https://hk.finance.appledaily.com/finance/20191112/O7J6PZLZ7KHTYHLUCUHITBNLWQ/

【大棋局 】末代來臨前之瘋狂 - Mr. Tregunter


香港已陷入人道危機，國際上救生不救死，香港人需要先自救。 資料圖片

author
專欄作家 : Mr. Tregunter

為何說末代來臨？先睇一個數據。國際金融協會統計，中國今年上半年「着草」的隱形資金高達1,312億（美元，下同）。1,312億係乜嘢概念，在人民幣貶值期間，中國資金外逃最高峯的2015及2016上半年，隱形「着草」資金亦只係800億。今年上半年條數，係當時的1.6倍。

所謂隱形資金，即係冇官方記錄靜靜雞流走的資金。冇官方記錄好難統計，但世界銀行有個方法，以資本流入量減去官方有記錄的外滙使用量，中間之差就大概係隱形「着草」資金。

再睇另一個數據。中國外滙儲備3萬億，官方公佈的外債2萬億，其中六成係短期債。大和證券估計，如果計入官方冇列入的項目，中國外債可能高達3萬至3.5萬億。除咗證券行估計，睇埋曾任台灣財政部長的顏慶章講法。顏慶章指，中共一帶一路已花費約1萬億，成為巨大的財政負擔。而中國外滙儲備入面，約1萬億係美元債，主要作為銀行間各類貸款的擔保品，唔可以隨便郁。在扣除外債下，能動用的儲備實際不多。
戲肉不在香港

最後睇第三個數據，2018年中國貿易順差3,500億。貿易戰開波，中國簽又死，唔簽又死。如按早前講法，5年內將中美貿易順差減至零的話，中國想靠貿易順差賺取外滙，將比過去20年難得多。仲未計要對美國承諾托住人民幣，期間要消耗幾多外滙。再強調一次，貿易戰兩大主要作用，其一為打開中國缺口，其二為釜底抽薪，需要時間先見效果。

俄羅斯前副總理沙赫賴點出蘇聯倒台的真相，因為社會主義，資源歸於國家，權貴無法確保自己的身家財產得到保障。所以蘇聯末代的貴權，係最支持國家轉型為資本主義。講白啲，就係分家產然後獨霸一方，身家財產得到保障。人係會根據近期的教訓而做相反之事，中共領導層顯然竭力避免中國重蹈蘇聯覆轍，乃有中國富豪被退休、國進民退、《逃犯條例》，以及6月至今的瘋狂。

再有警察開槍射年輕示威者、有交通警揸電單車撞向人群、有女受害人報案被輪姦，韓國KBS訪問香港警員，表示最少有兩宗輪姦個案。現在只有兩個結局，要麼清算來臨，局勢接近埋尾；要麼火上再加油，換另一個法相收網。香港已陷入人道危機，國際上救生不救死，香港人需要先自救。更重要的是，不久將來的戲肉並不在香港。


Mr. Tregunter
本欄逢周二刊出