https://hk.news.appledaily.com/local/daily/article/20190521/20683267

蘋人誌：
做不了劉華 無所謂
我追求good take 岑珈其



近來岑珈其又登上電影院銀幕，這次他在港產片《非分熟女》中，客串飾演紅頭髮的廚房仔阿肥。只是，這套電影僅因女主角阿Sa在戲中的「性感大露背」而掀起點點波瀾──在超級英雄片《復仇者聯盟4》的強勢來襲下，電影上映不夠一個月便無聲無息地下了畫，彷彿不帶走一片雲彩。

對此，岑珈其也習慣了。從影12年，他去年終於擔大旗，在《非同凡響》中飾演男主角。電影贏盡口碑，叫好又叫座，但能叫出他名字的觀眾又有幾多個？今時今日的香港，明星已是上一代的產物；但即使做不了明星，岑珈其也無所謂。「我只想畀人知道，我係一個專業演員。我覺得咁已經好足夠。」

記者：陳芷昕
攝影：MICKEY

上月舉行的《第38屆香港電影金像獎頒獎典禮》，請來32位香港新演員擔任司儀和表演嘉賓，岑珈其是其中一個。他與白只一同頒發「最佳男配角」前，來了場互相挖苦的脫口秀。「我第一套電影，《踏血尋梅》，2015年，你呢？新人！」 首次拍電影，就憑飾演戲內殺人犯一角而奪得第35屆金像獎「最佳男配角」和「最佳新演員」兩個獎項的白只，意氣風發地揶揄岑珈其。被稱為「新人」的岑珈其也不甘示弱，謙虛沉穩地回應白只的質疑：「我第一套電影，《烈日當空》，2008年。」語畢，台下笑聲雷動，連白只都不禁馬上「擦鞋」，急喚岑珈其為「前輩」。

嬉笑怒罵的背後，是香港新一代演員的唏噓。從2008年走到今天，連岑珈其自己也驚呼：「原來已經十幾年。」那年，他是一個16歲的中五學生，不愛讀書的他食煙飲酒講粗口，放學後就與幾個好兄弟一起到屯門碼頭旁邊的球場踢足球。恰巧，導演麥曦茵正為即將開拍的《烈日當空》搜集資料，那是一部講述青春叛逆和迷失的電影。球場上的大夥兒，就這樣被相中。其他兄弟愛理不理，唯獨岑珈其一聽到是要演戲，就興奮莫名，甚至在面試時臉不紅氣不喘地窮追猛打：「你係咪真係可以畀我哋做演員㗎？我做『茄喱啡』都得㗎！畀個機會嚟呀！』



藝訓班首輪面試出局

原來成為演員是岑珈其從小到大的夢。「小學時寫『我的志願』，好多人都會寫警察、消防員、律師、醫生。我全部都覺得好型好想做，死啦咁做得邊樣？」後來，他從公仔箱中得悉演員這個職業，「演員就係可以演活不同角色。我就決定要做演員，因為想咩都體驗。」但沒有行動的夢想，終究只是空想。一直只是「得個講字」的岑珈其，突然得到天降下來的大好機會，當然在麥曦茵面前，出盡九牛二虎之力游說──因為他的強項就是不斷說話。最終，大夥兒中長相俊美的林耀聲被選為男主角，岑珈其也獲分配飾演配角「肥毛」。

拍過一次電影後，17歲的岑珈其對演戲更是上癮，也因為有了方向，壞學生也開始想要努力。「我由細到大都好曳，冇咩人理會，講咩都唔聽，又冇諗過做咩工，淨係覺得群住班朋友就好開心。諗將來？儍㗎咩。」《烈日當空》中的肥毛，又打架又吸毒，他直言自己就是翻版肥毛，只差沒有吸毒而已。「但做過一次演員之後，原來我真係鍾意，就諗辦法繼續做落去。」會考過後，岑珈其沒有再讀書，決心要成為演員。只是，真要成為演員又談何容易？一路上，他踽踽獨行，走得東歪西倒。學歷不足而不能報讀演藝學院的他，就決定申請TVB藝員訓練班，但在「係人都入到」的第一輪面試後，岑珈其就出局了。好歹也曾拍過電影啊，為甚麼呢？「因為我外貌真係好唔吸引呀嘛。我去到面試時，真係個個高大靚仔，得我一個係咁矮。」雖然在自嘲，但他的語氣不帶一絲自憐。「我明嘅。」


首部參演電影為2008年《烈日當空》。

做不了全職演員，岑珈其於是不斷打散工，零售、司機、地盤、磨雲石、燒烤場、地產、保險──各行各業他幾乎都做過了。打散工，除了因為要賺錢養活自己和給家用，也是為了預備演戲。「冇一份長工係可以畀你係咁去casting。如果你突然同老細講：『我想請七日假拍戲。』老細只會話：『咁你唔使返工啦。』」也曾有不少人對他冷嘲熱諷：「不如算啦，你唔好諗做咩演員啦，做吓特約臨記咪算囉。」但他聽到就會生氣，認為這是侮辱了演戲這個神聖的藝術。「你覺得係求其打份工，但我目標係做一個專業演員。你打工會覺得時間好難捱，但如果你視嗰樣嘢為夢想、事業、專業，你就會想做得更好。作為演員嘅專業就係：唔係要做到，係要做好；唔係呢個take ok，係呢個good take。」


