老人家話做人要積口德，無論對方幾咁可惡，詛咒性嘅說話唔應該講。

不過我覺得如果係講事實就冇所謂：黑警係會生仔冇屎忽。

早幾日，《香城教育電視》搵到一份解放軍對催淚彈喺高溫揮發嘅成份研究報告出嚟，

指出現時警隊使用嘅大陸製催淚彈燃燒溫度過高（遠遠高出建議嘅450度），不但危險，

而且更加會揮發出山埃及其他毒性物質。然後化學阿Sir K Kwong 接力，

喺色譜分析表入面發現另外幾種致命毒物（如PCB），「毒性同Dioxin（二噁英）同級，又係油溶性，超穩定。」。

淨係呢一點已經令到我非常惶恐。

二噁英作為化學武器使用，最臭名昭著嘅例子就係美軍喺越戰時候，於越南大規模施放，含有高劑量二噁英嘅「橙劑」（orange agent）。

事緣美軍喺越南嘅叢林戰，陷入持續消耗進退維谷嘅狀況，發起爛渣就用二噁英毒死曬森林入面嘅植物。

當時好聽啲咁講就叫落葉劑，後果當然唔係咁簡單。

直接受到大劑量二噁英影響嘅人員可以講話係被毒死，但更加慘烈嘅係，由美國撤出越戰之後幾十年，

被施放橙劑嘅地區一直受到污染，持續有畸型嬰兒出生。

而且由於二噁英難以自然分解 ，一直令到相關區域嘅水源同土地受到嚴重污染，農林產品都不適宜食用。

同時，施放二噁英嘅美軍亦都身受其害。

當時參與戰事嘅美軍，回國之後患上各類型嘅癌症， 亦都有下一代出現畸胎嘅情況。

美國國防部一開始當然死口唔認，但係各類型嘅研究一路出現，始終紙包唔住火，最後國防部願意承擔因為受橙劑影響而患癌嘅退伍軍人嘅醫療開支。

呢件事係足足搞到2019年。

近日警察瘋狂施放催淚彈，終於喺尋日連東涌都放埋，18區全部有份，已經係冇考慮過係咪必要，純粹係用嚟報復。

淨係尋日喺中大已經放咗成千個催淚彈。唔好講咁樣係用嚟驅散，咁樣根本係濫用。

呢班唔讀書又唔讀歷史，對香港嘅街道同花草樹木毫無憐惜之心嘅警察，當然以為自己帶住防毒面具就可以為所欲為：

放個催淚彈又有得開槍，又唔似開真槍咁多事實，「炸下啲曱甴同黑記」何樂而不為？

但係睇美軍就知道，落藥嘅人，一樣冇好下場。

尋晚喺元朗同中大啲催淚煙，煙燻到根本乜都睇唔到，可想而知個濃度根本就已經唔係好似說明書咁講嗰種。

用納稅人買嘅槍同子彈嚟對付納稅人嘅仔女當然好爽皮，但係正如佢哋嘅四點鐘阿sir咁講，示威者可以撤退，但係警察就要留喺現場。

我都幾肯定講，吸收催淚彈毒素最多嘅物種一定係警察而唔係示威者。

再講多次，唔讀書嘅警察自以為呼吸暢順就冇事，但係佢哋唔知道通過皮膚接觸而吸收入人體一樣攞命。

而且佢哋毒害嘅唔只係佢哋自己，佢哋更加係將呢啲大陸生產嘅化學毒素遍佈全香港所有地區。


香港各區嘅花鳥蟲魚，樹木泥土，公共設施全部都受到污染，而且歷久不散。

香港市民當然被毒害，但係警察放工之後食餐飯，老婆出街買嘢，細路返學一樣會中招。

警察第時生仔冇屎忽，自己生cancer 呢啲，就係佢哋同自己落毒。

唔使示威者起佢屋企底，老婆仔女有乜嘢病變，佢哋自己都有份一手造成。呢個係事實，唔係詛咒。

為人父母，我希望前線嘅示威者面對催淚彈唔好太過冒進。經常換濾罐之餘，能夠避盡量避。

唔好暴露喺催淚煙經裏面太長時間，有機會盡快沖涼洗頭，衣物都係要小心處理。

你哋都係光榮嘅香港兒女。

報應呢啲嘢，留番畀警察就夠。陳肇始呢啲八婆就叫佢飲兩杯催淚水車嘅水，同用條脷舐下條街先。

但係年青婦女同孕婦，就最好盡量遠離受污染嘅區域，呢啲嘢影響一世，千萬要小心保重。

兄弟姊妹手足，要平安保重。



https://www.facebook.com/edkinphoto/posts/2860233904011554