https://hk.entertainment.appledaily.com/entertainment/daily/article/20190113/20589729

2019年01月13日

【娛樂人物】陳炳銓談善言心藏不露


陳炳銓與談善言在新劇中同樣有自殘戲份。


陳炳銓有個視后女友李佳芯，他坦言兩人從不討論工作，但直覺女友可以嘗試新戲路，發揮更大。自己方面，與談善言合演的網劇中，演人格分裂角色，挑戰性亦高。

陳炳銓的女友李佳芯早前奪得視后，有樣有演技，陳炳銓也是有戲之人，他和談善言合作的網劇，陳炳銓飾演人格分裂的嫌疑犯，談善言就演富家女，劇中兩人有自殘場面，有發揮的空間。陳炳銓早前與談善言接受訪問時，談到視后女友李佳芯時搞笑說：「終於問到嘞，官腔啲講，佢持續進步緊，本身都好嘅，所以畀獎佢。」至於非官腔的說法，他謂：「每個演員有嘅特質唔同，第二個copy唔到，睇你獨立性可以發揮到幾盡，佢開始發光，但仲有得去，只要開多條新戲路畀佢，佢可以更好。」



惠英紅有份演出的《心冤》，當中有不少震撼場面。劇照


求逼真撼頭埋枱

與李佳芯平日都避談工作，陳炳銓說︰「因為大家太熟悉，唔客觀，唔講好過，反而我哋會睇其他戲討論，好過直接批判佢演技。其實兩個人相處，試吓新嘢，冒險多啲，就會搵到自己嘅風格。」

陳炳銓與談善言在《心冤》沒有對手戲，希望日後有機會鬥演技，兩人說︰「我哋間接合作過多次，但正式未試過，喺劇入面我哋冇見過亦冇對手戲，但有關連。」影帝黃秋生和影后惠英紅有份演出的《心冤》，陳炳銓在劇中有不少場口都很震撼，其中一場講他用牙刷自插頸部噴血，他覺得挑戰性很大：「呢個角色因為心理創傷，所以有人格分裂。有場戲講我被紅姐拷問，當時我拍到好攰，手震震咁，要飲罐可樂補充番啲血糖。」另一場自殘戲要撼頭埋枱，導演為求逼真，不讓他用軟墊或用手墊，最後撼到額頭都紅晒，導演才收貨。

談善言經常演繹自殺角色或絕症病人，她自嘲說：「可能我個樣生得好慘又殘，今次係第三次做自殺角色。拍呢套劇情緒好灰，皮膚又敏感，情緒真係爆晒出嚟。」劇中談善言是個深藏不露的富家女，為報復設計綁架自己。

撰文︰羅婉玲
攝影：陳慧安

上一則
上一則
【奮鬥房】關於謝票，我想說的其實是……

下一則
下一則
高海寧錫王浩信博見報