HKGalden音樂臺
發表文章發起投票回覆
蘋人誌:「哭泣聲啜毛姨姨……」 高登音樂台勝在夠「膠」
https://hk.news.appledaily.com/local/daily/article/20190129/20601719

2019年01月29日

蘋人誌:「哭泣聲啜毛姨姨……」
高登音樂台勝在夠「膠」


高登音樂台開台年半,團隊繼續開枝散葉,目前忙於拍宣傳片招賢納才。

本年度香港音樂頒獎典禮比音樂本身更有話題性,繼古天樂憑半首歌奪得「我最喜愛男歌手」後,在《勁歌金曲頒獎典禮》首奪「最受歡迎女歌星」的菊梓喬再令人譁然:「邊個嚟?」時移世易,從30年前的梅艷芳,到今天的菊梓喬,不少網民重提黃家駒名句:「香港只有娛樂圈,沒有樂壇。」坊間「廣東歌已死」的論調不絕於耳。

但以下這個「大台」的派台作品,或許總有一首你曾聽過,甚至琅琅上口──「條女很清楚收兵好過嫁人」、「肥仔一跌落渠就連部單車都失去」、「我是一個西伯利亞人 冬天的冠軍」……單看這些「有聲」的歌詞,是否已能勾起你對廣東歌的點滴回憶,讓你會心一笑?

這個「大台」,是高登音樂台。

記者:陳芷昕
攝影:王子俊

菊梓喬同門師姐吳若希在《勁歌》後接受訪問時,表示就算「造畀」菊梓喬都好應該:「𠵱家有邊個MV差唔多隻隻有過百萬hit rate?」然而,在這個廣東歌仿似快將無人問津的時代,高登音樂台的作品卻能逆流而上。單看去年9月改編自《香港早晨》主題音樂的一首《香港早抖》,目前在facebook點擊率已過百萬。「奴隸 你要返工/香港永遠不變/奴隸 記得返工/天災也決不變」,傳神改詞加上港人大排長龍也要擠上地鐵趕返工的MV片段,曲線盡顯港人即使面對颱風「山竹」也仍然心繫工作的精神,讓一眾網民聽得又笑又喊,甚至留言爭取《香港早抖》成為「香港國歌」。


負責唱歌的漏奶戴面具受訪,不失「膠」味。


音樂總監法印先將歌曲拆解,加入適當樂器伴奏,過程大概需時一、兩星期。


「高登最高汁 就係屎尿屁」

這背後的音樂團隊神秘兮兮,甚少人知道其廬山真面目,唯一可靠情報是他們的高登討論區會員名稱,網絡亦盛傳他們人人「會考30分、身高180cm」。這日記者深入高登音樂台位於元朗工廈的基地,與九位巴打聚首一堂。記者先起起底:「邊個做咗高登會員10年以上?」六隻手馬上高舉。他們不只見證高登討論區這些年的起跌盛衰,亦是高登二創改詞文化的始祖之一。2000年初,高登只有吹水台,創意台尚未面世,比起改詞,更多人改圖;至2002年,改詞開始蔚然成風,較受歡迎的是「接龍」作品,即合巴打、絲打之力,一人接一句地填完一首歌,不少膾炙人口的惡搞之作由此誕生。

由網上討論區的一個分版到成為實體樂團,一切由「女版李彩華」開始。2017年,原本各自創作的幾位活躍會員決定合力惡搞,把歌手李彩華的經典金曲《你唔愛我喇》改編為《你唔拜我喇》。今次他們不只改詞,先由QBear2nd聯絡李彩華與巴打合唱,A仔負責處理道具和交通等幕後工作,雞丁和漏奶負責處理劇本、MV拍攝和剪接。歌曲旋即在網絡成為話題之作,幾位巴打亦越玩越起勁,後來再移師到本身就是同團band友的巴打漏奶、菲律賓男神和法印位於元朗工廈的band房。短短年半之間,高登音樂台成員逐漸擴充至30多人,年齡為20至40歲,都是高登巴打、絲打。他們目前已發佈57首二次創作廣東歌作品。

