https://hk.lifestyle.appledaily.com/lifestyle/tech/daily/article/20191119/20808850


【黑鏡線索】點解抗爭要自殘 - 宋漢生


反送中一開始，不割席嘅綱領，已經顯示出香港人前所未見決心。 路透社


【黑鏡線索】

近日喺fb，大家開始發聲明洗版：「就算現在生活有多不便，本人絕不埋怨示威者，更不會與示威者割席，請香港政府死心。」朋友問，點解抗爭要自殘？

同樣距離面對中國極權引力嘅地方，台灣係其中一個。台灣勢孤力弱，求生嘅方法，係靠自由文明共同體嘅盟友，大家幫手照住。要人哋幫手照，當然可以動之以義，叫大家撐住呢個得來不易嘅民主體制。但安全計，最好加埋動之以利。始終人哋撐你都有成本，條數好計啲，出手都大力啲。


台灣為自保 狂sell自身價值

台灣嘅地理位置，本身就令佢喺亞太地緣政治裏面，好有利用同保護嘅價值。但台灣唔安於食呢條老本。全球經濟裏面，台灣最重要嘅角色，係高科技產業。例如單係一間台積電，已經好屈機。台積電起家，係當其他晶片公司行設計生產一條龍，佢就打橫殺出一條血路，專注幫人生產，結果到咗今日，喺最頂尖嘅晶片技術，佢係領先Intel、Samsung，只此一家，全地球都靠佢。

台灣面對持續幾十年嘅威脅，自保方法，係靠不斷提升自己對自由世界盟友嘅價值，令大家唔可以放棄佢。文宣組嘅任務，就係不停對外宣傳，台灣嘅利用價值。唔只係好似旅發局咁，叫大家多啲嚟旅遊消費，更加係同出面嘅人講，點解台灣，同你息息相關，Why Taiwan matters。

喺香港，不嬲有個講法，中國政權唔會搞香港搞得好緊要，始終香港對中國有好大嘅利用價值，國企集資呀、高官走資呀、科技白手套呀盛盛盛，足以自保。即係話，同台灣嘅自保，係兩種唔同嘅策略，一個，係靠自己對盟友嘅利用價值，另一個，係倚靠自己對對手嘅利用價值。


冇車搭都唔割 今次嚟堅嘅

道理上，兩個方法都通。不過香港嘅方法，作為對手嘅要害，本質上，係靠自殘嘅威脅維持，所以大前提係，個自殘嘅威脅，要令對手信服先得。即係你攞住把刀，叫佢唔好行埋嚟，但如果係人都知，你非常錫身，好怕痛，咁你把刀，你知佢知，只係道具。

777就係睇死香港人，必定會係先眨眼，所以當大家又嚟專揀禮拜日放假出嚟鳩行，第二日咪又準時趕住返工，明顯係抗爭意志有限嘅經濟動物，只係做得出無痛抗爭，然後吹噓個遊行點樣執垃圾世界第一，佢話知你一百萬人定三百萬人，量變質不變，只係陰陰嘴射呢眼，恥笑你班友。

但點知今次唔同。由前朝開始，不斷將條線推呀推，到咗777，終於推過咗臨界點。反送中一開始，If we burn, you burn with us同「不割席」綱領，已經顯示前所未見嘅決心。777面對強大嘅抗爭意志，明明有唔少撲火嘅時機，但就係唔忿氣，驚死跌入乜嘢圈套，成日幻想就嚟翻盤，誓要與民為敵，死唔回應，不惜攬炒，變成殺人政權，越踩越深，越返唔到轉頭。

「核爆都唔割」可能以為係修辭手法，咁「冇車搭都唔割」就知係堅喇啩。777幾時醒？

撰文：宋漢生
fb : sunghsblog