人民力量創辦人黃毓民同有「141主席」之稱嘅劉嘉鴻唔妥，早前退出人力。唔知係咪覺得要問責，劉嘉鴻前晚喺執委會辭任主席，但執委會暫時擱置處理，直至下月中執委會再議決，其間副主席甄燊港會暫代處理主席職務。「141主席」忽然求退，八方都好想知道原因，但噚日call咗佢成日都冇覆機，唔通冇乜心情？甄燊港透露，劉嘉鴻一早表明有意放低主席工作，抽多啲時間發展事業，相信毓民對佢嘅指控，係劉嘉鴻決定辭職嘅導火線，坦言劉嘉鴻其實受咗好多委屈㗎。甄燊港無意做正式主席，但有人蠢蠢欲動，據聞馬草泥任亮憲有意參選，花生價肯定又急升咯。