環看這個基地,除了高登標誌的貼紙和公仔擺設外,都是樂器和錄音器材,與一般專業studio無異。本身玩古典和爵士音樂、在團隊中擔任音樂總監的法印解畫:「我通常做第一步,拆解首歌入面有乜嘢,整番個設計圖,睇吓有乜樂器要錄過。菲律賓男神加鼓同結他,我就負責琴、弦同吹奏樂器,OK晒就出譜畀人唱,呢個過程用一、兩個星期,處理晒就交畀佢哋錄音、mixing、出咗隻歌,再去拍MV。」

高登音樂台製作認真,但本質仍然是惡搞,雞丁不諱言:「高登最高汁就係屎尿屁,我哋啲歌去廁所冇廁紙又有一首、冇沖水又有一首。」二創歌詞無厘頭兼無底線,卻成功使一眾網民拍案叫絕。到底靈感從何而來?填詞人之一的A仔說:「我哋通常都係亂嚟。星星之火可以燎原,邊個衰多口講咗一句,就會開始作埋後面,咁就可以引嚟好大嘅生態災難,會笑死好多細胞。」像改編自張學友《李香蘭》的《記得Save》就是這樣誕生,漏奶說:「雞丁有日無啦啦hang機,我講咗句『記得Save』,竟然同首歌啱音。」話口未完,九位巴打齊齊大合唱:「記得save,要加title記得save……」

一切都是毫無預兆,靈感話來就來,所以舉凡日常生活瑣碎事乃至社會大事,都可以成為改詞主題。去年10月,大嶼山人工島工程引來大量市民反彈,恰巧填詞人樂詩人從王傑《幾分傷心幾分痴》的首句「哭泣聲絕無意義」聯想起近音異字「啜毛姨姨」,由此一觸即發改寫全曲:「哭泣聲啜毛姨姨/公帑浪費幾千億多爭議/但市民反應都好似好參差/假諮詢絕無意義/虛構問答會諮詢多諷刺/若要填海影響生態請三思。」更親身上門與立法會議員毛孟靜拍MV。

樂詩人說:「一開始就係想透過搞笑或惡搞嘅形式,吸引人睇同自己切身嘅時事。好似歌詞入面,我覺得人工島有乜唔好,就全部填晒落去,畀啲本身對時事冇乜興趣嘅人,笑吓之餘,喺歌詞入面了解吓係乜嘢事。」高登音樂台亦時有「踩紅線」之作,去年就有巴打將許志安、車婉婉的《會過去的》改編成《我去你的》,以表達對施政報告不滿:「幫黨國 甚麼 我要變賣 甚麼/當逼到要說港獨時有幾火/英美 甚麼 誰能留戀 太多/當天貴國也要背靠我/他朝想陰乾香港/支爆未算坎坷。」A仔說:「寫貼地同現實嘅歌,某程度可以幫香港人紓解壓力;心入面想講但唔知點講或唔敢講嘅嘢,可以借惡搞歌詞同音樂去抒發出嚟。」

只是,這一眾沒有底線的二創音樂人,還可以在網絡上放肆多久?面對蠢蠢欲動的網絡23條,QBear2nd心水很清:「其實香港好多法律係冇人執法㗎,你亂過馬路有冇人執呀?所以到最後係睇執法,而唔係睇立法。𠵱家網絡23條嘅版權條例係極窄,但佢唔執法;如果23條放寬咗,但佢執法,對我哋都有影響,係潛在恐懼。」

醞釀多時的《國歌法》本地立法草案終在本月出台,列明任何人公開、故意篡改國歌,或以歪曲、貶損方式奏唱國歌,最高可判監三年、罰款5萬元。一眾巴打直言:「根本係選擇性執法,想捉本身比較敏感嘅人。」外界把矛頭指向他們,但他們未驚過:「我哋只係想維持高汁嘅作品,我又唔係改國歌,有乜好改箒?國歌好聽咩?而且我哋改嘅都係令人有共鳴嘅歌,國歌對香港人嚟講冇共鳴,冇人識。」


