致上一代：我們上街，因為我們愛你們

https://www.facebook.com/hklsd/videos/1375453002594860/


致上一代：我們上街，因為我們愛你們

社會民主連線


【致上一代：我們上街，因為我們愛你們】

我係一個90後，今年六月，時間好似特別長。過去一個月，我參加咗好多遊行示威。6月12日，催淚煙籠罩金鐘，好多人因為警察暴力而受傷。現場除了學生，仲有好多中年人同埋退休長者。我冇忘記，有一位母親為了保護我們，站在警察防線前面，聲嘶力竭勸阻警察繼續開槍。佢叫城姐。我冇忘記，有一位綠衣伯伯，即使身患第三期肺癌，但他仍然決定走上前線，最後他中槍倒地。佢叫老吳。

我知道，你地當中好多人都好關心呢件事，如果唔係，就唔會有使人動容的一百萬人遊行，二百萬人遊行。6月14日，就唔會有6000人參加「香港媽媽反送中集會」。我永遠都不會忘記那塊寫住 「Don't shoot our kids」的手舉牌。我知道，你地都好唔明白，點解我地既香港會搞成咁。點解行政長官，會硬推一條對香港人冇好處的既惡法。最後搞到民怨沸騰，全城鬧爆，但她不要說問責下台，就連鞠個躬都唔肯。

我知道，你地當中部份人，可能真係對成件事唔係太了解。香港人工時極長，是世界第一，樓價屋租又貴。要撐住頭家，已經好辛苦，仲邊有咁多心力去分辨，政府講法邊啲係真邊啲係假？但是無論你地明唔明白也好，我都想向你地解釋，點解咁多人要反對送中惡法，係因為我地愛呢個地方，我們很愛這個與我地一齊成長、同埋生活既香港。其實如果安份守己的話，那天我們可以舒舒服服在家嘆冷氣，冇人會想日曬雨淋去示威，無人會想去食催淚彈，甚至中槍，攞條命去搏橡膠子彈。但係我地真係冇辦法啦。

好多上一代人，當年都係走難落來香港，或者從大陸移民過來。點解要來香港？無非係因為香港有更好的制度，即使現時都係有錢人話哂事，但至少唔使擔心食到毒奶粉，唔使擔心有豆腐渣工程，無端端會變成低端人口，亦唔使擔心鬧下政府，就要坐三五七年監。但我地都心知肚明，中共正在逐步收緊香港自由和民主。這送中惡法只不過是第一步棋。30年前好彩有你哋曾經走上街頭，聲援八九民運。30年過去，其實我哋同當年既學生一樣，都只係想呢個社會變得更好。國家是我們的國家， 人民是我們的人民， 政府是我們的政府，我們不喊，誰喊？我們不幹，誰幹？

我知道，你哋好擔心我地安全，擔心我哋受傷，擔心我哋會被呢個專制政權秋後算帳。我知道，你哋都想我地將來可以出人頭地，在社會發揮所長，可以過好既生活。但係，細個讀書就要學仁義禮智，大個出來做事就要埋沒良知？我做唔到。我哋都知道當差一入職就有兩萬幾蚊，而且年年加人工。但如果要我去做獨裁政權的政治工具，我寧願做一個被打壓既示威者。

今日香港，有錢既準備移民，窮既就連養老都唔知夠唔夠。香港每年都有五六千人，排到死都輪唔到資助安老院舍。年青人固然望唔到自己既未來，但首先望唔到既，可能係您們，即是我哋上一代人既退休生活。林鄭月娥有錢做我們不要的明日大嶼，但卻冇錢做全民退休保障。我真係唔知道，呢個政府幾時先會肯真正為人民服務，而唔再只為中共服務。我只係知道，我地要守護住呢個地方。呢個六月，已經有二百萬人上街反惡法。我明白，對於好多人來講，要踏出第一步從來都唔容易。尤其是有工作在身的人，罷工並唔係嗌一句口號咁簡單。但我都衷心希望，有朝一日，可以在遊行場合見到你哋，一齊守護我們的香港。

90後年青人上