https://hk.news.appledaily.com/local/20191211/S5KNMRE6XDDSJB6YVOKYHNUNPQ/

隔牆有耳：之峰綠卡 藍絲循環再用 - 李八方



藍絲成日話有外國勢力，最近仲話掌握「黃之峰」移民嘅「鐵證」。咁爆？八方當然要撳入去睇睇，但睇完真係好失望，因為張「綠卡」錯漏百出，中英文名、出證日期統統寫錯。八方再對一對，原來同一張圖五年前傘運時已經用過，真係令人好懷疑，係唔係呢排區選大敗，維穩費大減，五毛連整張新圖嘅動力都冇。

真之鋒寸寫錯Zhi Feng Huang

黃之鋒本人都出po抽水，話「黃之峰」有綠卡，但黃之鋒就真係冇啦。張證英文名用大陸拼音「Zhi Feng Huang」，之鋒向五毛同和小粉紅介紹返，佢英文名叫Wong Chi Fung，希望唔好再寫錯啦。眼利嘅網民越揭越多穿崩位，原來張證1980年已經批出，仲講笑話唔講唔知之鋒原來下年40歲。

講返正經嘢，其實五毛嗰張係「就業授權證件」，只係畀美國境內非移民嘅臨時就業許可。咁綠卡係乜嘢樣？其實唔使翻牆嘅，八方試過國產搜尋器百度都搵到圖，不過一分錢一分貨，維穩費唔夠、粗粗哋都用住舊圖先，八方明白嘅。

不過都提一提五毛，根據美國法律，偽造文件係非常嚴重嘅罪行，最高可以判30年監禁，咪以身試法。