「明日大嶼」惹來全城爭議,填詞人樂詩人從王傑《幾分傷心幾分痴》首句「哭泣聲絕無意義」聯想起近音異字「啜毛姨姨」,由此改寫全曲。


《香港早抖》曲線盡顯港人面對颱風「山竹」仍心繫工作的精神,網民奉為神曲。


音樂台2017年把李彩華經典金曲《你唔愛我喇》改成《你唔拜我喇》,還邀李彩華與巴打合唱。


「只要個腦仲喺度 就有得玩」

政治無法影響高登音樂台繼續創作,反而是廣東歌沒落,讓二創空間收窄,「𠵱家一來廣東歌佔有率低咗,多人聽K-pop;二來𠵱家主流廣東歌唱片公司做得太保守,唔會夠膽做啲太challenging或有變化嘅歌,變咗做來做去都係嗰種。大佬,我以前都聽過一轉,我𠵱家仲聽咩?」曲變得平平無奇,詞同樣每況愈下。「07年左右,都仲有啲《陀飛輪》、《囍帖街》,雖然都係K歌,但都會有啲道理喺入面。𠵱家首首情情塔塔,咩俾人飛咗痛苦到不堪,你對住班毒L sell情歌把咩!」改歌,首先歌曲要讓人產生共鳴,人聽到當下才識笑,但當香港人已不再聽廣東歌,可以二創的廣東歌也就越來越少。A仔說:「其實二創喺《100毛》後空間相對細咗,我哋都將沙漠上最後嘅水源都榨乾榨淨,改改吓冇歌好改,只能夠重複。」

但創意無限的巴打們深信,二創永不過時,永遠有得繼續玩,只是要轉換形式罷了。A仔說:「其實同開採石油一樣箒,咁你攞咁多年,地下嘅石油始終有限㗎嘛;歌一樣,你採晒咪研發天然氣、再生能源囉。」二創逾十多年,他們從改廣東經典金曲,到近年開始改《香港早晨》和《六點半新聞報導》等純音樂,甚至改編MV,二創的空間仍然源源不絕。雞丁大膽講句:「只要個腦仲喺度,就有得玩,除非冇人再作曲。」


「惡搞都係 一種才華」

他們甚至相信,二創或可重新掀起廣東歌熱潮。樂詩人說:「我哋冇咗唱片公司嘅束縛,就乜都可以玩,政府又講得、性小眾又得、古靈精怪又得。唔理係改以前定𠵱家嘅歌,可能佢本身聽開韓文歌,都會令佢覺得原來廣東歌都幾得意,返去聽吓。」除了嘗試多元題材外,他近期更開始純用廣東話填詞:「好似以前許冠傑、尹光咁,比較入腦、貼近大家嘅歌詞,可能令大家更有共鳴。」

一眾巴打雄心壯志,若單以一個「膠」字概括高登音樂台,或許有失公道。但他們話之你點諗:「惡搞都係一種才華,我哋就係贏喺個『膠』度。」卸下網絡創作人身份,現實中的他們是廣告人、工程師、麵包師傅……惡搞純屬業餘興趣,但其實忙過返工,目前錄製新歌之餘,更忙於拍宣傳片招賢納才,繼續開枝散葉。

個個瞓身投入,因預視高登音樂台有機會發達:「我哋冇資金背景嘅都上到大台,即係的士台。」又說:「做音樂都搵到啲嘅,facebook有冇十蚊?」眾人起哄之際,細細粒的開台元老雞丁小聲說:「我形容好似種咗盆花,種到好大棵,唔想因為阻碇就丟咗佢。種得耐有感情,好愛呢盆花。」只要有人聽,有人識得跟住唱、跟住笑,就會有高登歌。

上一則
上一則
港大生倡設七提委揀校委會主席

下一則
下一則
港聞專題:結束亡夫種植園老闆娘義賣珍品 蘭花香永續
Good0Bad0
2019/01/29, 9:23:32 晚上
引用快速引用
本貼文共有 3 個回覆
屌你呀 高登
#12019/01/29, 10:12:22 晚上
引用快速引用
#22019/01/30, 12:45:04 凌晨
引用快速引用
wfc?
we have 膠登音樂台
#32019/01/30, 1:13:05 凌晨
引用快速引用
發表文章發起投票回覆
請先登入以發表回覆