呢一日，香港係乜野光景。

去到機場臨入禁區前，我回頭望左一眼，我曾經擔心過個一眼會係我最後一次以自由身份望嘅香港。我唔單止驚入閘之後會我會被直接擔走，更擔心十年、廿年後先見得返個風景。

好好彩，最後都有驚無險入到閘。到飛機離地一刻，一方面慶幸離開到呢度，另一方面心底裏亦都明白呢架機唔單止承載住二百幾個人，仲承載住一個原本已經為自己未來十年鋪好路嘅青年，同佢係香港呢個家二十幾年生活嘅一點一滴、佢嘅青春、佢嘅光陰。

記得細個果陣，成日同呀爸呀媽話好憎香港，空氣又差，又多人，啲巷仔又污糟。但原來到左要走個一刻，我發覺最放唔低嘅，竟然係呢個又嘈、又多人、又污糟嘅地方。比起去外國苟且偷生，原來我更嚮往得閒落旺角督寸魚蛋、同朋友唱通K、成班friend去銅鑼灣睇場戲呢種生活。

係，我地係失敗左，好多人好似我咁都被迫中途離隊。但到左最後，你試下問咁多個真手足，有得揀，邊個會想提早畢業？邊個唔想齊人由Day1 可以一齊行到重光日? 邊個忍心抌低二百萬個手足就咁一去不返？

而且我地都成日會懷疑自己係咪真係做左condom。但請你哋唔好因為我地嘅失敗而放棄整個命運共同體，請你地話比我地知我地雖然係sunk cost但唔係condom，請你地承載住我地呢份用血淚喚醒嘅基因，反噬暴政、重光我城。

無論最後係點，我淨係知唯一一樣無悔嘅係，我擁有呢種基因。就係呢一種基因，令你而家睇緊我呢個post。就係呢一種基因，令到我地走埋一齊。就係呢個基因，我地由一班互不相識嘅人進化到成為大家嘅「手足」。就係呢一種基因，我地一齊創做左好多歷史、打破左好多不可能。就係呢一種基因，我奉獻左我嘅大半生。

我嘅基因叫「光復香港，時代革命」。



https://www.facebook.com/sfwingy/posts/2522122798113611