https://hk.news.appledaily.com/local/daily/article/20190712/20726898


隔牆有耳：怕市民狙擊 受訪要人陪
膽小如鼠王芬喊驚 - 李八方


着住白絲襪嘅梁美芬，噚日見記者時雙手握實，似乎真係好驚。


經民聯梁美芬之前喺立會外咪兜見完記者後，被巿民追住嚟鬧，又俾的士司機拒載，搞到鼠王芬要縮返入立會大樓，呢單嘢仲俾人拍晒片放上網，俾網民拎嚟恥笑，原來梁美芬真係怕俾人狙擊，搞到佢噚日再喺立會外咪兜見記者仍猶有餘悸，不但要助理全程「保護」，一完記招竟然連問題唔多想答，想急急腳縮返入立會大樓，怕又俾市民狙擊。



林卓廷斥心虛

噚日朝早，梁美芬已聲稱至今喺立法會有「不安全感覺」，結果俾民主黨林卓廷力斥「心虛」，話佢因為早前扑咪時，曾被市民追住鬧，所以先話立會唔安全，不過佢下午仍然要硬住頭皮去立法會外咪兜，就佢近日頻頻狙擊嘅通識科發表偉論，但佢今次明顯有晒準備，叫幾個助理陪佢見記者，原來佢話噚日同咗教育局局長楊潤雄反映，通識科唔應該被列為必修科目，並指坊間好多人憂慮通識科會提供咗空間「令年輕人政治狂熱」。


「驚等陣有人圍我」

佢除咗受訪時重提早前受到市民狙擊一事，形容自己受到「無理滋擾」外，更喺簡單答完中文問題後，連記者嘅英文問題都唔想答，話自己唔使再用咪兜，就想快閃離開，其間佢向記者坦言：「因為我驚等陣又有人圍我哋，我想保護我啲職員，我唔想佢哋嚇親！」之後在場傳媒同佢講，示威者已經走咗，向佢大派定心丸後，梁美芬先至歸位繼續答問題，其實出得嚟行就預咗要還，梁美芬冇理由唔知吓嘛！

李八方



上一則
上一則
江湖滾熱辣 (馬龍)

下一則
下一則
隔牆有耳：立會大清洗 睇漏X你老母 (李八方)