May姐識用雞汁搶收視，政界乜太、即係特首夫人梁唐青儀，原來都有法寶吸引觀眾注意。登登登凳，就係「蝦碌」嘞。嗱，唔係普通食得落肚嗰隻煎蝦碌，而係「雞手鴨腳」牌出品、冇浸淫十幾廿年功夫都唔會出色嗰種。狼太對呢種「名菜」真係駕輕就熟，正牌乜太都要甘拜下風。

話說狼太噚日出席「深水埗惜福齊行動」，向在場幾十個基層公公婆婆獻技教煮甜品。「無稽」從來都係乜太入廚必落配料，狼太學到嘢呀，噚日竟然教呢班長者整中產feel嘅甜品「橙皮朱古力」，「糖」份唔低，係咪好「無稽」先？
為菜式生色不少嘅「論盡」同「失暈」，狼太都用到出神入化。先係唔識開個電磁爐，不知所措時猛問「點開㗎」？要在場人士幫忙。之後真係煮嘞，又話唔見咗支膠棒，查實只係喺爐頭之嘛！

阿伯唔受：唔係呀嘛？
自稱喺外國成日為仔女入廚，堪稱入得廚房、出得大場嘅狼太，在場卻連大、細火都唔識控制，巧妙地將「誇大」呢種材料融入菜式之中。佢教長者橙皮切條後要浸三日，有阿伯即時大叫「唔係呀嘛？」可見呢道菜幾咁受「歡迎」。而因為「時間關係」預先整定嘅「橙皮朱古力」，現場銷情唔差，可能crossover咗「蝦碌」係特別好味。

http://hk.apple.nextmedia.com/news/art/20131101/18488378