https://hk.lifestyle.appledaily.com/lifestyle/columnist/左丁山/daily/article/20190813/20747725

十年後掌舵人 - 左丁山




翻查今年2月4日本欄寫豬年立春，當日係破日（己亥年丙寅月壬申日丙午時，寅月申日，寅申相沖，兼且申亥相害），立春係破日，當然不吉。當時講過豬年要注意流水四竄為患，要防水災，千萬估唔到，林鄭月娥心急推出《逃犯條例》修訂，激發市民遊行示威，變成今日混亂局面，而年輕示威者之整體口號就是Be Water，示威遍地開花，正合水流四竄之義，釀成「水災」。邊個係始作俑者？當然係林鄭，佢就係製造混亂局面，令香港懼恐，北京氣頂，台灣隔岸觀火，特朗普有新籌碼與中國談判貿易戰，林鄭不顧大局，不看國際形勢，如一個過度活躍老婦走入瓷器店，打棒球，水災就此形成。

肥仔K係80後，已非街上勇武年輕人，但80後有自己網絡，其中有不少初露頭角，已上位或即將上位嘅才俊專業人士，如醫生、律師、建築師、會計師、工程師等等，呢班明日香港掌舵人，應該十年內接掌政府、商界、科技界及專業界高級職位。據肥仔K講，呢批人以黃絲佔大多數，只有少數急於求成嘅，會投靠民建聯變成藍絲，希望更早可以做到副局長或是局長，因為在親疏有別世界，做民建聯係識時務者為俊傑，跟泛民走，一定會被政府列入黑名單也。

問題係有咁多黃絲精英十年內接管不少功能組別，民建聯工聯會嘅人才多數係second tier級數，搵個曾鈺成接班人都難，特區政府將來揀人會好頭痛，假如情況不變，2027年受欽點嘅特首，大概只會有成班類似劉江華咁嘅人才來做局長，律政司司長要揀到梁美芬，該煨未！肥仔K班朋友之中，有一位係劍橋大學畢業生，返到香港之後，讀JD然後考到律師牌，本可到大律師行搞IPO搵真銀，但呢位仁兄竟然選擇到小型本地律師行，任人權律師，近月忙到氣咳，頻頻撲去警署或法院，為年輕人服務，肥仔K問佢點解唔搵銀而去搵辛苦，呢位劍橋精英話：「入劍橋初階已讀羅素、維根斯坦打基礎，然後讀尼采、康德、沙特，既然做咗律師就應該陸續為真正需要法律公義嘅人服務，唔應該為搵錢而搵錢。」此乃通識教育之真正意義，劍橋大學之通識教育自然重視人文精神與明辨思維。肥仔K在大學亦讀過洛克、盧梭、黑格爾與馬克思，最近有感林鄭之頑固，特別重溫社會契約論。佢問：「你估林鄭在港大有冇讀過Social Contract呢？」左丁山只能講一聲：「木宰羊！」

左丁山
電郵 :[email protected]

上一則
上一則
各自虛假 (陶傑)

下一則
下一則
誰還可以既心痛又中立 (林夕)