(Credits: Pat Bagley/Salt Lake Tribune)

「♪ sing hallelujah…sing hallelujah…sing hallelujah to the lord…♪」

由於近月示威強大僧侶部隊嘅不停洗腦，小弟最近腦海不時響起哩首聖詩嘅旋律，感覺開始出現幻聽同有啲思覺失調…有見及此，「受神感召」下，小弟決定開始「神話」物理系列，用物理學「傳教」 ，向大家介紹同討論一下物理學中嘅「神獸」同「鬼神」啦！第一炮當然就係講解物理學中嘅「上帝」—「上帝粒子」啦！

「上帝粒子」係乜？

喺2012年，參與CERN大型粒子對撞器（Large Hadron Collider, LHC）實驗嘅CMS同ATLAS團隊終於宣布發現咗物理學界一直搵咗好耐嘅希格斯粒子（Higgs particle），亦即一般人從科普聽過、傳媒口中「萬能（？）」嘅「上帝粒子」。哩個發現亦理所當然咁令最先提出同建立希格斯粒子理論模型嘅理論物理學家希格斯（Peter Higgs）同恩格勒（François Englert）獲得2013年嘅諾貝爾物理學獎#[1]。

#其實當年同一時間仲有理論物理學家基博爾（Tom Kibble）、古拉歷（Gerald Guralnik）、哈根（Carl Hagen）佢哋嘅團隊獨立研究同提出相類似嘅模型方案[2]。不過由於有各諾貝爾獎每年得獎者最多只可以得三位哩條不合時宜嘅規矩，佢哋最終被評審「放棄」，冇入到得獎名單…所以（理論物理）學界一直有個笑話，話如果你想攞諾貝爾嘅話，你發表論文時千祈唔好落多過3個人名，好似係

希格斯粒子可以話理論粒子物理學標準模型（Standard Model）嘅最後一塊拼圖，解釋咗現實世界中好似夸克（quark）、電子等有質量嘅基本粒子佢哋嘅質量點嚟。希格斯粒子係玻色子（bosons）嘅一種，係量子純量場希格斯場（Higgs field）嘅激發態。純量場（scalar field）係物理場嘅一種，好似一個空間入面嘅溫度或氣壓咁就係簡單嘅純量場例子。希格斯粒子模型背後機制涉及自發對稱破缺（spontaneous symmetry breaking），而本身應該冇質量嘅基本粒子就係通過同希格斯場嘅耦合先至變成有質量。


https://milkywaymusings.tumblr.com/post/26571686087/what-is-a-monumental-scientific-discovery-without

「上帝粒子」哩個希格斯粒子嘅暱稱係出自理論物理學家利特文（Leon Max Lederman）佢本科普著作《上帝粒子：如果宇宙是答案，那麼問題是什麼？》[3]。佢之所以改哩個名係因為佢認為希格斯粒子喺「當今物理學中處於極為中心嘅位置，對我哋理解物質嘅結構極為關鍵、又極之難以捉摸」，不過更多係因為出版社唔畀佢用另一個更貼切嘅名—「該死的粒子（Goddamn Particle）」，好似係。結果傳吓傳吓，坊間個個都叫希格斯粒子做「上帝粒子」，冇人「再記得」希格斯 …雖然哩個暱稱的確好「吸睛」，成功令更多人注意同引起大眾嘅興趣，不過事實上希格斯粒子又係唔係真係咁「神」，解釋到物理學上所有嘅謎團呢？