https://hk.news.appledaily.com/local/20191118/CBGM76S54GUGBBSAD24BPKDBRU/

隔牆有耳：
高永文狂撐警 避答催淚彈毒害 - 李八方


高永文聽到市民問催淚彈毒害，即一臉不悅。

警方喺社區濫放催淚彈，好多專家近日提出，催淚化合物（CS）因高溫燃燒會分解出超級致癌物二噁英，擔心會嚴重污染社區，危及市民健康，但日前網上有片段流傳，拍到骨科專科醫生、曾被稱為民望高嘅食衞局前局長高永文為民建聯區選候選人拉票，有市民質問佢點睇催淚彈對人體傷害，佢就一味講差人俾人掟汽油彈同腐蝕液體好慘、差人已用最低武力，一句唔答催淚彈對市民有幾傷。

片段入面，有市民問高永文，差人發射催淚彈射到成個香港都係，「我哋可以點樣處理？政府要點樣保障人民健康？」又話已有記者、前線人員證明中招，問高醫生點好。

不過片中高永文聽到催淚彈已一臉不悅，幾次唔想畀街坊問，有人更以紙牌擋鏡頭，之後又係咁幫差人講嘢，話汽油彈同腐蝕液體對人嘅身體好大傷害，又話執法人員俾腐蝕液體燒傷，喺醫院，佢哋將來面對好艱苦嘅生活，但就一句都唔答，究竟催淚彈對市民有幾大傷害，之後仲掉頭走。片段上載至群組後，惹來3,200多個「嬲嬲」，網民狠批「前高官，食屎啦！」指他「奶共」、「醫生之恥」，稱「又一利慾薰心的政棍，枉為人。」