https://hk.entertainment.appledaily.com/enews/realtime/article/20190117/59154020

「內地版」鹹蛋超人電影《鋼鐵飛龍之再見奧特曼》2017年上映時，被擁有鹹蛋超人版權嘅圓谷製作公司稱侵權提告，點知官司都未打完，《鋼鐵飛龍》續集《鋼鐵飛龍之奧特曼崛起》已製作完成，並安排聽日於內地上映。

《鋼鐵飛龍之奧特曼崛起》繼續由廣州藍弧動畫製作，故仔講「奧特曼」即係鹹蛋超人，揀咗一個平凡男孩做伴一齊拯救地球。去年內地製作方堅稱自己係攞正牌拍攝，反而日方就指佢哋侵權，而於日方再三警告下，內地公司一於少理繼續拍續集。

日本近日都有就「內地版」鹹蛋超人上映作報道，佢哋形容中國侵權文化已經唔係今日開始，一句話「冇侵權」就製作電影續編，一啲罪惡感都冇。圓谷方面就稱，被告方繼續製作鹹蛋超人電影及發行係侵權行為，將會採取相應法律行動。