2015年在《點五步》飾陳強，開始為人熟悉。


憑《點五步》為人熟悉

等待機會的日子又過了兩年。有天，麥曦茵突然致電他，得悉他的境況後，決定成立演藝製作團隊Dumb Youth。岑珈其加入後，與另外三位男藝人組成男子組合PlayTime，一起練習和表演唱歌、跳舞、魔術、戲劇等不同技能。大大小小的機會，他們都絕不放過，則便是社區會堂和幼稚園的表演。「人哋冇機會畀你時，你就自己製造機會，同人講我哋係表演者。」

然而，這也是岑珈其最徬徨的時候。成為全職表演者後，的確比以往多了表演的機會，但不是所有工作都有酬勞。說起當時他要伸手問家人借錢度日的一段不堪歲月，他仍靦腆苦笑。「你諗吓，22歲仔都未畀家用喎，仲要問屋企人：『可唔可以畀少少錢我？我冇錢食嘢搭車。』係好灰心。真係。」做地產經紀的大哥看到其潦倒，也叫他不要再發明星夢，不如一同投身地產行業賺錢。反而二哥見證着岑珈其從一個漫無方向的調皮小子變得成熟懂事，決定暫時代他給家用，以支持他發展演藝事業。這讓岑珈其更無後顧之憂，決心全情投入。


去年與余香凝主演《非同凡響》，贏盡口碑。

往後幾年，岑珈其陸續接拍香港電台的電視劇和學生電影作品。不是大電影，甚至非次次做主角，但他仍然珍惜每一個得來不易的機會。「『沒有小角色，只有小演員。』點解做配角、客串唔得？你能將嗰個崗位發揮到極致，都係演員嘅本事。」沒戲可演的時候，他就盡力學習任何與演戲相關的知識和技能以增值自己。「學多樣嘢冇壞。好似我天生冇拍子感，所以我學結他、學琴。當導演問你識唔識音樂，我識喎。你要叻啲嘅，我咪再苦練囉。」2015年他飾演香港棒球電影《點五步》中陳強一角，原來也是靠自己苦練棒球而得來。當時，PlayTime四子獲得電影面試機會，最後只有林耀聲得到導演青睞，被選為男主角之一。落選的岑珈其沒有因此灰心，反主動與林耀聲一同練習棒球，導演終決定讓他參演。對岑珈其來說，機會從來都是自己主動爭取而來。既沒有高大靚仔的先天優勢，也沒有特別耀眼的才華，可以做的，就只能靠自己默默耕耘，以換取別人的注意和認同。


上月金像獎頒獎禮，岑珈其任司儀時遭白只（左）揶揄。

從《烈日當空》起走過七年時間，岑珈其憑《點五步》開始為人熟悉。至去年，當時已是27歲的他終於首次擔大旗，在電影《非同凡響》中飾演男主角。電影贏盡口碑，也令更多香港人認識岑珈其這個演員。這條逐夢的路，終歸走得順遂了吧？「唉，前路茫茫呀。」他為着香港電影的前路而灰心無奈。「前幾年咋，一年香港電影有百幾套，一路減減減，對上嗰年得番50幾套，咁點算呀？」他直指香港電影吃力不討好。「大家都畀心機做，但好似做極都做唔到。你話𠵱家好多人上網睇戲？咁Marvel頭兩日就有二千萬票房係點嚟？所以係有人入戲院睇戲，但係唔睇你港產片箒。」就連戲院也「妄自菲薄」，把黃金時段送給叫好叫座的Marvel，港產片只落得填補早晚場空隙的慘淡下場。

身為香港新一代演員，是生不逢時；打造粒粒巨星的香港電影夢工場，已是昔日童話。即使如岑珈其做過電影男主角，更幾乎在多套港產片都有亮相機會，也對自己的演戲生涯感到惆悵，「個個都話我多產，一陣冇人搵我開工就死，𠵱家都冇人搵我開工㗎。」他又苦笑。對於因拍電影而成為明星，繼而大紅大紫、大富大貴，他不曾幻想。「游學修講過：『明星係來自作品。你冇作品，唔會造就到明星，因為你冇代表作。』點解我哋呢輩難啲，係因為我哋冇咁多機會拍戲。以前多戲，唔得我捧到你得為止；𠵱家你拍一套失敗咗，你唔使旨意再拍啦。」


成長於屯門良景邨的岑珈其以前不愛讀書，16歲時意外被導演麥曦茵發掘，開始演員生涯。


親力親為到戲院謝票

但即使做不了如劉德華、梁朝偉般像置身空中樓閣的偶像明星，岑珈其也覺得新一代也有新的方式，就是走貼地路線，如親力親為到戲院向觀眾謝票。「我覺得係一件開心事，可以親身感受到觀眾嘅掌聲。唔好講到求咁慘，係真係要多謝佢哋，因為佢哋肯入場真金白銀睇你套戲。」

更何況，對他來說，路過能否被人認出是「《非同凡響》岑珈其」其實毫不重要，他只願有繼續拍電影的機會而已。「我29年人，呢個係我唯一嘅夢想，係我認為自己唯一可以做好嘅嘢。如果我咁都唔堅持做好佢，咁我都冇資格生存為人啦。」咁嚴重？「係呀，如果我作為一個人，我搵到樣咁熱愛嘅嘢，我都唔堅持，咁講咩箒？」說來雲淡風輕，夢想二字，一點也不沉重。

上一則
上一則
他們曾說過……

下一則
下一則
血腥性侵不文鏡頭成烙印 網絡審查員心理受創